Ang Ginasiling sang mga Ginikanan

Ang pagkatin-edyer isa naman ka bag-o nga kabudlayan sa madamo nga ginikanan. Pareho sa imo, ang imo bata mahimo nga indi man makahibalo sang iya himuon. Gani, paano mo sia mabuligan nga magmadinalag-on sa sini nga bahin sang iya kabuhi? Talupangda ang ginsiling sang pila ka ginikanan sa iban nga pungsod.

MGA PAGBAG-O

“Sang gamay pa ang amon bata nga lalaki, ginapati niya dayon ang akon ginahambal. Pero sang tin-edyer na sia, daw wala na sia salig sa akon. Ginaduhaduhaan na niya ang akon ginahambal kag ang paagi ko sa paghambal.”—Frank, Canada.

“Daw indi na mag-istorya sa amon ang amon bata nga lalaki subong. Dapat ko pa sia pamangkuton antes sia mag-istorya sa amon, kag daw indi pa gani sia magsabat. Masabat man sia, pero madugay pa.”—Francis, Australia.

“Importante ang pagpasensia. Kon kaisa ginaakigan namon ang amon kabataan, pero ang pagpakig-istorya sa ila sing maayo amo ang pinakamaayo nga himuon!”—Felicia, Estados Unidos.

KOMUNIKASYON

“Kon kaisa ang akon tin-edyer nga bata nga babayi nagapangapin dayon sa iya kaugalingon, kag kon kaisa abi niya ginpangitaan ko lang sia sala. Kinahanglan ko sia pasaligon nga palangga ko sia, kag gusto ko nga magmadinalag-on sia!”—Lisa, Estados Unidos.

“Sang bata pa ang akon kabataan, pirme sila nagaistorya sa akon. Mahapos lang mahibaluan kon ano ang ila ginapensar. Karon, kinahanglan ko sila intiendihon kag ipakita nga ginarespeto ko sila. Amo lang ini ang paagi para makig-istorya sila sa akon.”—Nan-hi, Korea.

“Indi lang dapat nga dilian ang mga tin-edyer sa pila ka butang. Kinahanglan man naton nga ipaathag ini sa ila kag istoryahon sila sing maayo. Kon gusto naton nga maistorya sila, kinahanglan handa man kita mamati sa ila, bisan pa indi naton gusto ang ila ihambal.”—Dalila, Brazil.

“Kon ginadisiplina ko ang akon bata nga babayi, ginahimo ko ini nga kami lang, imbes nga sa atubangan sang iban.”—Edna, Nigeria.

“Kon kaisa, kon ginaistorya ko ang akon bata nga lalaki, nagakatublag ako sa mga ulubrahon sa balay kag indi ko sia mahatagan sing bug-os nga atension. Natalupangdan niya ini, kag sa banta ko amo ini ang rason nga daw indi na sia makig-istorya sa akon. Dapat manikasog gid ako nga pamatian sia kon nagaistorya, para pirme sia makig-istorya sa akon.”—Miriam, Mexico.

KAHILWAYAN

“Nahadlok ako nga hatagan sing kahilwayan ang akon mga tin-edyer, kag amo ini ang rason sang amon indi pag-intiendihanay. Ginaistorya ko ini sa ila. Ginapaathag ko kon ngaa nahadlok ako, kag ginapaathag man nila kon ngaa gusto nila sing dugang nga kahilwayan. Makahimo kami sing kasugtanan nga madugangan ang ila kahilwayan pero suno sa limitasyon nga ginahatag ko.”—Edwin, Ghana.

“Gusto sang akon bata nga lalaki nga baklan ko sia sing motorsiklo. Indi ko gid ini gusto amo nga gin-akigan ko sia kag ginhambalan sang tanan nga disbentaha sang motor, nga wala nagahatag sa iya sing kahigayunan nga magpaathag. Naakig sia kag mas gusto na gid gani niya magbakal! Gintestingan ko ang iban nga paagi. Ginpalig-on ko sia nga mag-research parte sa sini, lakip na sa katalagman, gasto, kag mga kinahanglanon para makakuha sing lisensia. Ginsilingan ko man sia nga mamangkot sa hamtong nga mga Cristiano sa kongregasyon. Narealisar ko nga imbes mangakig, mas maayo nga palig-unon ko ang akon bata nga ihambal kon ano ang iya mga gusto. Sa sini nga paagi, malab-ot ko ang iya tagipusuon.”—Hye-young, Korea.

“Nagabutang kami sing mga limitasyon, pero amat-amat nga nagahatag sing kahilwayan. Kon indi nila pag-abusuhan ini nga kahilwayan, ginadugangan namon ini. Ginahatagan namon sila sing kahigayunan para makabaton sing kahilwayan, kag ginapakita namon nga gusto gid namon nga makuha nila ini; pero ginadisiplina namon sila kon abusuhan nila ang amon pagsalig.”—Dorothée, Pransia.

