Puede Pa Ako Mangin Abyan sang Dios

Panugiron ni Olavi J. Mattila

“Nahunahuna mo na bala nga puede mo mahibaluan ang kamatuoran parte sa Manunuga?” Amo ini ang pamangkot sang isa ka Saksi ni Jehova sa akon nga ginpamensaran ko. Sadto nga tion, sobra na ako 80 anyos kag madamo na ako sing kilala nga prominente nga tawo kag bisan mga pulitiko. Pero sa akon edad, puede ko pa bala makilala ang Dios kag mangin abyan niya?

NATAWO ako sang Oktubre 1918, sa Hyvinkää, Finland. Bata pa ako, nagaobra na ako sa uma. Nagasagod ang amon pamilya sing mga baka, kabayo, manok, kag gansa. Natun-an ko nga mangabudlay kag mangin malipayon sa akon obra.

Samtang nagadaku ako, ginahambalan ako sang akon mga ginikanan nga maayo gid kon may ineskwelahan ako. Gani pagkatapos ko hayskul, naghalin ako sa balay para mag-eskwela sa kolehiyo. Nag-entra man ako sa mga sports, kag nakilala ko ang tsirman sang Finnish Athletic Association nga si Urho Kekkonen. Wala ko gid ginapaabot nga mangin primer ministro sang Finland si Mr. Kekkonen, kag sang ulihi mangin presidente sang pungsod sa sulod sang mga 30 ka tuig. Daku man ang iya impluwensia sa akon.

Prominente kag Impluwensiado

Sang 1939, nag-inaway ang Finland kag Unyon Sobyet. Pagka-Nobiembre sadto nga tuig, ginkuha ako para sa army. Sang primero, nangin trainer ako sang army reserve, kag dayon nangin kumander sang machine-gun platoon. Ang inaway ara sa Karelia, isa ka lugar sa dulunan sang Finland kag Unyon Sobyet. Sang tingadlaw sang 1941, sang nagapakig-away kami sa Vyborg, grabe ang akon pilas bangod sa mga shrapnel kag gindala ako sa ospital para sa mga militar. Bangod sa akon mga pilas, wala na ako nakaentra sa inaway.

Sang Septiembre 1944, nag-untat ako sa pagka-army kag nag-eskwela liwat sa kolehiyo. Nagpadayon man ako sa pag-entra sa sports. Tatlo ka beses ako nga nangin kampeon sa dalagan sa Finland, kaduha sa relay kag kaisa sa hurdle. Nakagradweyt man ako sa kurso parte sa teknolohiya kag ekonomiya.

Sadto nga tion, nangin kilala nga pulitiko si Urho Kekkonen. Sang nagaalagad sia subong primer ministro, ginhimo niya ako nga diplomat sa China sang 1952. Madamo ako sing nakilala nga opisyal sang gobierno didto, lakip na ang lider sang China sadto nga si Mao Tse-tung. Pero ang pinakaimportante nga nakilala ko sa China, amo si Annikki. Matahom sia nga dalaga nga nagaobra sa Finnish Ministry of Foreign Affairs. Nagpakasal kami sang Nobiembre 1956.

Pagkasunod nga tuig, ginsaylo ako sa embahada sang Finland sa Argentina. Didto natawo ang amon duha ka bata nga lalaki. Sang Enero 1960, nagbalik kami sa Finland. Diri natawo ang amon bata nga babayi.

 Ang Pinakamataas Ko nga Posisyon sa Gobierno

Wala gid ako nakaagi miembro sang isa ka partido, pero ginhimo ako ni Presidente Kekkonen nga ministro sang foreign trade sang Nobiembre 1963. Sa sulod sang 12 ka tuig, nauyatan ko ang anom ka posisyon sa gabinete, kaduha subong ministro sang foreign affairs. Sadto nga tion, nagapati gid ako nga ang mga problema naton masolbar sang paggahom sang tawo. Pero sang ulihi nakita ko kon daw ano kauhaw ang tawo sa gahom. Nakita ko mismo ang halit sang paghinisaay kag pagkadula sang pagsalig.—Manugwali 8:9.

Siempre, madamo man sing tawo nga sinsero sa pagbulig sa iban. Pero, may kakulangan gihapon bisan ang pinakamaayo pa nga lider.

Sang tingadlaw sang 1975, ang pangulo sang 35 ka estado nagkadto sa Helsinki para magtambong sa Conference on Security and Cooperation in Europe. Ministro ako sadto sang foreign affairs kag suod nga adviser ni Presidente Kekkonen. Ako ang nag-organisar sang komperensia, gani nakilala ko ang tanan nga pangulo sang mga pungsod nga nagtambong.

Sa sulod sang pila ka adlaw natilawan gid ang akon pagkadiplomatiko. Mabudlay bisan ang pag-organisar lang sang ila pungkuan. Pero sa pamatyag ko, ang komperensia kag ang nagsunod pa nga mga miting, nakabulig para kilalahon ang kinamatarong sang mga tawo kag nangin mas maayo ang relasyon sang gamhanan nga mga pungsod.

Ang Akon Espirituwal nga mga Kinahanglanon

Sang 1983, nagretiro ako kag nagsaylo sa akon bata nga babayi sa Pransia. Dayon, nag-abot ang trahedya. Sang Nobiembre 1994, nadiskobrehan nga may kanser sa suso si Annikki. Sadto man nga tuig, natontohan ako sang isa ka ilegal nga investment plan. Sa bilog ko nga kabuhi, ginpanikasugan ko gid nga makahimo sang isa ka maayo nga ngalan. Pero namantsahan ini bangod sa isa lang ka sala nga desisyon.

