Gindesinyo Bala Ini?

Ang Balay sang Scaly-Foot Snail

● Isa ini sa may pinakamabakod nga balay ukon alukaba nga nadiskobrehan. Ang scaly-foot snail, nga nakita sa idalom sang Indian Ocean, makasarang sa puersa sang tubig sa kadalumon nga 2,400 metros. Ining gamay nga sapat indi man maapektuhan sa acidity sang tubig kag sa pagbag-obag-o sang temperatura, lakip na sa mainit nga tubig nga ginabuga sang mga sulungawan sa idalom sang dagat. Ginaproteksionan man ini sang iya alukaba gikan sa mga nagaatake.

Binagbinaga: Ang alukaba sang scaly-foot snail may tatlo ka sampaw. Ang una, ginahuman sang iron sulfide; ang ikaduha, daw nagakulap nga protina nga makita man sa iban nga espesyi sang snail; kag ang ikatlo, mineral nga ginatawag aragonite. Bangod tatlo ka sampaw ang alukaba sini, indi ini mabuka sang mabaskog nga mga kagat sang nagaatake nga kasag. Bisan indi ini pagbuy-an sang kasag sa sulod sang pila ka adlaw, indi ini maano.

Paagi sa inugkihad nga diamante nga ginatawag indenter, natukiban sang mga researcher nga “ang nagua nga bahin sang alukaba may mga litiklitik nga nagapaluya sa puersa sang mga nagaatake,” report sang Discover nga magasin. Ini nga litiklitik sa gua lang nga bahin sang alukaba. Wala lang ini nagapaluya sa puersa [sang nagaatake], kundi nagapugong man ini para indi magdaku ang litik.” Ang tunga nga bahin amo ang nagapaluya sa puersa sang nagaatake.

Nagalaum ang mga researcher nga mailog nila ang alukaba sini nga sapat para makahimo sing mabakod nga helmet, bulletproof vest, barko, eroplano, kag helikopter. “Daku ang mabulig sini sa mga tubo sang langis sa Arctic nga pirme lang maigo sang dalagku nga mga ice,” siling sang Discover.

Ano sa banta mo? Natabuan lang bala ang alukaba sang scaly-foot snail? Ukon gindesinyo ini?

[Diagram sa pahina 23]

(Para sa aktual nga pormat, tan-awa ang publikasyon)

Indenter

Nagua

Tunga

Nasulod

[Picture Credit Line sa pahina 23]

Courtesy Anders Warén