“Ginapatuman ko gid ang akon mga pagsulundan. Pero kon matinumanon ang akon mga bata, ginahatagan ko sila sing pabor. Halimbawa, kon kaisa ginatugutan ko sila nga maglagaw bisan gab-i. Pero kon sobra na isa ka bes nga magpauli sila nga sobra sa amon ginkasugtan kag wala naglisensia, disiplinahon namon sila.”—Il-hyun, Korea.

“Kon mas matinumanon kag responsable ang isa ka empleyado, mas hatagan sia sing konsiderasyon sang iya amo. Amo man sini sa amon bata nga lalaki, kon matinumanon kag responsable sia sa limitasyon nga ginahatag sa iya, amat-amat man namon sia nga ginahatagan sing kahilwayan. Nahibaluan sang akon bata nga ginasilutan ang isa ka empleyado kon indi niya matuman ang iya responsibilidad, madula man niya ang kahilwayan nga iya nabaton kon indi sia mangin responsable.”—Ramón, Mexico.

 [Blurb sa pahina 22]

“Hanasa ang bata sa dalanon nga dapat niya paglaktan, kag bisan tigulang na sia indi sia magtalikod sa sini.”—Hulubaton 22:6

 [Kahon/Mga Retrato sa pahina 23]

PANAYSAYON SANG PAMILYA

“Makalilipay Gid Mangin Ginikanan sang mga Tin-edyer”

Joseph: Tin-edyer na ang duha ko ka bata nga babayi, kag nakita ko nga importante gid nga pamatian ang ila mga pagtamod. Ginabaton ko ang akon mga kakulangan kag ginarespeto ko sila kon nagaistoryahanay kami. Gani, maayo ang amon komunikasyon. Amo nga para sa akon, makalilipay gid nga mangin ginikanan sang mga tin-edyer. Salamat sa giya sang Pulong sang Dios, ang Biblia.

Lisa: Natalupangdan ko nga sang nagtin-edyer na ang akon subang nga babayi, mas kinahanglan niya ang akon atension. Nadumduman ko pa nga pirme ko sia ginapamatian, ginaistorya, kag ginapalig-on. Ginahambalan namon sang akon bana ang amon mga bata nga makapabutyag sila sang ila balatyagon kag ginarespeto namon ini. Ginatinguhaan ko nga iaplikar ang laygay sa Santiago 1:19 nga “mangin maabtik sa pagpamati, mahinay sa paghambal.”

Victoria: Best friend ko si Nanay. Wala pa ako sing nakilala nga pareho sa iya ka mainanggaon kag mainulikdon, kag amo gid sia sina sa tanan. Sinsero sia sa pag-ulikid sa iban. Nagapasalamat gid ako nga sia ang akon nanay.

Olivia: Mapinalanggaon kag mahinatagon si Tatay. Bisan pa pigado kami, nagabulig sia sa iban. Kahibalo sia kon san-o mangin serioso, kag kahibalo gid sia kon san-o kami magsinadya. Maayo sia nga halimbawa sa tanan kag nalipay gid ako nga sia ang akon tatay.

“Wala Gid Kami Nagakatak-an sa Amon Kabuhi!”

Sonny: Kon may problema ang amon mga bata nga babayi, ginaistoryahan namon ini subong pamilya. Ginahambal gid namon kon ano ang amon nabatyagan, kag nagadesisyon kami suno sa mga prinsipio sa Biblia. Ginasiguro man namon ni Ynez nga ang ila ginaupdan, maayo kag hamtong nga mga tawo. Abyan nila ang amon mga abyan, kag abyan man namon ang ila mga abyan.

Ynez: Ginatinguhaan namon nga magpabilin nga aktibo kag ululupod sa amon mga buluhaton. Subong mga Saksi ni Jehova, masako kami sa pagwali, personal kag pangpamilya nga pagtuon sa Biblia, kag pagbulig sa mga biktima sang kalamidad kag pagtukod sing Kingdom Hall. Pero nagalingawlingaw man kami. Wala gid kami nagakatak-an sa amon kabuhi!

Kellsie: Nagapamati gid si Tatay, kag ginapamangkot niya anay kami antes maghimo sing importante nga mga desisyon. Ara gid dayon si Nanay kon kinahanglan ko sing bulig ukon sing kaistorya.

Samantha: Ginapabatyag gid ni Nanay nga espesyal ako sa iya, palangga niya ako kag importante gid ako sa iya, bisan wala niya ini ginahungod. Nagapamati sia kag nagaulikid sa amon. Indi ko gid pag-ibaylo sa iban ang amon pag-abyanay.

[Mga Retrato]

Pamilya Camera: sanday Joseph, Lisa, Victoria, Olivia, kag Isabella

Pamilya Zapata: sanday Kellsie, Ynez, Sonny, kag Samantha

[Retrato sa pahina 22]

Mahimo maghatag sing pila ka kahilwayan ang mga ginikanan, pero dapat sila magbutang sing rasonable nga mga limitasyon