Pagbantay sa Kalibutan

“Sang wala pa sing mga kompyuter, daw imposible [para sa mga botaniko] nga matan-aw ang tanan nga reperensia antes mangalanan ang bag-o nga espesyi, gani nagadamo ang may pareho sing ngalan.” Nasapwan na karon nga sa sobra sa isa ka milyon nga ginlista nga ngalan, indi magkubos sa 477,601 ang magkapareho.—SCIENCE, U.S.A.

“Seis porsiento lang sang mga Intsik ang nagsiling nga malipayon sila.” Mga 39 porsiento sang mga ginsurbe ang nagapati nga “ang panguna nga ginahalinan sang kalipay” amo ang “manggad.”—CHINA DAILY, CHINA.

“Sang gin-usisa . . . ang rekord sang kadamuon sang krimen sa bilog nga Rusya, nakita nga ‘madamo ang indi matuod.’” Ang mga ahensia nga nagapatuman sing kasuguan manabat sa “paghinago sa matuod nga kadamuon sang krimen” kag pagpasobra sa ginreport nila nga nasolbar nga krimen.—RIA NOVOSTI, RUSYA.

“Isa sa tatlo ka estudyante sa unibersidad sa kapital sang Germany [nga Berlin] ang nagapati nga ang pagbaligya sang ila dungog [nga nagalakip sing prostitusyon kag pagsaot] isa ka paagi para may isuportar sila sa ila pag-eskwela.”—REUTERS NEWS SERVICE, GERMANY.

Pagpaguapa sang mga Manugbata

Naimpluwensiahan sang media ang paagi sang mga iloy sa pagpahibalo sang ila pagbata. Kon ang ila mga lola sadto nagapadala sing mga telegrama, “ang mga iloy sa karon nagapahibalo sang maayo nga balita paagi sa Internet,” siling sang isa ka tsanel sa TV sa Amerika nga ABC. Naga-post sila sang ila piktyur upod sa ila lapsag pagkatapos nila bata. Gani, ang bag-o nga henerasyon sang mga babayi, nga tama gid ka partikular sa ila hitsura, nagapaguapa antes sila magbata. Nagapa-facial sila, nagapa-manicure, kag nagapa-pedicure. “Ang iban gani nagaupod pa sing manugkopyur kon magkadto sila sa ospital,” siling sang report. Ngaa? Para guapa sila kon magbata, paathag ni Toni Golen, direktor sang labor kag delivery sang Beth Israel Deaconess Medical Center sa Boston.

Mangin Aktibo, Mangin Mapagros

Ang madugay nga pagpungko sa ulubrahan, eskwelahan, ukon sa atubangan sang TV mahimo bangdan sang balatian, siling sang mga researcher. “Kon nagapungko ka, hinali nga naganubo ang pagpanghikot sang enzyme nga nagakuha kag nagatunaw sang tambok sa dugo,” siling sang Vancouver Sun. Suno sa sini nga pamantalaan, para mangin mapagros kita, “kinahanglan naton indi lang ang nagapalagumba sang dughan” nga ehersisyo. “Kinahanglan naton ang regular, sigesige nga mga aktibidades para mag-andar ang aton metabolismo.”