Butang nga Mas Bilidhon Pa Sangsa Amon Kabuhi Karon

Panugiron ni Murat Ibatullin

Sang 1987, ginpadala ako sa Uganda, Aprika sang Russian Ministry of Health. Nagsugot ako nga mangin doktor didto sa sulod sang apat ka tuig. Indi ko na gusto nga magbalik sa Rusya. Tuyo ko nga makakuha lang sing eksperiensia para magamit ko subong doktor sa mga pungsod pareho sang Australia, Canada, ukon Estados Unidos. Pero sang 1991 nagbag-o ang akon plano kag nagbalik ako sa Rusya. Sugiran ko kamo kon ngaa.

NATAWO ako sang 1953 sa siudad sang Kazan’, ang kapital sang Republika sang Tatarstan sa sentro sang Rusya. Tatar ang amon mga ginikanan, kag Muslim ang kalabanan sang mga Tatar. Sang bata pa ako, makita ko nga nagayaub sanday Lolo kag Lola nga nagapangamuyo kay Allah. Ginasilingan kami sang amon mga tiya kag mga tiyo, pati na sang amon mga ginikanan, nga indi sila pag-istorbohon kag magua sa kuarto. Daw nahuya ang amon mga ginikanan bangod mga Komunista sila kag wala nagapati sa Dios.

Sang kuatro anyos ako, nabiktima ako sang polio, nga lapnag sadto sa Unyon Sobyet. Sang bata pa ako, pirme ako ginadala sa ospital kag sanatorium para ipakonsulta. Nadumduman ko pa nga nangamuyo si Lolo nga mag-ayo ako. Gusto ko nga mangin mapagsik pareho sa iban nga kabataan, gani bisan pa kimpang ako, nagahampang ako sing soccer, hockey, kag iban pa nga sport.

Pagdaku ko, gusto ko mangin doktor. Indi ako relihioso, pero indi man ako ateista. Wala ako nagahunahuna parte sa Dios. Sa sina nga tion, wala ako nanamian sa mga pagpati sang Komunista kag pirme kami nagabaisay ni Tatay kag ni Tiyoy. Si Tiyoy nagalektyur sing pilosopiya sa isa ka unibersidad, kag si Tatay naman miembro sang State Security Committee, ukon KGB. Sang nakatapos ako sa pagkadoktor, plano ko mangin isa ka maayo  nga neurosurgeon, dayon makadto sa iban nga pungsod.

Pagpangita sing Maayo nga Kabuhi

Sang 1984, nangin espesyalista ako sa mga tumor sa utok. Dayon sang 1987, ginpadala ako sa Uganda sa isa ka ospital sa Mulago. Gin-upod ko sa sining matahom nga pungsod ang akon asawa nga si Dilbar, kag ang amon kabataan nga sanday Rustem, pito ka tuig, kag Alisa, apat ka tuig. Mabudlay magtrabaho sa klinika, lakip na ang pag-opera sa mga pasyente nga may HIV. Pirme ako nagakadto sa iban nga klinika sa sini nga pungsod, kay duha lang kami nga neurosurgeon sa Uganda.

Isa ka adlaw, sa balaligyaan sang libro sa Uganda, sa una nga tion, nakakita kami ni Dilbar sing Russian nga Biblia. Nagbakal kami sing pila ka kopya kag ginpadala sa amon mga abyan sa Unyon Sobyet, kay imposible gid nga makabakal sing Biblia didto sadto nga tion. Ginbasa namon ang pila ka kapitulo sini, pero indi namon maintiendihan. Gani sang ulihi nag-untat kami.

Pero sa sulod sang tatlo ka tuig, nagsimba kami sa lainlain nga relihion sa Uganda kag gintinguhaan namon nga intiendihon ang ila pagpati kag ang katuyuan sang ila kabuhi. Gintun-an ko man ang Koran sa orihinal nga lenguahe sini. Nag-eskwela pa gani kami ni Rustem sing Arabe. Pagligad sang pila ka bulan, makaistoryahanay na kami sa simple nga Arabe.

