Sa Germany, mga 33 porsiento sang mga bata nga natawo sang 2010 ang wala makasal ang mga ginikanan, kon ikomparar sa 15 porsiento sang 1993.—ÄRZTE ZEITUNG kag THE LOCAL, GERMANY.

Suno sa 2010 nga sensus, 69.4 porsiento sang kabataan sa Estados Unidos ang may kompleto nga ginikanan, 23.1 porsiento ang nagaistar upod sa ila iloy, 3.4 porsiento ang yara sa ila amay, kag 4.1 porsiento ang wala nagaistar sa ila ginikanan.—U.S. CENSUS BUREAU, U.S.A.

Sang 2011, napierde sing mga $380 bilyones (U.S.) ang ekonomiya sa bug-os nga kalibutan bangod sa natural nga kalamidad. Ang linog sa Japan amo ang “pinakamalala, kay nagpierde ini sing mga $210 bilyones—wala labot sa nuklear nga insidente sa Fukushima.”—NEW SCIENTIST, BRITANYA.

Sa bug-os nga kalibutan ang pagkaon nga pirme lang ginakawat amo ang cheese. Mga sobra 3 porsiento sang cheese sa bug-os nga kalibutan ang nagakadula kada tuig. Ang panguna nga rason sini amo ang pag-shoplift kag pagpangawat sang mga empleyado.—CENTRE FOR RETAIL RESEARCH, BRITANYA.

Sa soccer, bahin na sang hampang ang pag-igo sa bola nga ginagamit ang ulo. Ginatawag ini nga “heading.” Pero, ginapakita sang moderno nga paagi sang pag-eksamin sa ulo nga may katalagman ang sulitsulit nga paghimo sini. Suno sa mga researcher sa Albert Einstein College of Medicine, New York, U.S.A., ang paghimo sini “nagapadaku sang posibilidad sang pagkasamad sa utok kag problema sa pagpamensar.” Nakita na ini sa madamo nga amateur nga mga humalampang nga naga-heading sing mga 1,000 asta 1,500 ka beses kada tuig—nga “mga pila lamang ka beses kada adlaw.”

“May mga grupo nga nagpautwas sang ila kabalaka parte sa katalagman sa HEV [hybrid electric vehicles] nga mga salakyan,” siling sang U.S. Department of Transportation. “Suno sa ila, ang mga HEV matinong amo nga indi ini mabatian sang mga nagalakat ukon mga nagabisikleta, gani indi nila mabal-an kon malapit na lang ini ukon ara na sa likuan.” Gani samtang nagadalagan, “ang HEV duha ka beses ang posibilidad nga madalahig sa aksidente” sangsa kinaandan nga mga salakyan, dugang sang report. Ang National Highway Traffic Safety Administration nagrekomendar nga ang hi-tech kag mga de-koryente nga mga salakyan dapat butangan sang tunog kon mahinay ang dalagan.