MADUGAY na nga nagapati ang mga tawo nga ang mga patay makagiya sa mga buhi. Ang isa ka halimbawa sini makita sa ginsulat sang Griego nga mamalaybay nga si Homer parte kay Odysseus, nga gintawag man Ulysses. Gusto gid ni Odysseus nga mahibaluan kon paano makapauli sa isla sang Ithaca, gani nagkadto sia sa pihak nga kalibutan agod mamangkot sa patay nga manugpakot.

Madamo karon ang nagakadto sa mga espiritista, nagatulog sa mga lulubngan sang ila mga katigulangan, ukon nagahimo sing espiritistiko nga mga ritwal agod mamangkot sa mga patay. Pero, magiyahan gid man bala kita sang mga patay?

Lapnag nga Buhat

Ginatudlo sang panguna nga mga relihion sa kalibutan nga posible ang pagkomunikar sa mga patay. Ang Encyclopedia of Religion nagsiling nga ang “necromancy, ang pagpakig-angot sa kalag sang mga napatay, isa ka sahi sang espiritismo.” Nagsiling pa gid ini nga “lapnag gid” ini nga buhat. Ginpamatud-an man ini sang New Catholic Encyclopedia sa pagsiling nga ang “nanuhaytuhay nga sahi sang necromancy lapnag sa bilog nga kalibutan.” Amo nga indi katingalahan nga ang pila ka debotado sa madamo nga relihion nagatinguha nga makakuha sing impormasyon gikan sa kalibutan sang mga espiritu!

Bisan pa ang pagpakig-angot sa mga patay “ginapakamalaut gid sang Simbahan,” siling sang New Catholic Encyclopedia, “madamo ang ebidensia nga ginhimo ini sang panahon sang Middle Ages kag sang Renaissance.” Ano ang ginasiling sang Biblia parte sa sini?

Dapat Ka Bala Magpamangkot sa Patay?

Ginsugo ni Jehova nga Dios ang iya katawhan sang una: “Manginwalay makita sa imo nga bisan sin-ong . . . manugpamangkot sa mga napatay.” (Deuteronomio 18:9-13) Ngaa gindumili ini ni Jehova? Kon posible man gid makig-istorya ang mga buhi sa mga patay, indi bala nga mahigugmaon kuntani sa bahin sang Dios nga tugutan niya ini? Pero ang matuod, imposible ini matabo. Ngaa?

Sulitsulit nga ginatudlo sang Kasulatan nga ang mga patay wala sing animo. Binagbinaga ang ginasiling sang Manugwali 9:5: “Ang buhi nakahibalo nga mapatay sila, apang ang patay wala makahibalo sang bisan ano.” Ang Salmo 146:3, 4 nagasiling: “Dili kamo magsalig sa mga principe, ukon sa anak sang tawo, nga sa iya wala sing bulig. Kon maggowa ang iya ginhawa nagabalik sia sa iya duta; sa amo nga adlaw nagakawala ang iya mga hunahuna.” Si propeta Isaias nagsiling man nga ang mga patay ‘wala na sing gahom.’—Isaias 26:14, NW.

Pero, madamo nga tawo ang nagasiling nga naistorya kuno nila ang ila patay nga mga hinigugma paagi sa mga espiritista. Masami naton mabatian ini nga mga eksperiensia amo nga maathag nga madamo man gid ang nakapakig-istorya sa isa nga halin sa kalibutan sang mga espiritu. Pero, ginapakita sang mga bersikulo nga ginsambit sa ibabaw nga indi mga patay ang ila naistorya. Kon amo, sin-o?

Sin-o Gid ang Ila Ginaistorya?

Suno sa Biblia, may espiritu nga mga anak sang Dios nga nagrebelde sa ila Manunuga  kag nangin mga demonyo. (Genesis 6:1-5; Judas 6, 7) Ginapalapnag nila ang pagpati nga ang mga tawo padayon nga nagakabuhi sa tapos sang kamatayon. Agod madamo ang ila matontohan, nagapakunokuno sila nga sila ang napatay gikan sa duog sang espiritu nga nagapakig-istorya sa mga buhi.

Ginasugid sang Biblia nga sang ginbiyaan ni Jehova si Hari Saul sang Israel bangod sa iya pagkadimatinumanon, nagtinguha si Saul nga makig-istorya sa patay na nga si propeta Samuel paagi sa isa ka espiritista. Nakabaton sing mensahe si Saul gikan sa duog sang mga espiritu. Pero indi halin kay Samuel kay sang buhi pa si Samuel, indi na niya gusto makigkita sa hari, kag ginapamatukan niya ang mga espiritista. Ang matuod, ang naistorya ni Saul isa ka demonyo nga nagapakunokuno nga si Samuel.—1 Samuel 28:3-20.

Ang mga demonyo kaaway sang Dios kag delikado nga makig-istorya sa ila. Bangod sini, ang Kasulatan nagsugo: “Dili kamo magliso sa manugpagowa sang mga espiritu [“mga espiritista,” NW] ukon sa mga manugpakot; dili kamo magpangita sa ila, sa pagpadagta paagi sa ila.” (Levitico 19:31) Ang bisan sin-o nga ‘nagapamangkot sa mga napatay,’ paandam sang Deuteronomio 18:11, 12, “kangil-aran sa GINOO.” Ang isa sa mga rason kon ngaa ginpatay ni Jehova si Hari Saul amo nga “nagpamangkot man sia sa isa ka espiritista.”—1 Cronica 10:13, 14, NW.

Kon amo, diin ka mangayo sing laygay kon may mabudlay ka nga mga pamangkot ukon desisyon nga pagahimuon? Ang Kasulatan nagasiling nga si Jehova nga Dios amo ang aton “manunudlo.” Kon ikaw kag ang imo mga hinigugma mag-usisa sa iya Pulong, ang Biblia, kag magtuman sa ginatudlo sini, daw pareho lang nga “ang imo mga idulungug magapamati sang polong sa likod nimo, nga nagasiling, ‘Ini amo ang dalan, lakat kamo sa sini.’” (Isaias 30:20, 21) Wala kita sing mabatian nga literal nga tingog gikan sa matuod nga Dios subong, pero magiyahan niya kita paagi sa Biblia. Huo, daw pareho lang nga si Jehova mismo ang nagahambal sa imo: ‘Ako ang magagiya sa imo.’

NAMANGKOT KA BALA?

● Paano ginatamod sang Dios ang pagpakig-istorya sa mga patay?—Deuteronomio 18:9-13.

● Makahatag bala sing impormasyon ang mga patay sa mga buhi? Ngaa amo sina ang imo sabat?—Manugwali 9:5.

● Diin kita makakuha sing masaligan nga giya?—Isaias 30:20, 21.