Sa sina man nga tion, nakilala namon ang misyonero nga mga manunudlo sang Biblia nga sanday Heinz kag Marianne Wertholz, nga taga-Germany kag Austria. Sa una nga pag-istoryahanay, wala namon ginhambalan ang relihion. Daw pareho lang kami sa iban nga taga-Europa nga nagkitaay sa Aprika. Namangkot kami kon ngaa ari sila sa Uganda kag nahibaluan namon nga mga misyonero sila sang mga Saksi ni Jehova kag tuyo nila nga tun-an sa Biblia ang mga tawo diri.

Nadumduman ko dayon nga ginsilingan kami sa amon klase sa pilosopiya sa unibersidad sa Rusya nga ang mga Saksi isa ka sekta nga nagahalad sing mga bata kag nagainom sing dugo. Ginsugid ko ini kanday Heinz kag Marianne, kay indi ako makapati nga mahimo nila ini. Ginhatagan nila kami sing duha ka kopya sang libro nga Mahimu Ka Mabuhi sing Dayon sa Paraiso sa Duta, kag halos naubos namon ini basa sa pila lang ka oras. Sang ginpamangkot ko ang akon asawa parte sa iya nabasahan, nagsiling sia nga nanamian gid sia kag nagapalanindog ang iya balahibo! Ginsilingan ko sia nga pareho ang amon nabatyagan.

Gani, gusto gid namon liwat maistorya sanday Heinz kag Marianne. Sang nagkitaay kami, madamo kami sing gin-istoryahan. Natandog pa gid kami sa amon natun-an sa Biblia. Gani ginsugid namon ini sa amon mga abyan kag kaupdanan. Lakip sa ila ang embahador kag mga konsul sang Rusya kag konsul sang iban nga pungsod, kag representante sang Vatican. Nakibot kami sang nagsiling ang representante sang Vatican nga ang Daan nga Testamento “sugidsugid lang.”

Pagpauli Namon

Isa ka bulan antes kami magpauli sa Rusya sang 1991, nagdesisyon kami ni Dilbar nga mangin Saksi ni Jehova. Abi namon kon pagpauli namon sa Kazan’, makatambong kami  dayon sa mga miting. Pero nasubuan gid kami kay tatlo na ka bulan, wala gid kami sing nakita nga Kingdom Hall kag mga Saksi! Gani nagmatumato kami pamalaybalay, pareho sang ginahimo sang mga Saksi sa bilog nga kalibutan. Nakasugod kami sing mga pagtuon sa Biblia, lakip sa isa ka babayi nga nangin Saksi sang ulihi.

Pagkatapos sini, ginbisitahan kami sang isa ka tigulang nga Saksi. Ang mga Saksi sa Uganda amo ang naghatag sang amon adres sa iya. Nagtipon kami nga 15 sa isa ka gamay nga apartment. Pirme nagapakig-angot sa amon sanday Heinz kag Marianne kag ginkadtuan pa gani nila kami sa Kazan’. Sang ulihi, ginbisitahan man namon sila sa Bulgaria, ang ila asaynment bilang misyonero asta subong.

Pag-uswag sa Amon Lugar

Kon may kahigayunan, ginasugid ko ang kamatuoran sa Biblia sa akon mga kaupdanan sa ospital sa Rusya. Sang ulihi, madamo ang nagbaton kag nangin Saksi ni Jehova, lakip na ang pila ko ka kaupdanan nga mga doktor. Sang 1992, nangin 45 na ang mga Saksi sa Kazan’; pagkadason nga tuig, sobra na 100. Subong, may pito na ka kongregasyon sang mga Saksi diri—lima ang Ruso, isa ka Tatar, kag isa ka sign-language. May grupo man para sa nagahambal sing Armenian kag Ingles.

Sang 1993, nagtambong ako sa isa ka seminar parte sa medisina sa New York City, kag nakakadto ako sa ulong talatapan sang mga Saksi ni Jehova sa Brooklyn. Nakilala ko si Lloyd Barry, nga nagabulig sa pagtatap sa pagwali sang mga Saksi ni Jehova sa bilog nga kalibutan. Bisan pa masako sia, nakig-istorya gid sia sa akon.

Nag-istoryahanay kami nga kinahanglan ang mga literatura sa Biblia sa Tatar nga lenguahe. Pagligad sang pila ka tuig, may grupo na sang translator sa Tatar nga lenguahe sa Rusya. Kag sang ulihi, may mga literatura na sa Tatar. Makalilipay gid kay regular na kami nga makabaton sang Ang Lalantawan, isa ka magasin nga ginagamit sa pagtuon sa Biblia. Wala magdugay, naporma ang una nga Tatar nga kongregasyon.

