“Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.”—Mateo 5:28.

NGAA IMPORTANTE INI NGA HIBALUON?

Sa karon, madamo ang nahuyog sa pornograpiya kag mahapos na lang ini matigayon. Kon gusto mo pahamut-an ang Dios kag mangin malipayon, dapat mahibaluan mo kon ano ang pagtamod sang Dios sa sini.

ANG GINASILING SANG BIBLIA

Ang pornograpiya wala ginsambit sa Biblia. Pero direkta ini nga nagasupak sa madamo nga prinsipio sa Biblia.

Halimbawa, prangka nga ginsiling sang Biblia nga kon ang minyo nga lalaki “padayon nga nagatulok sa isa ka babayi” nga indi niya asawa, kag nagahandum nga makig-sex sa iya, mahimo ini magresulta sa pagpanghilahi. Ini nga prinsipio naaplikar sa minyo kag indi minyo nga “padayon nga nagatulok” sa pornograpiko nga mga laragway sa handum nga maghimo sing seksuwal nga imoralidad. Ini nga buhat makapaakig gid sa Dios.

“Busa, patya ninyo ang mga bahin sang inyo lawas . . . may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon.”—Colosas 3:5.

ANG GINASILING SANG MGA TAWO

Ang pila ka researcher indi pa sigurado kon bala ang pornograpiya may labot gid man sa aktual nga imoral nga buhat. Pero, indi ayhan nga ang pagtan-aw pa lang sang pornograpiya imoral na?

ANG GINASILING SANG BIBLIA

Ang “malaw-ay nga linahog” ginakabig sang Biblia nga indi nagakaigo kag imoral. (Efeso 5:3, 4) Kon amo, makasiling bala kita nga ang pornograpiya indi imoral? Sa karon, ang mga pornograpiya nagalakip sang narekord nga aktual nga mga buhat sang pagpanghilahi, homoseksuwalidad, kag iban pa nga klase sang pagpakighilawas. Huo, ang pagtan-aw sa sinang imoral nga mga buhat mas makapaakig sa Dios sangsa malaw-ay nga linahog.

Ang mga researcher padayon nga nagadebate kon bala ang pagpantasya nga epekto sang pornograpiya nagaresulta sa aktual nga paghimo sini. Pero ginasakdag sang Biblia ang ideya nga ang pagtan-aw pa lang sang pornograpiya makahalit na sa espirituwal kag makapaakig sa Dios. Nagalaygay ini: “Busa, patya ninyo ang mga bahin sang inyo lawas . . . may kaangtanan sa pagpakighilawas [kag] kailigbon sa sekso.” (Colosas 3:5) Pero, kabaliskaran ang ginahimo sang mga nagatan-aw sang pornograpiya—imbes nga palungon ining mga handum, ginagatungan pa nila ini.

“Pangitaa ang maayo, kag indi ang malaut. . . . Dumti ang malaut, kag higugmaa ang maayo.”—Amos 5:14, 15.

ANG GINASILING SANG BIBLIA

Ang Biblia nagasambit sang imoral nga mga tawo, palahubog, kag mga kawatan, nga nagbag-o. (1 Corinto 6:9-11) Paano nila ini nahimo? Sang gin-aplikar nila ang kaalam halin sa Pulong sang Dios, natun-an nila nga dumtan ang malaut.

Matun-an sang isa nga dumtan ang pornograpiya kon pamensaron niya sing maayo ang malain nga epekto sini. Ang isa ka pagtuon sining karon lang nga ginbalhag sang Utah State University nagapakita nga ang pila nga nagatan-aw sang pornograpiya nakaeksperiensia sing “depresyon, kasubo, pagkaguba sang mga relasyon,” kag iban pa nga malain nga resulta. Isa pa, subong sang ginpaathag kaina, bangod ang pagtan-aw sang pornograpiya makapaakig sa Dios, mas malala pa ang halit sini. Ginapahilayo sini ang mga tawo sa ila Manunuga.

Ang Biblia makabulig sa aton nga higugmaon ang maayo. Samtang ginabasa naton ang Biblia, mas magadalom ang aton gugma sa mga prinsipio sini sa moral. Ini nga gugma makabulig sa aton nga mangin determinado nga likawan ang pornograpiya kag makasiling man pareho sa salmista: “Indi ko pag-ipahamtang sa akon atubangan ang bisan ano nga makangilil-ad.”—Salmo 101:3, Biblia sang Katilingban sang mga Kristiano, BKK.