Nanamian sa Kasingki

ANG kalibutan subong nanamian gid sa kasingki. Pirme ini makita sa mga kalingawan. Pero, “sining karon lang,” suno sa Media Awareness Network, “may nagbag-o sa kasingki sa media. Una, nagdamo pa gid ini.” Isa pa, nangin “mas maathag ini, mas bastos, kag mas mapintas.” Binagbinaga ang masunod.

Musika: Ang mga kanta nga nagapadaku sang kapintas “nangin kinaandan na nga bahin sang industriya sang musika,” siling sang nasambit nga artikulo. Ang iban nga mga kanta may binastos nga mga liriko kag nagapadungog sa pagpatay kag pagpanglugos, pati sa mga asawa kag mga iloy.

Video Game: “Dapat gid kita mabalaka, kay grabe gid ang ginapakita nga pagpaagay sang dugo sa mga video game,” siling sang isa ka magasin nga parte sa video game sa Britanya.  Nagdugang pa ini: “Puede isiling nga ang mga nanamian gid sa video game, nanamian man sa kasingki.” Halimbawa, may isa ka uso nga video game nga kinahanglan kastiguhon ang mga babayi paagi sa bat sang baseball asta mapatay. Ang pila ka awtoridad nagapati nga ang mga video game mahimo may mas malain nga epekto sa mga bata sangsa TV, bangod sila mismo ang nagakontrol sa nagakatabo.

Pelikula: Ginapakita sang mga pagtuon nga ang kapintas, sex, kag mga pamuyayaw labi nga nagdamo sa mga pelikula, kag indi na masaligan ang mga rating. Dugang pa, indi lang “mga traidor” ang mapintas. Halos katunga sang pagpamintas sa mga palaguaon sa TV, pelikula, ukon music video ginahimo sang “mga bida,” suno sa isa ka pagtuon.

Balita: “Mas madugo, mas mabakal.” Amo ini ang prinsipio sang mga prodyuser sang mga balita sa TV. Ang balita isa ka daku nga negosyo, kag ang mga reporter nakahibalo nga mas madamo ang nagatan-aw sang masingki nga balita. Kon madamo ang nagatan-aw, nagadamo man ang pasayod, kag amo ini ang nagabuhi sa industriya sang TV sa madamo nga pungsod.

Internet: Ang matuod kag himuhimo lang nga mga laragway sang pagpaantos, pagpang-chopchop sang lawas, pagpamilas, kag pagpamatay, makita sa Internet. Madamo nga kabataan ang nagabukas sini nga mga site.

Maimpluwensiahan Ka Bala sang Kasingki sa Media?

May epekto bala sa mga tawo ang kasingki sa telebisyon, pelikula, libro, musika, kag iban pa nga porma sang kalingawan? Ang mga nagaganar bangod sa kasingki sa media nagasiling nga indi makahalalit ang ila produkto. Pero binagbinaga ini: Para maimpluwensiahan ang panghunahuna sang mga tawo, ang mga negosyo nagagasto sing binilyon para sa mga pasayod nga ang kada isa nagalawig lang sing mga 30 segundos. Gani, makasiling bala kita nga ang 90 minutos nga pelikula, nga ang mga bida mahimo nga imoral kag bayolente wala sing epekto, ilabi na sa mga bata?

Mas kilala kita sang aton Manunuga nga si Jehova nga Dios. Ano ang ginsiling niya parte sa pagpakig-upod sa bayolente nga mga tawo—lakip ang mga nagalingaw sa aton paagi sa media? Binagbinaga ang masunod nga mga bersikulo sa Biblia:

● “Ang Ginuo nagausisa sang mga matarong kag mga malaut. Ginakaugtan niya ang mga nabuyo sa kapintas.”—Salmo 11:5, Biblia sang Katilingban sang mga Kristiano, BKK.

● “Dili ka makig-abyan sa tawong maakigon, kag dili ka magbuylog sa tawong masingkal, basi nga makatoon ka sang iya mga dalanon kag magbutang sing siod sa imo kalag.”—Hulubaton 22:24, 25.

Siempre, indi gid naton malikawan sing bug-os ang malain nga mga impluwensia. Pero mapili naton ang aton kalingawan kag ang aton mga kaupdanan. Gani pamangkuta ang imo kaugalingon, ‘Ano nga klase sang tawo luyag ko mangin amo ako?’ Dayon, makig-upod sa amo sina nga klase sang mga tawo, nga may mga prinsipio kag tulumuron pareho sa imo.—Hulubaton 13:20.

Magluwas sa aton mga kaupdanan kag kalingawan, may iban pa nga butang nga mahimo mag-impluwensia sa aton pagtamod sa kasingki. Ano ini?

[Retrato sa pahina 5]

Ang aton ginapili nga kalingawan mahimo may impluwensia sa aton pagtamod sa kasingki