Tradisyunal nga Pagdesinyo sa Kahoy sa Rusya

● Ang kalabanan nga nagakadto sa Rusya nanamian gid magbakal sing sarisari nga handicraft, pareho sang monyika nga matryoshka. Sang una, ang kalabanan sini ginahimo sang sagad nga mga manugtigib sa mga kaumhan sang Rusya. Ang tinigib nga kahoy nga may tradisyunal nga mga desinyo ginatawag nga khokhloma.

Sa sulod sang mga siglo, ang mga taga-Rusya nagagamit sing napintahan nga mga yahong, kutsara, tasa, kag iban pa nga mga suludlan nga human sa kahoy. Mga tanom ukon mga sapat ang masami nga desinyo sini. Mahimo nga ang tanan nga tagauma nagahimo sing mga produkto nga human sa kahoy.

Ginahimo ini sang mga pumuluyo kon maglawig ang tigtulugnaw, kay gamay lang ang ulubrahon sa uma. Mga 200 ka tuig na ang nagligad ukon kapin pa, ini nga mga produkto nangin mabakal gid sa pila ka lugar. Isa ka bes, ang tanan nga pumuluyo sang Semënov nag-untat sa pagpanguma kag naghimo sing halos duha ka milyon ka yahong, pinggan, tasa, kag kutsara nga human sa kahoy sa isa lang ka tuig!

Ang mga nagaistar malapit sa banwa sang Nizhniy Novgorod nakaimbento sang isa ka paagi para magtig-a kag magbadlak ang ila napintahan nga mga suludlan. Naghimo sila sing mga pinta kag mga barnis nga makabato sa init. Dayon, ginapainitan nila ini sa pugon. Bangod sa kainit, ang abuabuhon nga kolor sini mangin daw bulawan, kag salalama gid. Amo gihapon ini ang proseso sa mga pabrika sang khokhloma sa Nizhniy Novgorod.

Ang mga desinyo sang khokhloma nagalakip sang mga bulak kag tanom nga makita sa kagulangan kag kapatagan sang Rusya. May mga desinyo man nga mga pispis kag isda. Pero pirme nga ginadesinyo sa sini ang nagakalabod nga hilamon kag dahon, kag prutas, pareho sang sarisari nga klase sang berry. Sa masami, pula, itom, bulawan, kag berde ang kolor sini. Paagi sa khokhloma, madamo nga tawo sa bilog nga kalibutan subong ang nagadekorar sang ila mga lamesa sang manami nga mga talan-awon sang Rusya.