Nanamian Gid Ako sa Kasingki

Panugiron ni Salvador Garza

SANG bata pa ako, nanamian gid ako sang gamo kag ginapanapungol ko ang tanan nga nagapaakig sa akon. Natalupangdan ini sang isa ka boksingero sa amon lugar, gani gintudluan niya ako magboksing. Sang ulihi, nagalakbay na ako sa bilog nga Estados Unidos subong isa ka propesyonal nga boksingero. Sang ulihi, nangin bodyguard ako sang isa ka gangster.

Bisan pa may asawa na ako kag anom ka kabataan, nanamian gihapon ako sa kasingki. Sa sini nga tion, may ginapadalagan ako nga isa ka nightclub. Pila ka beses nga may gusto magpatay sa akon, kag nanamian gid ako sa sini. Isa ka bes, ginluthang ko ang duha ka lalaki samtang nagaaway kami, kag grabe gid ang ila pilas. Ginplanuhan pa gani namon sang pila ko ka abyan nga kidnapon ang isa ka kilala nga pulitiko. Pero nadiskobrehan sang mga pulis ang amon plano kag gin-aresto ako. Sang ulihi, sang nakita sang mga pulis ang iban ko nga upod, nagtiniruhay sila kag napatay ang tanan ko nga amigo. Maayo lang kay ara na ako sa prisuhan sina nga tion.

Pagligad sang mga tinuig, nakagua ako kag nakakita sing obra. Isa ka adlaw, sang nagapauli ako, gulpi lang nagsakit ang akon ulo kag indi ko gid ini maagwanta. Naglalain gid ako amo nga nangamuyo ako. Ang akon asawa nga si Dolores nagatuon sing Biblia upod sa mga Saksi ni Jehova. Nagsiling sia nga ang ngalan sang Dios amo si Jehova. (Salmo 83:18) Gani, sa iya ako nangamuyo.

Pag-ayo ko, ginhagad ako ni Dolores nga mag-upod sa pagtilipon sang mga Saksi ni Jehova sa ila Kingdom Hall. Nagtulo gid ang akon luha sa kaayo kag interes nga ginpakita sang mga Saksi sa akon. Gani, nagtuon man ako sing Biblia kag nagbag-o ang akon pagtamod sa kabuhi. Nanamian gid ako sa akon natun-an.

Pero indi mahapos para sa akon nga kontrolon ang akon kaakig. Halimbawa, sang isa ka bes nga nagapamalaybalay kami sang akon abyan nga si Antonio, ginyaoyao kami sang isa ka tawo. Naakig gid ako gani ginhanaan ko sia nga sumbagon. Maayo lang kay ginpunggan ako ni Antonio. Mapinasensiahon nga ginpahanumdom niya sa akon kon paano ginbatas ni Jesus ang mga pagyaguta kag pag-insulto. Si apostol Pedro nga nakaupod ni Jesus, nagsulat: “Sang gintamay sia, wala sia magbalos sang pagtamay.” (1 Pedro 2:23) Daku gid ang epekto sini sa akon.

Kon balikan ko ang akon pagbag-o sa sulod sang mga tinuig, ginapasalamatan ko gid si Jehova sa iya balaan nga espiritu. Nakabulig ini sa akon nga mapakita ang pagpugong sa kaugalingon kag mangin mahidaiton. (Galacia 5:22, 23) Ang akon pamilya nahiusa kag malipayon, kag mahidaiton na ang amon pagkabuhi. May pribilehiyo man ako nga maghatag sing daku nga tion sa pagwali, kag pagbulig sa iban nga matun-an ang paghidait sang Dios.

[Retrato sa pahina 9]

Ang pagtuon sing Biblia nakabulig kay Salvador nga masapwan ang paghidait