“Salamat sa Sini nga Artikulo!”

● Nagapasalamat gid ang mga tawo sa lainlain nga pungsod sa artikulo nga “Para Binagbinagon sang Pamilya” sa tagsa ka gua sang Magmata! sa pahina 30 kag 31. Ang manami gamiton sa paghinun-anon nga mga larawan kag mga pamangkot, ang mga kolektahon nga Bible card, mga piktyur nga pangitaon sang kabataan, kag ang seksion nga hilimuon sang pamilya makatudlo kag makapasadya gid sa pamilya. Binagbinaga ang masunod nga komento:

“Ginatun-an ko sa Biblia ang akon duha ka 12 anyos nga apo paagi sa sulat. Ginapasabtan ko sa ila ang ‘Para Binagbinagon sang Pamilya,’ kag ginabalik nila ini sa akon. Nasadyahan gid ang akon mga apo sa amon pagtuon, kag puede ko pa ipaathag ang mga punto nga amon ginabinagbinag paagi sa sulat. Salamat sa sini nga artikulo!”

V. C., Estados Unidos

“Sining karon lang, gusto sang akon singko anyos nga bata nga lalaki nga binagbinagon ang isa ka ‘Ano ang Sala sa Sini nga Piktyur’ antes sia magtulog. Nakakita ako sing isa kag gin-istoryahan namon ini. Namati sia sing maayo samtang ginabasa ko sa Biblia ang kasaysayan. Gusto niya nga magtuon kami kada gab-i. Nagapasalamat gid kami sang akon pamilya sa inyo pagbulig sa amon kabataan nga manamian sa pagtuon sa Biblia.”

M. F., Pransia

“Sa terminal sang bus, nakilala ko si David, 12 anyos, kag si Jennifer, 6 anyos. Nakita ako sang ila tatay nga nagatanyag sing Magmata! sa mga nagabiyahe, gani ginpakadto niya sila sa akon para magkuha sing magasin. Samtang ginabasa ni David kag sang ila tatay ang mga magasin, nawili kami ni Jennifer sa pagtan-aw sang matahom nga mga laragway kag mga piktyur sang mga pispis kag mga sapat. Gin-istoryahan namon ang mga ginhimo ni Jehova nga Dios nga nagapasadya sa aton. Pag-abot namon sa pahina 31, ginpangita namon ang ‘Mga Piktyur nga Pangitaon sang Kabataan.’ Sang ginpangita ko ang una nga piktyur, gilayon nga ginpangita ini ni Jennifer sa magasin kag nakita niya ini sa pila lang ka segundo. Ginpangita namon ang ikaduha kag ikatlo nga piktyur, kag naunahan na naman niya ako. Ang matuod, gusto pa gid ni Jennifer nga sigehon namon ini asta nga naubos ang napulo ka isyu sang magasin! Sang ulihi, nangayo pa gid sia sing duha ka kopya para sa iya tatay kag utod. Antes ako maglakat, nagpasalamat gid sila nga tatlo sa matahom nga magasin.”

M. C., Ecuador