ANG mga homoseksuwal (agi kag tomboy) ginabaton na karon sa madamo nga pungsod. Ang isa ka grupo sang isa ka relihion sa Estados Unidos nagapangabay nga bag-uhon ang interpretasyon sa ginasiling sang Biblia parte sa homoseksuwalidad base sa “kahimtangan subong.” Ang isa ka pastor sa Brazil nga nagpakasal sa lalaki nagpalig-on man nga “usisaon liwat ang Biblia,” para paayunan ang bag-o nga pagtamod sang iya relihion.

Sa pihak nga bahin, ang mga indi magsugot sa ginahimo sang mga homoseksuwal ginakabig nga indi rasonable ukon may pinilian. Ano ang ginasiling sang Biblia parte sa homoseksuwalidad?

Ano ang Ginasiling sang Biblia?

Ang Biblia wala nagapalig-on sa pag-ihig-ihig sa mga tawo. Pero maathag ang ginasiling sini parte sa mga ginahimo sang mga homoseksuwal.

“Wala sing lalaki nga magpakighilawas sa isa ka lalaki, kay ginakangil-aran ini sang Dios.”—Levitico 18:22, HPV.

Isa lang ini sa mga Kasuguan nga ginhatag sang Dios kay Moises para sa pungsod sang Israel. Pero ginapakita sini ang pagtamod sang Dios sa mga ginahimo sang mga homoseksuwal, Judiyo man ukon indi, sang nagsiling ini: “Ginakangil-aran ini sang Dios.” Ang mga pungsod sa palibot sang Israel nagahimo sing homoseksuwal nga mga buhat, incesto, pagpakighilahi, kag iban pa nga ginadilian sang Kasuguan. Gani, ginkabig sang Dios nga mahigko ini nga mga pungsod. (Levitico 18:24, 25) Nagbag-o bala ang pagtamod sang Biblia sa panahon sang mga Cristiano? Binagbinaga ang masunod nga teksto:

“Ginpabay-an sila sang Dios sa makahuluya nga mga kailigbon sa sekso, kay ang mga babayi sa ila nagbaylo sang paggamit sa ila kaugalingon suno sa kinaugali sa isa nga supak sa kinaugali; kag subong man bisan ang mga lalaki sa ila wala na maggamit suno sa kinaugali sa mga babayi kag masingkal nga nagdabdab sa ila kailigbon sa isa kag isa, lalaki sa lalaki, nga nagahimo sang malaw-ay nga buhat.”—Roma 1:26, 27.

Ngaa nagsiling ang Biblia nga supak sa kinaugali kag malaw-ay ang homoseksuwal nga mga buhat? Kay indi amo sini ang katuyuan sang aton Manunuga. Ang homoseksuwal nga buhat indi makahimo sing bata. Ginpaanggid sang Biblia ang homoseksuwalidad sa pagpakigsekso sang mga anghel, nga nangin demonyo, sa mga babayi antes sang Anaw sa panahon ni Noe. (Genesis 6:4; 19:4, 5; Judas 6, 7) Pareho ini nga ginatamod sang Dios nga indi normal.

May mga Rason Bala sa Pagpakamatarong Sini?

Puede bala silingon nga indi ini malain kay nangin homoseksuwal ang pila bangod napanubli ini, bangod sa impluwensia sang iban, ukon malain nga mga eksperiensia, subong sang seksuwal nga pag-abuso? Indi. Binagbinaga ini nga halimbawa: Suno sa mga sientipiko, mahimo nangin palahubog ang isa ka tawo, bangod napanubli niya ini, ukon mahimo nagdaku sia sa isa ka pamilya nga may mga palahubog. Mahimo maluoy sa iya ang kalabanan nga tawo. Pero, palig-unon mo na lang bala sia nga padayunon ang iya pagpahubog ukon indi na lang niya ini pagpakigbatuan kay natawo sia nga may amo sini nga huyog ukon nagdaku sia sa sini nga pamilya?

Sing kaanggid, wala ginapakalain sang Biblia ang mga nagapakigbato sa homoseksuwal  nga huyog, pero ginapakamalaut sini ang nagapadala sa ila mga huyog, napanubli man ini ukon sa iban pa nga rason. (Roma 7:21-25; 1 Corinto 9:27) Sa baylo, ang Biblia nagahatag sing praktikal nga bulig kag pagpalig-on para mabatuan ang homoseksuwalidad.

Ano ang Kabubut-on sang Dios sa mga May Homoseksuwal nga Huyog?

Ginapasalig kita sang Biblia nga kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Timoteo 2:4) Ginapakamalaut sang Dios ang homoseksuwal nga mga buhat, pero wala sini ginapalig-on nga maakig kita sa mga homoseksuwal.

Indi puede pakadiutayon ang pagtamod sang Dios sa homoseksuwalidad. Sa 1 Corinto 6:9, 10, ang Biblia maathag nga nagsiling nga ang “mga lalaki nga nagahulid sa mga lalaki” nalakip sa mga “indi makapanubli sang ginharian sang Dios.” Pero nagsiling man ang bersikulo 11: “Apang amo sina anay ang pila sa inyo. Apang ginhugasan na kamo, apang ginpakabalaan na kamo, apang ginpahayag na kamo nga matarong sa ngalan sang aton Ginuong Jesucristo kag sang espiritu sang aton Dios.”

Maathag nga ang mga gusto gid magsimba sa Dios suno sa iya kabubut-on ginbaton sa Cristiano nga kongregasyon sadto. Amo man sini karon sa tanan nga gusto magpahamuot sa Dios. Kinahanglan nila ipahisuno ang ila kabuhi sa Biblia, indi nga ang Biblia amo ang magpaayon sa ila.

NAMANGKOT KA BALA?

● Ano ang pagtamod sang Biblia sa homoseksuwal nga mga buhat?—Roma 1:26, 27.

● Ginadumtan bala sang Biblia ang mga tawo nga may homoseksuwal nga huyog?—1 Timoteo 2:4.

● Posible bala nga malikawan ang homoseksuwal nga mga buhat?—1 Corinto 6:9-11.

[Retrato sa pahina 29]

Dapat bala bag-uhon ang pagtamod sang Dios sa homoseksuwalidad?