Pagbulong nga Wala Nagagamit sing Dugo

Ginatuman ko ang tanan nga kasuguan sang Dios sa moral, lakip na ang ginsiling sang Binuhatan 15:20 nga “maglikaw . . . sa dugo.” Ang bersikulo 29 nagsiling man nga ang mga alagad sang Dios dapat “maglikaw sa mga butang nga ginhalad sa mga idolo kag sa dugo kag sa nakuga nga mga sapat kag sa pagpakighilawas.”

Gani kon magpabulong ang mga Saksi ni Jehova, ginapangabay nila ang mga doktor nga respetuhon ang ila tindog nga indi maggamit sing dugo. Sa pila ka tion, miembro ako sang Hospital Liaison Committee sang mga Saksi sa Kazan’. * Sang 1997, ang isa ka tuig nga si Pavel nga halin sa siudad sang Novosibirsk kinahanglan dayon operahan. Nagpabulig ang iya nanay sa amon. Sadto nga tion, pila lang ka doktor sa Rusya ang handa sa pag-opera nga wala sing dugo, gani ginbuligan namon sia.

Nakakita kami sing ospital sa Kazan’ nga handa sa pag-opera sa tagipusuon ni Pavel. Sang Marso 31, 1997, nagmadinalag-on ang operasyon para mabulong ang iya balatian sa tagipusuon nga wala naggamit sing dugo. Sang Abril 3, ang pamantalaan nga Vechernyaya Kazan nagreport: “Maayo na ang pamatyag  sang bata nga lalaki kag indi na niya kinahanglan pa magpabulong . . . karon pa lang nakaginhawa sing halog ang nanay ni Pavlik [hayo ni Pavel] sa sulod sang onse ka bulan.” Madasig lang nga nag-ayo si Pavel sa operasyon kag nakalakatlakat na sia sa ospital.

Maayo kag normal na subong si Pavel. Nanamian sia maglangoy, mag-ice skate, kag mag-soccer. Grade 8 na sia subong, kag nagasimba upod sa iya nanay sa kongregasyon sang mga Saksi ni Jehova sa Novosibirsk. Pagkatapos sini nga operasyon, ang mga doktor sa sina nga ospital nagmadinalag-on man sa pag-opera sa tagipusuon sang pila ka Saksi ni Jehova nga wala nagagamit sing dugo. Nagauswag man ang pamaagi sa pagbulong sa Tatarstan, kag madamo naman ang nagaopera nga wala sing dugo.

Ang Akon Trabaho Subong

Kami nga mag-asawa, upod sa iban nga Saksi, nagaobra sa isa ka moderno nga ospital nga nagabulong sa mga pasyente nga may balatian sa utok kag tagipusuon. Nagapang-opera man kami, ilabi na sa mga pasyente nga indi magpatughong sing dugo. Isa ako ka neuroradiologist kag padayon nga nagatuon parte sa pag-opera sa utok nga wala nagagamit sing dugo. Bilang propesor sa Department of Neurology and Neurosurgery sa Kazan’ State Medical University, nagalektyur ako sa mga doktor kag mga estudyante sa medisina kag nagapaathag sa ila nga mas epektibo ang pagbulong nga wala sing dugo. *

Isa ka espesyalista sa ultrasound ang akon asawa sa amon ginaobrahan. Nanamian kami sa amon obra kay mabuligan namon ang iban. Pero mas nalipay kami nga makita nga ang kamatuoran sa Biblia nagabulong sa mga tawo sa espirituwal. Malipayon gid kami sa pagsugid sa mga tawo parte sa saad sang Dios nga sa indi madugay “ang pumuluyo indi magsiling, ‘Nagamasakit ako’”—Isaias 33:24.

[Mga Nota]

[Retrato sa pahina 12]

Pagserbisyo subong doktor sa Aprika

[Retrato sa pahina 13]

Sang nagtuon kami nga mag-asawa sa Biblia upod sa mga Saksi ni Jehova sang 1990

[Retrato sa pahina 14]

Sang nagkitaay kami ni Lloyd Barry sa Brooklyn, New York sang 1993

[Retrato sa pahina 15]

Si Pavel subong upod sa iya nanay

[Retrato sa pahina 15]

Pagwali upod kay Dilbar