Nadula ang Akon Pagkabayolente

Panugiron ni Jose Antonio Nebrera

NGAA nagabayolente ang isa ka tawo? Nangin bayolente ako kay amo ini ang akon gindak-an. Si Tatay miembro sang guardia sibil sang Espanya, isa ka grupo sang mga soldado nga grabe ka estrikto. Ginabakol sia pirme ni lolo kag ginhimo man niya ini sa amon. Pirme ako ginahanot ni Tatay sang iya madamol nga paha. Pirme niya ako ginatawag nga mango pero palangga ya niya ang akon manghod nga babayi. Bangod nahadlok si Nanay kay Tatay, wala sia sing nahimo para buligan ako kag wala man niya ginpabatyag sa akon ang iya pagpalangga.

Kon ara ako sa eskwelahan, ginaimadyin ko nga malipayon ang amon pamilya. Kag kon tan-awon sang iban, positibo ako kag masinadyahon nga bata. Pero pakitakita lang ini para matago ko ang akon kahadlok kag kaakig. Sa akon pagpauli, nagabalik ako sa realidad. Samtang nagalakat ako pakadto sa balay, ginakulbaan ako kay basi insultuhon naman ako ukon bakulon ni Tatay.

Para makapalagyo sa sini nga sitwasyon, nagpa-enroll ako sa isa ka eskwelahan sang mga Jesuita nga may dormitoryo sang 13 anyos ako. Sang primero, gusto ko mangin pari. Pero daw wala sing pulos ang akon kabuhi didto. Dapat mabugtaw kami alas singko sa aga kag magpaligo sing matugnaw nga tubig. Dayon, bilog nga adlaw kinahanglan kami magtuon, mangamuyo, kag magtambong sa misa. Halos wala na kami nagapahuway.

Ginapabasa kami sang istorya parte sa mga “santo,” pero wala namon ginatun-an ang Biblia. Isa lang gid ang amon Biblia kag nabutang ini sa kristal nga suludlan. Kinahanglan nga maglisensia pa kami para mabasa ini.

Sang ikatlo ko nga tuig sa eskwelahan, may ara kami ginatawag nga “espirituwal nga ehersisyo” ukon pagpaantos sa kaugalingon. Nagakaon ako damudamo para maglain ang tiyan ko kag indi ako makaentra. Pero wala ako makalusot. Pagkatapos sing halos tatlo ka tuig, indi na gid ako makaagwanta. Gani, nalagyo ako kag nagpauli sa balay. Disiseis ako sadto.

Pagpaadbenturar

Sang makapauli ako, nagtuon ako sing boksing kag wrestling. Nangin maayo ako sa sini, amo nga daw si sin-o ako. Bangod sa akon abilidad, daw ginapadag-an ko lang ang iban, pareho sang ginahimo ni Tatay.

 Sang 19 ako, may natabo nga nagpahumok sa akon balatyagon. Nakilala ko si Encarnita kag pagligad sang siam ka bulan, nagpakasal kami. Natalupangdan niya nga matinahuron ako, mainayuhon, kag malipayon. Wala lang sia kabalo sang pagkabayolente nga ginatago-tago ko. Pero naggua ini sang gintawag ako nga mangin soldado, wala madugay pagkatapos nabun-ag ang amon subang.

Nagboluntaryo ako para sa Spanish Foreign Legion para makapagusto kag malikawan ang pagpagunting pareho sa mga militar. Ginapanan-aw ko nga makapagusto ako sa desyerto sang Morocco kag sa pag-entra sa delikado nga mga misyon. Isa pa, malikawan ko man ang mga responsibilidad sa akon pamilya. Pero indi gid maayo ang resulta sini.

Sang ulihi nag-away kami sang amon sarhento. Daku sia nga tawo kag mapintas sa mga bag-uhan. Nainit gid ako sa ginahimo niya kag wala ako nahadlok basta ara lang ako sa insakto. Isa ka aga sang ginalawag ang amon ngalan, naglahoglahog ako kag nainsulto sia. Sang naghana sia nga bakulon ako, gindakop ko ang iya kamot kag ginlubag. Dayon nagdumugay kami. Wala ko gid ginbuy-an ang iya kamot kay basi tiruhon niya ako.

Bangod sini, sa sulod sang tatlo ka bulan, ginbutang ako sa platoon nga ginapinahan. Mga 30 kami sa isa ka gamay nga kuarto. Sa sini nga tion, wala gid ako kailis-ilis bayo. Ang sarhento sa amon platoon sadista kag nanamian sia manglatigo. Pero isa ka bes, ginsilingan ko sia nga kon tandugon niya ako, patyon ko sia. Gani ginhimo na lang niya nga 3 ka latigo ang akon pina, imbes nga 30. Nangin kabalan ako pareho sang mga nagpaantos sa akon.

