Pamangkot sang mga Pamatan-on
Sin-o ang Akon mga Role Model?
Sa sini nga artikulo, matun-an mo kon
NGAA kinahanglan mo sang mga role model
DIIN mo sila makita
PAANO mo mailog ang ila halimbawa
NGAA KINAHANGLAN MO SILA
ANG MATUOD: May posibilidad nga magpareho ka sa tawo nga imo nanamian. Mangin maayo ka ukon malain—depende kon sin-o ang imo nanamian.
Ang kinahanglan mo: Mga role model nga maayo gid ilugon.—Filipos 3:17.
Ang problema: Gusto ilugon sang madamo nga tawo ang bantog nga mga singer, mga player sa sports, kag mga artista, bisan pa indi maayo ang ila reputasyon.
Binagbinaga ini: Ginpaanggid sang Biblia ang personalidad sa panapton. (Colosas 3:9, 10) Kon magbakal ka sing bayo, mapati ka bala sa suhestyon sang nagasaramihay nga saleslady? Kon amo, ngaa magpadikta ka sa isa ka artista nga may malain nga reputasyon kon parte sa imo pagkatawo? Imbes nga himuon ini ukon magsunod lang sa madamo, ang pagpili sang maayo nga mga role model makabulig sa imo nga (1) makapili sang mga batasan nga gusto mo ilugon kag (2) mailog ang mga tawo nga may amo sini nga mga batasan.
DIIN MO SILA MAKITA
Markahi ang masunod kon husto ukon sala.
1. Ang role model dapat nakilala mo gid sa personal.
□Husto □Sala
2. Ang role model dapat perpekto.
□Husto □Sala
3. Puede nga madamo ang imo role model.
□Husto □Sala
Mga sabat
1. Sala. Puede ka gani makapili sing role model nga sadto pa nagkabuhi. Ang pila sa ila mabasa sa Biblia. Halimbawa, kon basahon mo ang kapitulo 11 sang tulun-an sang Hebreo sa Biblia, makita mo nga ginsambit ni Pablo ang 16 ka ngalan sang matutom gid nga mga lalaki kag mga babayi. Sa masunod nga kapitulo, ginpabakod ni Pablo ang mga Cristiano nga ‘magtulok sing maayo’ kay Jesus kag ilugon sia. (Hebreo 12:2) Si Jesus ang aton pinakamaayo nga role model.—Juan 13:15. *
2. Sala. Magluwas kay Jesus, wala na sing perpekto sa kaliwatan ni Adan. (Roma 3:23) Bisan pa ang ginadayaw gid nga propeta nga si Elias “tawo man nga pareho sa aton.” (Santiago 5:17, APD) Amo man sanday Miriam, David, Jonas, Marta, kag Pedro. Ginsugid sang Biblia ang ila mga sala. Pero maayo gihapon sila nga halimbawa sa aton sa pila ka paagi, kag gani maayo sila nga mga role model.
3. Husto. Puede nga madamo ang imo role model. Ang isa mahimo nga mapisan, ang isa naman mapinasensiahon. Ang isa pa gid mahimo nga positibo sa pag-atubang sang mga problema. (1 Corinto 12:28; Efeso 4:11, 12) Kon pangitaon mo ang maayo sa iban, may makita ka nga mga kinaiya nila nga maayo gid ilugon.—Filipos 2:3.
PAANO MO MAILOG ANG ILA HALIMBAWA
1. Panilagi ang imo mga role model. Si apostol Pablo nagsiling sa mga Cristiano sang unang siglo: “Hatagi ninyo sang pagtamod ang mga tawo nga nagakabuhi suno sa halimbawa nga inyo ginasunod sa amon.”—Filipos 3:17, BKK.
2. Makigsuod. Kon posible, makig-upod sa imo role model. Ang Biblia nagsiling: “Maglakat upud sa maalam nga mga tawo kag manginmaalam ka.”—Hulubaton 13:20.
