Halin sa Amon mga Bumalasa

Pag-atipan sa mga May Malala nga Balatian (Hulyo 2011) Subong isa ka social welfare assistant, ginhanas ako sa pag-atipan sa mga may malala nga balatian, kag napamatud-an ko nga ang ginsiling sa Hulyo 2011 nga Magmata! husto gid. Kinahanglan gid naton subong ang mga pasilidad nga nagaatipan sa mga may malala nga balatian. Ginakalangkagan ko gid ang paggahom sang Dios, diin wala na sing magasiling, “Nagamasakit ako,” kag pahiran sang Dios ang mga luha sa aton mga mata.—Isaias 33:24; Bugna 21:3, 4.

M. R., Italya

Kamusta ang Imo Thyroid? (Mayo 2009) Salamat gid sa sini nga artikulo. Sadto ko pa nabatyagan nga may diperensia ang akon thyroid, pero ginpabay-an ko lang. Sang mabasa ko ini nga artikulo, nagpatan-aw ako sa isa ka espesyalista kag nadiskobrehan nga may Grave’s disease ako. Maayo lang kay indi pa ini malala. Madamo gid nga salamat.

T. K., Japan

Ang Libro nga Imo Masaligan—Bahin 1-7 (Nobiembre 2010–Mayo 2011) Salamat sa sining na-research gid kag nasulat sing maayo nga serye nga may pito ka bahin parte sa mga kagamhanan sa kalibutan nga ginsambit sa Biblia. Mas maayo pa gid kuntani kon matingob ini nga mga artikulo sa isa ka brosyur. Ini nga mga artikulo parte sa kasaysayan makabulig para ihatag ang nagakaigo nga pagdayaw sa Awtor sang mga tagna sa Biblia, nga amo si Jehova.

G. H., Estados Unidos

Pamangkot sang mga Pamatan-on . . . Ano ang Dapat Ko Mahibaluan sa Pagkomunikar Paagi sa Internet? (Hulyo 2011) Salamat sa sining artikulo. Beinte-seis anyos ako subong. Nagaplano ako nga maghimo sing account sa [social network], indi bangod gusto ko magdamo ang akon abyan, kundi bangod madamo ang nagasiling nga himuon ko ini. Daku gid ang nabulig sa akon sini nga artikulo. Puede ka makapakig-abyan bisan pa wala ka sing account sa isa ka social network.

M. P., Pilipinas

Abi ko pakalainon sini nga artikulo ang social networking. Pero balanse ini. Ginbinagbinag sini ang positibo kag negatibo nga bahin kag naghatag sing laygay kon paano naton maproteksionan ang aton kaugalingon sa mga katalagman sa social network. Nagpahanumdom gid ini sa akon nga dapat mag-andam sa pag-post sang personal nga mga impormasyon sa Internet.

C. W., Estados Unidos

Mga Sekreto sang Madinalag-on nga Pamilya (Oktubre 2009) Daku gid ang nabulig sining espesyal nga gua sa amon pamilya. Nanamian gid ako sa mga kahon nga “Tilawi ini” nga nalakip sa pito ka sekreto. Gin-aplikar na sang amon pamilya ang mga panugda diri.

H. H., Korea

Para Binagbinagon sang Pamilya Madamo gid nga salamat sa sining regular nga artikulo. Ang amon seis anyos nga bata nga babayi nanamian gid sang Mga Piktyur nga Pangitaon sang Kabataan kag labi na sa pagkolor sang mga piktyur. Ginapadaku sini nga artikulo ang papel sang mga ginikanan sa paghanas sa ila kabataan samtang bata pa. Mapuslanon gid ang inyo ginahimo para sa mga kabataan.

M. P., Poland