Sekreto nga mga Misyon

Sang naga-training ako sa foreign legion, nagboluntaryo ako sa mas delikado pa nga misyon. Wala naman ako kabalo kon diin ako maapok. Gintudluan ako sing commando nga paagi sa pag-away. Nagalakip ini sa paggamit sa tanan nga sahi sang armas kag bomba. Para makompleto ang akon training, ginpakadto ako sa Langley, Virginia, sa Estados Unidos, kag gintudluan upod sa mga CIA.

Wala madugay, nangin miembro ako sang undercover commando. Sang katuigan 1960, madamo ako sing sekreto nga misyon. Nagbulig ako sa mga operasyon batok sa mga nagaismagol sang droga kag mga armas sa Sentral kag Bagatnan nga Amerika. Ginsugo kami nga pamatyon sila. Kalain gid sang amon ginahimo. Ginaubos namon ang tanan, magluwas lang sa puede makuhaan sing impormasyon.

Sang ulihi, gin-asayn ako nga mangespiya sa mga lider sang militar sa Espanya para mabal-an kon sin-o ang nagatraidor sa diktador nga si General Franco. Ginaespiyahan man namon ang mga nagaistar sa Pransia nga kontra sa paggahom ni Franco. Ang katuyuan sini amo nga kidnapon ang ila mga liderlider, dal-on sa Espanya, kag mahimo didto patyon.

Sa akon katapusan nga misyon, gin-organisar ko ang isa ka grupo sang mga soldado nga magkudeta sa isa ka gamay nga pungsod sa Aprika. Ginsugo kami nga salakayon ang baraks sang militar sa kapital sini kag agawon ang palasyo sang presidente. Nagsalakay kami sa tungang gab-i kag natapos namon ang amon misyon sa apat lang ka oras. Madamo kami sing napatay nga “kaaway,” pero tatlo man ang napatay sa amon.

Ginkonsiensia gid ako sa akon ginpanghimo. Indi ako pirme makatulog kay puerte kalain sang akon mga ginadamgo. Makita ko nga ginapamatay ko ang akon mga kaaway kag ang ila mga mata daw nagapakitluoy sa akon.

Namat-od ako nga mauntat na. Ginbalik ko ang tanan ko nga mga dokumento kag nag-resign. Pero tatlo ka bulan sang ulihi, ginpatawag naman ako liwat nga magpangespiya. Nalagyo ako sa Switzerland, kag pila ka bulan sang ulihi, nag-apas sa akon si Encarnita  sa Basel. Wala gid sia kabalo nga isa ako ka secret agent.

Mabudlay Dulaon ang Pagkabayolente

Sa tatlo ka tuig nga ara ako sa militar, nagatuon naman sa Biblia si Encarnita upod sa mga Saksi ni Jehova sa Espanya. Ginsilingan niya ako nga nabal-an na niya ang kamatuoran parte sa Dios, kag nadala man niya ako. Nangita kami dayon sing mga Saksi sa Switzerland kag nagtuon sa Biblia.

Nalipay gid ako kay natun-an ko ang mga katuyuan sang Dios. Bisan pa gusto ko nga sundon ang mga prinsipio sa Biblia, nabudlayan gid ako nga dulaon ang akon pagkamaakigon. Pero, nanamian ako sa akon bag-o nga natun-an. Pagkatapos sang pila ka bulan nga pagtuon, gusto ko na gid mag-upod sa mga Saksi ni Jehova sa ila pagwali sa mga balay.

Sa bulig ni Jehova, natun-an ko ang pagpugong sa kaugalingon, kag sang ulihi nagpabawtismo kami ni Encarnita. Nangin manugtatap ako sa kongregasyon sa edad nga 29.

Sang 1975, nagbalik kami sa Espanya. Pero wala gid ako ginluatan sang militar. Ginpatawag naman ako liwat para sa isa ka misyon. Para makalikaw, nalagyo kami sa Switzerland. Didto na kami nag-istar kag sang 1996, nagbalik kami sa Espanya.

Subong, ang akon duha ka bata pamilyado na kag may duha na ako ka apo. Tanan sila nagaalagad kay Jehova. Sa sulod sang mga tinuig, nalipay gid ako kay mga 16 ka tawo ang akon nabuligan nga makilala si Jehova, lakip na ang isa ka bayolente nga pamatan-on nga pirme nagaentra sa mga protesta sa dalan sa aminhan nga Espanya.

Pirme ako nagapangamuyo nga buligan ako nga malimtan ang akon nagligad kag madula ang akon malain nga mga damgo. Nagatinguha gid ako nga himuon ang husto, gani ginsunod ko ang ginasiling sang Salmo 37:5: “Itugyan sa GINOO ang imo dalanon; salig man sa iya, kag himoon niya ini.” Ginatuman gid ni Jehova ini nga promisa. Ginbuligan niya ako nga madula ang akon pagkabayolente. Nangin pagpakamaayo gid ini sa akon kag sa akon pamilya.

[Retrato sa pahina 21]

Sang nagpaenrol ako sa eskwelahan sang mga Jesuita sa edad nga 13 anyos

[Retrato sa pahina 23]

Nagapagua sa foreign legion office sang mag-resign ako sang 1968

[Retrato sa pahina 23]

Upod kay Encarnita subong