Mga Kinaiya nga Nagahimo sa Aton nga Pinasahi
Mga Kinaiya nga Nagahimo sa Aton nga Pinasahi
NAGAHULAT sa estasyunan sang tren sa New York City ang 50 anyos nga trabahador sa konstruksion. Samtang nagapadulong ang tren, nasandad ang pamatan-on nga lalaki sa tupad niya kag nahulog sa riles. Gilayon sia nga naglumpat kag ginkup-an niya pahapa ang pamatan-on samtang nagalabay ang tren sa ibabaw nila.
Sang tion sang Nazi, ang mga Saksi ni Jehova sa Europa wala nagsiling sing “Heil Hitler!” kay ang German nga tinaga nga heil nagakahulugan sing “kaluwasan.” Nagapati gid sila nga “wala sing kaluwasan sa bisan kay sin-o” luwas kay Jesucristo. (Binuhatan 4:12) Bangod wala nila gin-idolo si Hitler, madamo sa ila ang ginkuha sa ila mga balay kag gintapok sa mga kampo nga prisuhan. Pero ginsunod gihapon nila ang ila mga prinsipio subong Cristiano.
Ginpakita sini nga mga halimbawa nga mahimo unahon sang tawo ang kaayuhan sang iban, bisan indi nila kilala. Ukon mas pilion pa nila nga mapriso sangsa ikompromiso ang ila mga prinsipio. Ginapakita bala sini nga naghalin lang kita sa sapat? Ukon mas mataas kita nga mga tinuga? Pamensari ini samtang ginabinagbinag mo ang masunod nga mga pamangkot:
● Ngaa may konsiensia kita nga makahibalo sang husto kag sala?
● Ngaa nagadayaw gid kita kon pamensaran naton ang katahom sang mga tinuga?
● Ngaa nanamian kita sa musika, painting, ukon mga binalaybay? Indi man gani ini kinahanglan para mabuhi kita.
● Ngaa handum gid sang halos tanan nga tawo nga makilala ang Dios?
● Ngaa nagapamangkot kita: ‘Ngaa nabuhi ako?’ ‘Ano ang katuyuan sang kabuhi?’
● Kon may mapatay, ngaa may mga seremonya kita kag mga ritwal?
● Kag ngaa halos tanan nagapati nga may pihak nga kabuhi? Ang aton bala handum nga mabuhi sing dayon bangod sa ebolusyon?
Diin Makita ang mga Sabat?
Ang masaligan nga sabat sa sini nga mga pamangkot makita sa sagrado kag pinakalapnag nga libro sa kalibutan—ang Biblia. Binagbinaga ang ginasiling sini sa masunod:
Kinaiya sang tawo. Ang tawo gintuga “sa dagway sang Dios,” buot silingon, puede naton mailog ang mga kinaiya sang aton Manunuga. Genesis 1:27) Amo gani nga gintawag ang una nga tawo nga “anak sang Dios.”—Lucas 3:38.
(Pagpalangga kag palanggaon. “Ang Dios gugma,” siling sang 1 Juan 4:8. Bangod gintuga kita sa dagway sang Dios, kinahanglan naton ang pagpalangga halin sa duyan asta sa lulubngan. Kon “wala ako sing gugma, wala ako sing pulos,” sulat sang Cristiano nga si apostol Pablo. (1 Corinto 13:2) Nagsiling man sia: “Mangin manug-ilog kamo sa Dios, subong mga anak nga hinigugma.”—Efeso 5:1.
Kaangtanan sa Dios. “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mateo 4:4) Narekord sa Biblia ang mga ginhambal sang Dios nga nagapakilala sang iya personalidad kag sang iya katuyuan para sa aton. Para mangin malipayon kita dapat may maayo kita nga kaangtanan sa Dios.
Ngaa nagakapatay kita? “Ang bayad nga ginabayad sang sala amo ang kamatayon, apang ang dulot nga ginahatag sang Dios amo ang kabuhi nga walay katapusan.” (Roma 6:23) Ang sala amo ang paglapas sa talaksan sang Dios sa moral kag sa pagsimba. Pero, katuyuan sang Dios nga dulaon ang sala, paumpawan ang mga nagahigugma kag nagatuman sa iya, kag hatagan sing kabuhi nga dayon sa Paraiso sa duta.—Salmo 37:10, 11, 29; Lucas 23:43.
Gusto mo bala nga mabuhi sing dayon kag mapauswag pa gid ang imo mga talento? Gusto mo bala nga makilala pa gid ang imo Manunuga kag mahibaluan ang iya mga katuyuan para sa imo? Kon amo, ginaagda ka namon nga usisaon ang ginahalinan sang kamatuoran, ang Biblia. Amo lamang ini ang makahatag sa imo sing daku gid nga kalipay karon kag sa palaabuton.—Mateo 5:3; Juan 17:3.
[Kahon/Retrato sa pahina 9]
KINAHANGLAN SING PAGPALANGGA HALIN SA PAGKABATA
“Ang pagpalig-on kag pagpalangga kinahanglan sang mga bata,” siling sang sientipiko nga si Gerald L. Schroeder. Gani importante gid nga sundon sang mga ginikanan ang laygay sang Biblia, ilabi na sang mga nanay, “nga higugmaon ang ila mga anak.”—Tito 2:4.
[Retrato sa pahina 8, 9]
Nagakalipay kita sa matahom nga mga butang nga indi man kinahanglan para sa kabuhi
[Retrato sa pahina 9]
Indi lang pagkaon kag tubig ang kinahanglan naton, kundi ang panuytoy man sang aton Manunuga