Halin sa Amon mga Bumalasa

Ang Sarisari nga Kabuhi sa Upper Amazon (Abril 2010) Suno sa inyo artikulo, ang mga Awajun (Aguaruna) mga tawo nga nagasimba sa lima ka dios. Isa ako ka Awajun kag indi ako ugyon sa inyo ginsiling. Sa banta ko nagsala kamo, bangod kalabanan sa mga Awajun nagapangangkon nga mga Cristiano kag wala kami nagasimba sa lima ka dios subong sa ginsiling sang inyo magasin. Ang mga Awajun pirme nagabasa sang inyo magasin, gani palihug tadlunga ninyo ini.

T.P.T., Peru

Sabat sang “Magmata!”: Ang manunulat sini nagtipon sing mga impormasyon halin sa ila gin-interbyu nga mga pumuluyo anay sa Aguaruna kag halin sa naimprinta nga mga publikasyon. Ang isa sini amo ang “Atlas Regional del Perú,” 2004 nga Edisyon, nga naghatag sing mga ngalan kag deskripsion sang lima ka dios sang mga Aguaruna. Pero subong sang ginsiling mo, ang pila ka pumuluyo sang Aguaruna nagapangangkon nga mga Cristiano. Nagapangayo kami sing pasaylo kon nakahatag sing malain nga impresyon ini nga artikulo sa inyo.

Ano ang Makabulig Kon Nagaang-ang Ka? (Mayo 2010) Salamat gid sa sini nga artikulo. Nagaang-ang man ako, gani nasubuan gid ako pirme. Pero sang nabasa ko ini, narealisar ko nga indi lang ako ang nagaang-ang. Determinado na ako subong nga batunon ang akon diperensia, kag pareho kay Rafael, “kon mag-ang-ang ako, ginakadlawan ko na lang ini” kag nagalahog.

Y. S., Japan

Pamangkot sang mga Pamatan-on . . . Paano Magdugang ang Akon Kompiansa? (Mayo 2010) Dose anyos ako kag ang upod ko sa balay amo ang akon iloy. May grabe sia nga balatian kag sia lang ang nagasagod sa akon. Sang ginbasa ko ang pamangkot nga “Nabatyagan mo bala nga ginapalangga ka?” Nagsabat ako nga “Wala.” Naglalain gid ako. Gani nakig-istorya ako sa pila ka hamtong nga Cristiano kag sa akon iloy. Nabuligan ako sini nga artikulo nga maintiendihan nga wala sing rason nga maluoy ako sa akon kaugalingon. Madamo ang nagapalangga sa akon. Salamat gid sa pagpaintiende sa akon nga palangga gid ni Jehova ang mga kabataan pareho ko.

C. H., Pransia

Napaumpawan ako sini nga artikulo parte sa akon masakit nga mga inagihan kag pagbatyag nga wala sing pulos nga nagatublag sa akon kon kaisa. Indi ko gid malipatan ang tatlo ka paagi nga ginbinagbinag diri para madugangan ang akon kompiansa, ilabi na ang ilustrasyon parte sa kuarta nga may gamay nga gisi! Salamat gid sa sining matahom nga artikulo!

S. W., South Korea