3. Iluga ang maayo nga mga kinaiya sang imo role model. Ang Hebreo 13:7 nagsiling: “Samtang ginapanilagan ninyo ang resulta sang ila paggawi iluga ang ila pagtuo.”
Handa ka na bala? Isulat sa ubos ang imo plano nga himuon.
Plano nga Himuon
Magpili sing kinaiya nga gusto mo nga ara man sa imo. (Gusto mo bala mangin mainabyanon? maalwan? mapisan? indi madali masaklaw, masaligan?)
․․․․․
Magpili sang tawo nga nagapakita sina nga kinaiya. *
․․․․․
Kon nagapili ka sang imo role model, indi mo kinahanglan mangin pareho gid sa iya. May ara ka man maayo kag pinasahi nga mga kinaiya. Pero, ang imo mga role model makabulig sa imo nga mapakita ang maayo nga mga kinaiya samtang nagadaku ka. Luwas sina, kon ilugon mo ang ila mga halimbawa, mangin role model ka man sang iban.
Ang iban pa nga artikulo sang “Young People Ask” makita sa Web site nga www.watchtower.org/ype
[Mga Nota]
^ par. 21 Siempre, madamo man nga tawo subong ang puede mangin maayo nga role model. Mahimo ang imo mga ginikanan, mga utod, hamtong sa espirituwal nga mga miembro sang Cristianong kongregasyon nga nakilala mo sing personal ukon nabasahan mo lang.
^ par. 32 Puede mo man ini baliskaron. Una, pilia anay ang tawo nga nanamian mo gid kag pamangkuta ang imo kaugalingon, ‘Ano nga mga kinaiya niya ang nanamian ko gid?’ Dayon, himua sia nga role model kag tinguhai nga ilugon ang kinaiya nga ginsiling mo.
[Blurb sa pahina 21]
Ngaa magpadikta ka sa isa ka artista nga may malain nga reputasyon kon parte sa imo pagkatawo?
[Kahon/Mga Retrato sa pahina 22, 23]
ANG GINASILING SANG IBAN
Layla—Ang akon amiga nga si Sandra positibo gid pirme ang ginatan-aw. Pamilyar gid sia sa Biblia. Gani, daw pirme lang sia may solusyon sa mga problema. Puede ko masugid sa iya ang akon mga problema, daku man ini ukon gamay.
Terrence—Ang akon mga abyan nga sanday Kyle kag David nagapabalor gid sa balatyagon sang iban. Handa sila pirme magbulig sa mga tawo, kag ginauna nila ini sangsa ila kaugalingon nga mga problema. Maayo gid sila nga halimbawa.
Emmaline—Si Nanay ang akon role model. Madamo sia sing nahibaluan sa Biblia, kag pirme niya ginasugid sa mga tawo ang iya mga pagpati. Para sa iya, ang ministeryo isa ka pribilehiyo kag indi pabug-at. Gani nagadayaw gid ako sa iya!
[Kahon sa pahina 23]
DUGANG PA NGA IMPORMASYON
Nabudlayan ka bala mangita sing role model? Basaha ang Hebreo kapitulo 11 kag magpili sang isa sa mga ngalan nga nalista didto. Magtuon parte sa iya kag himua nga tulumuron nga ilugon ang iya maayo nga mga kinaiya.
Makakita ka man sang iban pa nga role model nga mga karakter sa Biblia sa Volume 1 kag 2 sang libro nga Questions Young People Ask—Answers that Work, nga ginhimo sang mga Saksi ni Jehova. Tan-awa ang “Role Model Index” sa likod nga bahin sang libro.
[Kahon sa pahina 23]
PAMANGKUTA ANG IMO GINIKANAN
Pamangkuta ang imo mga ginikanan kon sin-o ang ila mga role model sang una, sang pareho pa ang ila edad sa imo, kag subong. Paano sila nakabenepisyo sa ila mga role model?
