EURO 2012—Ginakalangkagan Gid nga Okasyon

NANAMIAN ka bala maglantaw ukon maghampang sing soccer? Kon huo, mahimo nahibaluan mo ang parte sa UEFA (Union of European Football Associations) EURO 2012, nga masugod sa Hunyo 8 sa Warsaw, Poland kag matapos sa Hulyo 1, sa Kiev, Ukraine. Ano ang EURO 2012, kag ano nga mga preparasyon ang ginahimo para sa sini? Ngaa ginakalangkagan gid ini?

“Magkaupod sa Paghimo sing Kasaysayan”

Ang European football (soccer) championship ginahiwat sa Europa kada apat ka tuig sugod sang 1960. Lakip sa mga pungsod nga ginhiwatan sini ang Austria, Belgium, England, Espanya, Germany, Italya, Netherlands, Pransia, Portugal, Sweden, Switzerland, kag Yugoslavia.

Subong nga tuig, ang final tournament hiwaton sa Poland kag Ukraine. Sa Poland, hiwaton ini sa mga siudad sang Gdańsk, Poznan, Warsaw, kag Wroclaw. Sa Ukraine naman, hiwaton ini sa Donetsk, Kharkiv, Kiev, kag L’viv.

Suno sa UEFA, “amo ini ang ikatlo nga tion nga ang final tournament hiwaton sa duha ka pungsod (sa Belgium/Netherlands sang 2000  [kag] sa Austria/Switzerland sang 2008).” Pero ang EURO 2012 ginakalangkagan gid. Ngaa? Ang final tournament subong nga tuig indi lamang ang ulihi nga pag-updanay sang duha ka pungsod kag mga nag-organisar sini, kundi amo man ini ang una nga bes nga hiwaton ini sa Central kag Eastern Europe. Gani ang slogan nga napili para subong nga tuig amo ang “Magkaupod sa Paghimo sing Kasaysayan.”

Mga Preparasyon

Siempre, ang isa sa importante nga preparasyon sa bisan ano nga hampang amo ang pagpangita sing nagakaigo nga pasilidad. Bangod sini, gin-renovate sang siudad sang Poznan kag Kharkiv ang ila mga istadyum, kag bag-o tanan ang istadyum nga hiwatan sa anom pa ka siudad. Mga 358,000 ka tumalan-aw ang makaigo sa sini nga mga pasilidad.

Bangod madamo nga tawo ang ginapaabot, ginhandaan gid sang mga siudad ang kasiguruhan sang mga tumalan-aw. Linibo ka security staff ang ginhanas para sa sini nga okasyon. Suno sa Science & Scholarship in Poland, nalakip sa ila paghanas ang “pagpraktis sang mga taktika para sa kasiguruhan sang 140 ka hampang upod ang . . . crowd control, paghimo sang mga safety zone kag pagkooperar sa mga security team sang iban nga pungsod.”

Ngaa ginahandaan gid nila ini? Una, nahibaluan sang mga awtoridad nga mahimo atakehon sang mga terorista ining dalagku nga mga hampang. Nahibaluan man nila nga ang masingki nga mga tumalan-aw mahimo magsakitanay, pareho sang natabo nga mga kinagamo sang una.

Mangin Balanse

Pero madamo ang daw nasobrahan ang interes sa sports. “Nasubuan ako kag nagakaapektuhan gid kon mapierde ang akon [soccer] team,” siling sang isa ka fans. “Kon may matabo man gid nga giyera nuklear, ang una ko nga kabalak-an nga basi indi madayon ang masunod nga hampang sang soccer.”

Ang balanse nga pagtamod sa kalingawan makit-an sa libro sang kaalam—ang Biblia. Ginapakita sini nga kinahanglan man naton ang maayo nga kalingawan sa kabuhi. Nagsiling ini nga may “tion sa pagkadlaw . . . kag tion sa pagsaut.” (Manugwali 3:1-4) Pero nagsiling man ang Biblia nga dapat kita maghaganhagan sa sini. (1 Timoteo 3:2, 11) Gani, kon nagadesisyon kon ano ang dapat naton unahon, maayo gid kon sundon naton ang laygay sang Biblia nga ‘pat-uron ang mas importante nga mga butang.’—Filipos 1:10.

[Kahon/Retrato sa pahina 25]

WALA SING SIGARILYO SA EURO 2012

Sang Oktubre 20, 2011, ginpahibalo sang UEFA nga “ipatuman nila ang bug-os nga pagdumili sa paggamit, pagbaligya, kag pagpasayod sing sigarilyo sa tanan nga istadyum nga hiwatan sang UEFA EURO 2012.” Ano ang rason? “Kay man ang EURO 2012 parte sa pagrespeto sa ikaayong lawas sang mga tumalan-aw kag sa tanan nga nagapakigbahin sa hampang,” siling ni Michel Platini, presidente sang UEFA. Ang isa sa nagasuportar sa sini nga pagdumili amo ang European Commissioner nga si Androulla Vassiliou. Ginapangabay niya ang mga siudad nga hiwatan nga ipatuman ini nga pagdumili sa iban pa nga mga lugar subong sang mga restawran kag publiko nga mga transportasyon. “Ang football kag sports parte sa ikaayong lawas kag pagpauswag sang ikasarang,” siling ni Vassiliou, “kag ang sigarilyo amo ang kabaliskaran sini: indi ini puede upuron.”

[Mapa sa pahina 24]

(Para sa aktual nga pormat, tan-awa ang publikasyon)

POLAND

WARSAW

Gdańsk

Poznan

Wroclaw

UKRAINE

KIEV

L’viv

Kharkiv

Donetsk

[Retrato sa pahina 24]

Ang katapusan nga hampang sang Germany kag Espanya sa EURO 2008, sa Ernst Happel Stadium sa Vienna, Austria

[Retrato sa pahina 25]

Ang Olympic Stadium sa Kiev, Ukraine

[Picture Credit Line sa pahina 25]

Pages 24 and 25, both photos: Getty Images