Siling sang imo tin-edyer tama sa imo ka-estrikto. Pero pamatyag mo daw indi man. ‘Kon indi ko sia pag-estriktuhan,’ siling mo sa imo kaugalingon, ‘basi malain ang matabo sa iya.’

Huo, makahimo ka sing nagakaigo nga mga pagsulundan. Pero antes sina, dapat mo anay mahangpan kon ngaa naugot ang imo bata sa mga pagsulundan.

Pagpati sang kalabanan: Tanan nga tin-edyer nagarebelde gid; indi ini malikawan kay bahin na ini sang ila pagdaku.

Ang matuod: Posible nga indi magrebelde ang tin-edyer kon nagakaigo ang mga pagsulundan kag gin-istoryahan ninyo ini sing maayo.

Bisan pa madamo sing rason kon ngaa nagarebelde ang mga tin-edyer, mahimo indi matalupangdan sang mga ginikanan nga sila gali ang rason bangod ang ila mga pagsulundan indi na mabali ukon indi na nagakaigo sa edad sang bata. Binagbinaga ang masunod:

• Indi mabali. Kon magpatuman ang ginikanan sing pagsulundan nga indi na mabali, mangin kaangay ini sang gapos sa baylo nga seat belt nga nagaproteksion sa tin-edyer. Subong resulta, mahimo patago nga himuon sang mga tin-edyer ang ginadili sang ila ginikanan.
• Indi na bagay sa ila edad. Sa gamay nga bata, mahimo bastante na ang paghambal nga, “Basta tumana lang ko,” pero sa mga tin-edyer kinahanglan ang pagpaathag sang mga rason. Kay man, sa indi madugay mabulag na sia sa imo kag magahimo sing dalagku nga desisyon. Maayo gid kon matun-an na niya ang pagpangatarungan sing maayo kag paghimo sing husto nga desisyon samtang ara pa sia sa imo poder.

Pero ano ang imo himuon kon pirme na lang naugot ang imo tin-edyer sa imo mga pagsulundan?

Una, dumduma nga kinahanglan sang mga tin-edyer ang mga limitasyon, kag ginapangita pa gani nila ini. Gani, maghimo sing mga pagsulundan kag siguraduha nga nahangpan nila ini. “Kon maathag sa mga tin-edyer ang mga limitasyon kag nahibaluan nila nga nagakaigo ang pagbantay sang ila mga ginikanan, mahimo nga indi sila magtuga sing problema,” siling sang libro nga Letting Go With Love and Confidence. Pero kon hatagan naman sila sang sobra nga kahilwayan, pamatyag nila ginapabay-an lang sila kag mahimo mangin rason ini sang ila pagrebelde.—Prinsipio sa Biblia: Hulubaton 29:15.

Paano ka mangin balanse? Pamangkuta ang imo tin-edyer kon ano ang iya pagtamod sa inyo mga pagsulundan. Halimbawa, kon gusto niya nga i-adjust ang iya curfew, pamatii ang iya rason. Kon mabatyagan niya nga ginapamatian sia, mahimo nga respetuhon niya kag sundon ang imo desisyon, bisan pa indi sia ugyon sa sini.—Prinsipio sa Biblia: Santiago 1:19.

Pero antes magdesisyon, dumduma ini: Sa masami, kon gusto sang mga tin-edyer ang sobra nga kahilwayan, sobra naman ang pagdumili sang mga ginikanan. Gani, binagbinaga sing maayo ang gusto sang imo bata. Responsable na bala sia? Puede na bala sia hatagan sing dugang nga kahilwayan? Ihatag ini sa iya kon nagakaigo.—Prinsipio sa Biblia: Genesis 19:17-22.

Magluwas nga pamatian mo ang pagtamod sang imo tin-edyer, isugid man sa iya ang imo mga ginakabalak-an. Paagi sa sini, matudluan mo sia nga pensaron indi lamang ang iya gusto kundi ang iya man sang iban.—Prinsipio sa Biblia: 1 Corinto 10:24.

Dayon, magdesisyon kag ipaathag sa iya ang imo mga rason. Bisan pa nga indi niya gusto ang desisyon mahimo nga malipay sia kay ginapamatian mo sia. Dumduma nga ginatudluan mo ang imo tin-edyer kon paano maggawi subong adulto. Kon maghimo ka sing nagakaigo nga mga pagsulundan kag ginaistoryahan ninyo ini, mabuligan mo sia nga mangin responsable nga adulto sa ulihi.—Prinsipio sa Biblia: Hulubaton 22:6.