Ilimnon nga Embahador sang Mexico
Ilimnon nga Embahador sang Mexico
● Sang nag-abot ang mga Katsila nga conquistadores sa Mexico sang maaga nga bahin sang ika-16 nga siglo, nakatilaw sila sing ilimnon nga ginatawag pulque. Duga ini sang agave nga ginpaaslom. Pareho man ini sa beer nga manubo sing alkohol. May protina ini nga pareho sang ara sa utan, carbohydrate, bitamina, kag mineral, gani ginahimo ini nga suplemento sa pagkaon sa madamo nga lugar.
Bangod naanad ang mga Katsila nga may ilimnon sila kon magkaon, ginproseso pa gid nila ang agave para mas mag-isog, kag gintawag ini nga mescal. Diri nagsugod ang tequila. Subong, madamo na sing nagahimo sing tequila sa Mexico. Makahimo sila sing sobra sa 189 ka milyon ka litro kada tuig, kag 40 porsiento sini ang ila ginaeksport.
Ang blue agave isa ka sahi sang liryo nga maduga. May mga plantasyon sini sa kabukiran sang katundan sang sentral sang Mexico, ilabi na sa estado sang Jalisco malapit sa banwa sang Tequila, diin ginkuha ang ngalan sang ilimnon. * Mga 12 ka tuig maggulang ang agave, amo nga madamo ini sang makuha nga mineral. Paano ini ginaani? Ginakuha anay ang tunukon nga mga dahon sini para mabilin ang lawas nga daw pinya. Ang kalabanan sini nagabug-at sing 50 kilos kag madamo ini sing duga. Mga siete kilos ang kinahanglan para makahimo sing isa ka litro nga tequila.
Madamo nga Mexicano ang nanamian mag-inom sing tequila nga wala sing simbog. Dayon nagadimdim sila sing asin kag lime. Mas pamilyar ang mga taga-iban nga pungsod sa margarita, ang tequila nga ginsimbugan sing lime juice, kag orange-flavor nga alak. Ginaserbe nila ini nga may yelo kag ginabutangan sing asin ang bibig sang kopa. * Ang tequila ginabaligya sa mga 90 ka pungsod, amo nga gintawag ini nga ilimnon nga embahador sang Mexico.
[Mga Nota]
^ par. 4 Sa 136 ka klase sang agave sa Mexico, pila lang ang ginahimo nga pulque kag iban pa nga ilimnon. Pero ang blue agave lang ang ginahimo nga tequila.
^ par. 5 Ang haganhagan nga pag-inom sing alak wala ginapakalain sang Biblia. (Salmo 104:15; 1 Timoteo 5:23) Pero, ginapakamalaut sang Biblia ang sobra nga pag-inom kag pagpahubog.—1 Corinto 6:9, 10; Tito 2:3.
