Ang Pagkabunayag Nagaresulta sa Matuod nga Kadalag-an

“Bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.”—Lucas 12:15.

ANG kuarta kinahanglan naton. Ginhatagan kita sang Dios sing responsibilidad nga amanan ang aton kaugalingon kag ang aton pamilya.—1 Timoteo 5:8.

Pero paano kon ang imo pagpangita sing kuarta kag pagbakal sing mga butang indi lang para sa imo kinahanglanon, kundi nangin sentro na sang imo kabuhi? Mas mahapos sa mga luyag magmanggaranon nga magdinaya. Ulihi na lang nila marealisar nga ang pagdinaya indi makahatag sing matuod nga kadalag-an. Isa pa, nagsiling ang Biblia nga ang gugma sa kuarta nagaresulta sa madamo nga kasakit.—1 Timoteo 6:9, 10.

Binagbinaga ang halimbawa sang apat ka tawo nga nagapati nga indi lang kuarta ang makahatag sa ila sing madinalag-on nga kabuhi.

Respeto sa Kaugalingon

“Sang nagligad nga tinuig, gin-interbyu ko ang potensial namon nga kliyente nga gusto magkuha sing insurance nga nagabalor sing milyones dolyares. Linibo tani ka dolyar ang akon komisyon. Ginsilingan niya ako nga makuha sia sing insurance kon ihatag ko sa iya ang katunga sang akon komisyon. Ginsilingan ko sia nga indi ini maayo kag ilegal ini.

“Ginpamangkot ko sia kon gusto bala niya nga ihatag ang iya personal kag pinansial nga impormasyon sa isa nga indi bunayag. Ginsulit ko sa iya nga indi ako magsugot, kag ginsilingan sia nga kontakon lang niya ako kon gusto niya magkuha sa akon. Wala na kami nagkitaay liwat.

“Kon nagpasugot ako sa iya, naguba ang akon integridad kag respeto sa kaugalingon bilang Cristiano. Nangin ulipon kuntani ako sang tawo nga nag-engganyo sa akon nga magdinaya.”—Don, U.S.A.

Kalinong sa Hunahuna

Subong sang ginsambit sa una nga artikulo sini nga magasin, gintanyagan si Danny sing  daku nga kuarta para magbinutig. Ano ang iya ginhimo?

“Ginpasalamatan ko ang manedyer sa pagpapanihapon sa akon kag ginbalik ko sa iya ang sobre nga may kuarta. Namilit pa gid sia kag nagsiling nga kon papasaron ko ang ila pabrika, dugangan pa gid niya ini. Wala ko ini ginbaton.

“Kon ginbaton ko ang kuarta, pirme lang ako siguro kulbaan nga madiskobrehan ini. Sang ulihi nahibaluan sang akon amo ini nga hitabo. Nalipay gid ako nga nangin bunayag ako. Nadumduman ko ang ginsiling sang Hulubaton 15:27 (Maayong Balita nga Biblia, HPV): ‘Ang nagaganansya sa indi maayo nga paagi, nagadala sing palaligban sa iya panimalay. Ang nagabaton sing mga hamham, indi magkabuhi sing malawig.’”—Danny, Hong Kong.

Kalipay sa Pamilya

“Isa ako ka kontraktor. Madamo sing kahigayunan nga makapangdaya ako sa mga kostumer ukon indi magbayad sing husto nga buhis. Pero nakabenepisyo ako kag ang akon pamilya sa akon determinasyon nga mangin bunayag.

“Dapat nga bunayag ka sa tanan nga bahin sang imo kabuhi, indi lang sa trabaho ukon sa negosyo. Kon nakahibalo ka nga indi magkompromiso ang imo bana ukon asawa sa talaksan sang Dios sa pagkabunayag, magabakod pa gid ang pagsalig sang kada isa sa sulod sang pamilya. Saligan ka sang imo tiayon kay nahibaluan niya nga bisan ano ang matabo, mangin bunayag ka gihapon.

“Mahimo nga ikaw ang tag-iya sang pinakadaku nga kompanya sa kalibutan, pero indi mo mabakal ang solusyon sa problema sang imo pamilya. Subong isa ka Saksi ni Jehova, nakita ko nga ang pagsunod sa mga prinsipio sa Biblia nakabulig nga mangin balanse ang amon kabuhi. May tion kami nga magsinadya sang akon pamilya, nga wala nagasunod sa kalibutan nga kontrolado sang kuarta kag kakagod.”—Durwin, U.S.A.

Maayo nga Kaangtanan sa Dios

“Ako ang nagapamakal sing suplay para sa amon kompanya. Kon kaisa, ginasilingan ako sang mga ahente nga imbes nga ihatag ang bug-os nga diskuento sa amon kompanya, ihatag nila sa akon ang pila ka porsiento sini. Pero, pagpangawat ini sa amon kompanya.

“Tamatama lang ang akon sueldo, kag yawat pa kuntani ini nga kuarta. Pero wala na sing mas importante pa sa matinlo nga konsiensia kag maayo nga kaangtanan kay Jehova nga Dios. Gani sa tanan nga transaksion, ginasunod ko ang prinsipio sa Biblia sa Hebreo 13:18: ‘Luyag namon maggawi sing bunayag sa tanan nga butang.’”—Raquel, Pilipinas.

 [Kahon/Mga Retrato sa pahina 9]

Mga Prinsipio Para sa Bunayag nga Negosyo

Lainlain nga kinabatasan ang ginasunod sang mga negosyante sa kada lugar. Pero ang mga prinsipio sa Biblia mahimo mangin basihan sa paghimo sing maayo nga desisyon. May anom ka prinsipio nga ginasunod ang bunayag nga mga negosyante:

Wala Nagabutig

Prinsipio: “Indi kamo magbutig sa isa kag isa.”—Colosas 3:9.

Matinumanon

Prinsipio: “Dapat nga ang inyo Huo magakahulugan sang Huo, ang inyo Indi, Indi.”—Mateo 5:37.

Masaligan

Prinsipio: “Dili pag-ibuyagyag ang tinago sang iban.”—Hulubaton 25:9.

Wala Nagabaton sing Hamham

Prinsipio: “Indi ka magbaton sing hamham, kay ang hamham nagabulag sa tawo.”—Exodo 23:8, HPV.

Wala Nagadinaya

Prinsipio: “Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.”—Mateo 7:12.

Legal

Prinsipio: “Ihatag sa tanan ang mga natungod sa ila, sa iya nga nagapatuman sang buhis, ang buhis.”—Roma 13:7.

[Kahon/Mga Retrato sa pahina 9]

Paano Mangin Bunayag sa Negosyo?

● Hibalua ang Imo mga Prioridad. Halimbawa, ano ang mas importante sa imo, ang pagtipon sing kuarta ukon ang maayo nga kaangtanan sa Dios?

● Planuha Na nga Daan. Paabuta ang mga sitwasyon nga mahimo matilawan ang imo pagkabunayag kag planuha na nga daan kon ano ang imo himuon.

● Ipahibalo ang Imo Panindugan. Sa pagsugod pa lang sang imo transaksion, ipahibalo na nga daan sa iban ang imo panindugan.

● Magpabulig sa Iban. Kon tanyagan ka nga magdinaya, mangayo sing laygay sa mga tawo nga may pareho sa imo nga prinsipio.

[Retrato sa pahina 8]

Kon bunayag ka, may kalinong ka sa hunahuna