● Madamo nga tinuga sa dagat ang nagasiga. Isa sa sini ang clusterwink snail, pero pinasahi ang pagsiga sini. Kon daw kaunon na ini sang kasag, nagapanago ini sa iya balay kag nagaigpat-igpat. Makulbaan sa sini ang kasag kag mapalagyo. Pero paano makalapos ang kasanag sa balay ukon shell sang snail?

Binagbinaga: Ang kasanag sang clusterwink snail wala ginatabunan sang iya balay kundi nagalapos ini kag nagalapta. Sanday Dimitri Deheyn kag Nerida Wilson, mga sientipiko sa Scripps Institution of Oceanography sa San Diego, California, U.S.A., nakatukib nga ang kasanag sang snail palareho sa bug-os nga balay sini, kag napulo ka pilo ini nga mas maayo magpalapta sang kasanag kon ikomparar sa ginabaligya nga diffuser nga pareho ang kadamulon (0.5 mm). Ang ikasarang sang shell sa pagpasanag sa palibot sini mas maayo man sing walo ka pilo sangsa diffuser nga ginhimo sang tawo. Sing talalupangdon, ang pinasahi nga ikasarang sini sa pagpalapta sang kasanag indi mahimo sang iban nga shell sa dagat. Katingalahan man nga amo ini nga kasanag ang makalakbay sing pinakamalayo sa tubig sang dagat.

Si Dr. Deheyn nagsiling nga ang pagtuon sa clusterwink snail “mahimo makabulig sa pag-imbento sang mga materyales nga makapalapta sang kasanag.” Ini nga research mapuslanon man sa biophotonics, nga nagagamit sing kasanag para sa pag-eksamin kag pagbulong. Kag karon nga light-emitting diode (LED) na ang ginagamit, ang pag-imbento sing mga diffuser nga makapabaskog pa gid sang gamay lang nga kasanag makabulig gid sa pagkinot sing enerhiya.

Ano sa banta mo? Ang balay bala sang clusterwink snail nagluntad paagi sa ebolusyon? Ukon gindesinyo ini?

[Retrato sa pahina 18]

Ang shell sa normal nga kasanag

[Retrato sa pahina 18]

Ang shell kon nagasiga

[Picture Credit Lines sa pahina 18]

Left: www.robastra.com; center and right: Courtesy of Dr. D. Deheyn, Scripps Institution of Oceanography, UC San Diego