Kasingki Nagaapektar sa Aton Tanan

 SIN-O ang wala nagakaapektuhan sang kasingki? Pirme naton ini makita sa mga balita. Ginakulbaan kita basi mangin biktima kita sini sa dalan kag sa trabaho, kag nagakatabo man ini sa mga kabataan sa eskwelahan. Bisan sa ila balay, nga ang mga tawo magabatyag kuntani sing seguridad, minilyon—ilabi na ang mga babayi—ang ginakulbaan. Ang matuod, sa pila ka pungsod, asta sa 70 porsiento sang mga babayi ang nagreport nga ginsakit sila sang ila bana ukon ka-live-in.

Sa madamo nga pungsod, ginakahadlukan sang mga tawo ang kinagamo sa pulitika ukon terorismo. Bangod sa sini nga kahadlok, nagadamo ang mga surveillance camera ilabi na sa mga pungsod nga pirme ginaatake sang mga terorista.

Gani, nangin mabakal ang mga surveillance camera bisan pa nagasarurot ang ekonomiya. Sin-o ang nagabayad sa sini? Tanan kita, paagi sa aton mga buhis kag iban pa nga balayran. Kag mahimo nga magadaku pa ini samtang labi nga nagalapnag kag nagamahal ang mga pamaagi para matigayon ang seguridad.

Ang makahaladlok nga epekto sang kasingki dapat magpahunahuna sa aton parte sa aton mga paggawi, prinsipio, kag mga ginapatihan. Binagbinagon sang masunod nga artikulo ini nga mga pamangkot: Ano ang papel sang media sa paglapnag sang kasingki? Ano ang makaimpluwensia sa aton pagtamod sa kasingki? Paano naton maproteksionan ang aton kaugalingon sa sining malain nga mga impluwensia?