Kilala ko na ang mga Saksi ni Jehova halin pa sang una. Ginaapresyar ko man ang ila mga pagbisita kag ginabaton ang ila mga magasin. Pero wala gid ako sing tion para sa akon espirituwalidad. Sang 2000, ginaatipan ko si Annikki samtang ginapakigbatuan niya ang kanser. Sang Septiembre 2002, may nagbisita sa amon nga Saksi ni Jehova. Ginpamangkot niya ako sang ginsambit kaina sa umpisa sini nga artikulo. Namensar ako: ‘Puede gid man bala mahibaluan ang kamatuoran parte sa Dios? Posible bala nga mangin abyan niya?’ Ginkuha ko ang akon Biblia, nga ginayab-ukan na, kag regular nga nagpakig-istorya sa mga Saksi parte sa sini.

 Sang Hunyo 2004, napatay ang akon pinalangga nga asawa kag nagaisahanon na lang ako. Pero bangod sa akon mga kabataan, nangin malig-on ako. May mga pamangkot gihapon ako parte sa kon ano ang nagakatabo sa aton kon mapatay kita. Ginpamangkot ko ini sa duha ka Luterano nga pari. Simple lang ang ila sabat, “Mabudlay sabton ina nga mga pamangkot.” Indi ako kontento sa ila sabat. Mas gusto ko na gid mahibaluan ang parte sa espirituwal nga mga butang.

Samtang nagapadayon ako sa pagtuon sa Biblia sa mga Saksi, natun-an ko ang husto nga mga sabat sa akon mga pamangkot. Halimbawa, ginapaathag sang Biblia nga wala na sing hinalung-ong ang mga patay, nga daw nagakatulog lang sila, kag may paglaum sila nga mabuhi liwat sa duta. (Juan 11:25) Nakahatag ini sa akon sing paglaum kag lugpay.

Wala madugay, nabasa ko ang bilog nga Biblia. Ang isa ka teksto nga indi ko gid malipatan amo ang Miqueas 6:8, nga nagasiling: “Ano bala ang ginakinahanglan sa imo sang GINOO kondi ang paghimo sing matarung, kag ang paghigugma sang kalolo, kag ang paglakat sing mapainubuson upod sa imo Dios?” Nagdayaw gid ako sa sining maalamon kag simple nga teksto. Ginapakita man sini nga mahigugmaon gid kag makatarunganon si Jehova nga Dios.

Paglaum sa Palaabuton

Samtang ginatun-an ko ang kamatuoran parte sa Dios, mas nagbakod pa gid ang akon pagtuo kag pagsalig sa iya. Mas nagsuod ako sa akon Manunuga subong iya abyan! Natandog gid ako sa iya ginsiling sa Isaias 55:11: “Manginsubong sini ang akon polong nga nagagowa sa akon baba; indi magbalik ini sa akon sa wala sing pulus, kondi magatigayon ini sang akon nahamut-an, kag magauswag ini sa butang nga akon ginpadal-an sini.” Ginatuman gid sang Dios ang iya mga promisa, lakip na ang iya mga promisa sa palaabuton. Himuon niya ang wala matuman nga katuyuan sang gobierno sang tawo kag sang bisan ano nga komperensia sang mga pulitiko. Halimbawa, ang Salmo 46:9 (HPV) nagsiling: “Ginapauntat niya ang mga inaway sa bug-os nga kalibutan.”

Nakabulig gid sa akon ang pagtambong sa mga pagtilipon sang mga Saksi ni Jehova. Didto ko mismo nakita ang sinsero nga Cristianong gugma nga amo ang tanda sang matuod nga mga sumulunod ni Jesus. (Juan 13:35) Ini nga gugma mas labaw pa sangsa gugma sa pungsod kag indi gid makita sa mga pulitiko kag negosyante.

Ang Pinakaimportante nga Pribilehiyo

Sobra 90 anyos na ako subong, kag para sa akon, isa gid ka daku nga pribilehiyo nga mangin Saksi ni Jehova. Napun-an ang akon espirituwal nga kinahanglanon. May pribilehiyo ako nga mahibaluan ang katuyuan sang kabuhi kag ang kamatuoran parte sa Dios.

Nalipay man ako nga bisan tigulang na ako, makapakigbahin gihapon ako sa mga buluhaton sang mga Cristiano. Bisan pa nakilala ko ang madamo nga prominente nga tawo kag ginhatagan sing mabug-at nga mga responsibilidad, wala na sing mas labaw pa sa pribilehiyo nga makilala ang Manunuga, nga si Jehova nga Dios, kag mangin abyan niya. Nagapasalamat gid ako sa iya, kag gusto ko sia dayawon bangod nangin “masigkamanugpangabudlay” niya ako. (1 Corinto 3:9) Indi pa ulihi ang tanan, puede pa ako mangin abyan sang Manunuga nga si Jehova nga Dios!

[Retrato sa pahina 25]

Upod kanday Presidente Kekkonen kag Presidente Ford sang U.S. sa komperensia sa Helsinki sang 1975

[Retrato sa pahina 25]

Upod si Presidente Kekkonen kag si Brezhnev nga lider sang Sobyet

[Retrato sa pahina 26]

Pirme ako nagapakigbahin sa mga buluhaton sang mga Cristiano

[Picture Credit Lines sa pahina 25]

Lower left: Ensio Ilmonen/Lehtikuva; lower right: Esa Pyysalo/Lehtikuva