Dapat Matapos Na ang Pag-antos!

Ginpatay ang tatay ni Khieu kay napabay-an sini nga magkadto sa kamaisan sang ila kaingod ang ila mga baka. Dayon, ginpatay man ang iya nanay kag duha ka utod nga babayi sang mga rebelde nga Khmer Rouge sa Cambodia. Sang ulihi, nalukpan sia sang bomba nga nalubong sa duta kag nasamaran. Naghulat pa sia sing 16 ka adlaw sa kagulangan antes sia nabuligan, amo nga kinahanglan utdon ang isa niya ka tiil. “Gusto ko na mapatay,” siling ni Khieu.

TANAN kita nagaantos. Ang mga kalamidad, balatian, kasablagan, krimen, kag iban pa nga trahedya nagakatabo sa tanan, bisan diin kag bisan ano nga oras. Amo gani nga may mga organisasyon nga padayon nga nagabulig sa mga tawo para mapahaganhagan ang ila pag-antos. Pero ano ang ila nahimo?

Halimbawa, binagbinaga ang ila panikasog nga dulaon ang gutom. Suno sa pamantalaan nga Toronto Star, madamo ang nadulaan sing balay kag nagutman bangod sa mga kalamidad. Pero nagsiling pa ini nga “nabudlayan ang mga ahensia nga dulaon ang gutom bangod nagalala ang kinagamo.”

Nagatinguha gid ang mga pulitiko, kilala nga mga tawo, kag mga doktor nga mabuhinan ang pag-antos, pero wala nila ini nahimo. Ang mga programa para mapauswag ang ekonomiya wala nakadula sang kaimulon. Ang mga bakuna, bulong, kag moderno nga pamaagi sa pag-opera wala nakadula sang tanan nga balatian. Wala man sing nahimo ang mga pulis sa nagadamo kag nagalala nga krimen.

Ngaa grabe gid ang pag-antos? Nagaulikid bala ang Dios sa pag-antos sang mga tawo? Nasapwan sang minilyon ang makapaumpaw nga sabat sang Biblia sa sini nga mga pamangkot. Binagbinagon naton ini.