Praktikal nga Mangin Bunayag

“Nanamitan ang tawo sa pagkaon nga nakuha niya sa pagpangdaya, pero sa ulihi mangin pareho ini sa balas sa iya baba.”—Hulubaton 20:17, Ang Pulong sang Dios, APD.

KINAHANGLAN gid bala nga magdinaya ka para magmadinalag-on sa negosyo? Indi. Ang matuod, makahalit ini sa imo. Ngaa? Bangod sa integridad. Kon may integridad ka, saligan ka. Kinahanglanon ini para sa imo dayon nga kaayuhan.

Importante ang Pagsalig

Kon kilala ka nga bunayag, makabulig ini para magmadinalag-on ka. Ang natabo kay Franz, nga ginsambit sang nagligad nga artikulo nagapamatuod sini. “Sang bag-o pa lang ko sa akon ginaubrahan,” siling niya, “wala ko kabalo nga gintestingan nila ang akon pagkabunayag kag integridad. Ulihi ko na lang nabal-an nga nakapasar ako. Gani, ginhatagan ako sing daku nga responsibilidad kag kahilwayan kag ginpadyaan ako sang mga tag-iya bangod bunayag ako. Nahibaluan ko nga madamo ang mas maayo kag mas maalam sangsa akon. Pero sa banta ko, magadugay ako sa akon trabaho kay ginasaligan ako sang akon mga amo.”

Likawi ang Indi Kinahanglanon nga Risgo

Si David, ang negosyante nga ginsambit sang nagligad nga artikulo, nagsiling: “Kon makita ko nga wala ginasunod sang iban ang mga pagsulundan para sa temporaryo nga bentaha, sa pensar ko, ‘Kon kaisa nagakaulihi ang listahan sang imo mga balayran, pero sigurado gid nga maabot ina.’ Buot silingon, kon indi ka bunayag, sigurado gid nga magkaproblema ka sa ulihi. Wala namon ginbaton ang kwestionable nga mga transaksion. Madamo sing kompanya nga naghimo sini ang nagkalaputo, kag ang pila ka empleyado gindemanda. Nalikawan ini sang amon kompanya.”

Sang nagpatindog si Ken sing rantsuhan sa bagatnan-sidlangan sang Aprika, puede niya tani hamhaman ang mga opisyal para mapadasig ang pag-import sang baka kag indi na sia magbayad sing buhis. Nagsiling sia: “Amo sini ang ginahimo sang madamo nga rantsuhan. Bangod bunayag kami, napulo pa ka tuig kag nabuksan ang amon rantsuhan. May bentaha bala ang amon ginhimo? Huo! Ang mga naghatag sing hamham padayon nga ginakilkilan sang kurakot nga mga opisyal.”

Pag-atubang sa mga Problema sa Ekonomiya

Kon ang negosyo daw maputo na, mahimo nga masulay ka gid nga magdinaya. Pero diri makita kon daw ano ka kabunayag.

Binagbinaga ang halimbawa ni Bill. Naputo ang ila negosyo nga konstruksion sang naghina ang baklanay sang mga balay sa Estados Unidos. Nagsiling sia: “Madamo sang amon dalagku nga mga kliyente ang naputo, kag wala nakabayad sa amon sing ginatos ka libo ka dolyar. Sang wala na kami sing tsansa nga makabangon, ginpalapitan ko ang amon kakompetensia kag ginpamangkot kon puede kami makaobra sa ila. Pagligad sang 48 oras, ginkuha nila ako kag ang kalabanan sang akon empleyado. Nagsiling sila nga kilala ako nga maayo magserbisyo kag bunayag.”

 Ang tanan nga eksperiensia nga ginsambit kaina, iya sang mga Saksi ni Jehova. Ginasunod nila ang pagsulundan sang Biblia sa ila negosyo, kag sa tanan nga bahin sang ila kabuhi. Subong sang nakita naton, sa baylo nga nangin disbentaha sa ila ang pagkabunayag, nakahatag ini sa ila sing praktikal nga mga benepisyo.

May mga tion nga daw makakuarta ka sing daku kon magdinaya ka. Pero, kuarta lang bala ang basihan sang kadalag-an?

[Blurb sa pahina 6]

Kon kilala ka nga bunayag, makabulig ini para magmadinalag-on ka

[Retrato sa pahina 7]

“Nagsiling sila nga kilala ako nga maayo magserbisyo kag bunayag.” —Bill, Estados Unidos