Maghalong sa Imo Ginakaon

“Eskwelahan sa Germany Ginpasira Bangod sa E. Coli.”—REUTERS NEWS SERVICE, GERMANY.

“Salmonella sa Lima ka Estado Naghalin sa Tawge.”—USA TODAY.

“Karne sang 6 ka Baka nga Nakahalab sang Dagami nga may Radyason Nakalab-ot sa 9 ka Lugar.”—THE MAINICHI DAILY NEWS, JAPAN.

INI nga mga headline ginbalita sa sulod sang duha ka semana sang nagligad nga tuig. Ginabulubanta sang mga researcher nga kada tuig mga 30 porsiento sang pumuluyo sa manggaranon nga mga pungsod ang nagabalatian bangod sa pagkaon.

Ano ang reaksion mo sa sini nga mga report? “Nabalaka ako kag naakig pa gani,” siling sang amay nga si Hoi nga taga-Hong Kong. “May duha ako ka bata kag nabalaka ako sa ila mga ginakaon.”

Sa imol nga mga pungsod, minilyon ang nagakapatay kada tuig—kalabanan mga bata—bangod sa balatian nga halin sa pagkaon kag tubig. “Sa mga merkado diri, ang mga pagkaon ginalangawan, ginaulanan, kag ginayab-ukan,” siling ni Bola nga taga-Nigeria. “Kon may mabalitaan ako ukon mabasa parte sa mga balatian halin sa pagkaon, nakulbaan ako. Gusto ko proteksionan ang akon pamilya.”

Paano malikawan sang imo pamilya ang delikado nga mga pagkaon? Ang Canadian Food Inspection Agency nagsiling: “Kon may delikado nga mga pagkaon sa mga grocery store, ginabalita gid ini. Kag dapat lang. Pero ang aton paagi sa paghanda sang pagkaon mahimo man bangdan sang balatian.”

Paano malikawan sang imo pamilya ang mga balatian halin sa pagkaon? Binagbinagon naton ang apat ka paagi kon paano kita makahalong.

[Kahon sa pahina 3]

SIN-O ANG YARA SA KATALAGMAN?

Mas madali mahalitan sang balatian halin sa pagkaon ang mga masunod:

● Bata nga wala pa maglima ka tuig

● Nagabusong

● Setentahon na ang edad

● May maluya nga immune system

Kon ikaw ukon ang isa sa imo mga upod amo sini, maghalong gid sa pagkaon nga imo ginahanda, ginaserbe, kag ginakaon.

[Credit Line]

Source: New South Wales Food Authority, Australia.