Nadiskobrehan mo nga hungod nga ginahalitan sang imo tin-edyer ang iya kaugalingon. Mahimo mamangkot ka, ‘Ngaa ginahimo niya ini?’ ‘Luyag bala niya manginmatay?’

Mahimo nga indi. Pero kon ginahalitan niya ang iya kaugalingon, * dapat sia buligan. Paano? Una, binagbinaga kon ngaa nagakatabo ini.

Nagasunod lang bala sia sa uso? Ginahalitan sang iban nga tin-edyer ang ila kaugalingon bangod ginailog nila ang iban. Amo sini ang rason sang iban, pero indi amo sini ang rason sang kalabanan. Ano ang kinalain sini? Ang nagahalit sang iya kaugalingon masami nga nagatago kag nahuya gid sa iya ginahimo. “Indi ko luyag nga mahibaluan sang iban ang akon ginahimo,” siling sang 20 anyos nga si Celia. * “Ginatago ko gid ang akon mga pinalian.”

Ginahimo lang bala niya ini para matalupangdan? Mahimo nga amo sini ang ginahimo sang iban. Pero ang ginahambalan sa sini nga artikulo amo ang mga nagatago sang ila ginahimo kag indi gusto ipakitakita ang ila mga pilas ukon hanog para dayawon sang iban. Pero ang isa nga nagahalit sang iya kaugalingon sadto, nagsiling nga tani natalupangdan lang sang iban ang iya pilas para nabuligan sia dayon.

Ngaa ginahimo ini sang iban? Mabudlay hangpon ang rason sang paghalit sa kaugalingon, pero sa masami ang rason gid sini amo ang kasakit sa emosyon nga mabudlay ipautwas paagi sa hambal. Sa iya libro nga Cutting, ang eksperto sa hunahuna nga si Steven Levenkron nagalaragway sa nagahimo sini subong “mga tawo nga nagabulong sang ila kasakit sa emosyon paagi sa paghalit sang ila kaugalingon.”

Ano abi kon ginabasol mo ang imo kaugalingon? Sa baylo nga basulon ang imo kaugalingon sa ginahimo sang imo tin-edyer, hatagi sing igtalupangod kon paano mo sia mabuligan subong ginikanan.

Hambala ang imo tin-edyer nga isugid sa imo ang iya problema. Makabulig ang masunod nga mga panugda.

Uluuluhi sia. Kon ginsugid sang imo tin-edyer nga ginahalitan niya ang iya kaugalingon, tinguhai nga mangin kalmado kag uluuluhi sia.—Prinsipio sa Biblia: 1 Tesalonica 5:14.

Pamangkuta sia; pero indi sia pag-akigi. Puede mo isiling: “Bal-an ko nga may problema ka. Ano gid ang ginapaligban mo?” ukon “Ano ang mabulig ko sa imo kon nasubuan ukon nagaproblema ka?” ukon “Ano ang kinahanglan ko himuon para mangin mas suod pa gid kita?” Magpamati kag indi magsaligbat kon nagahambal sia.—Prinsipio sa Biblia: Santiago 1:19.

Buligi sia nga makita ang iya maayo nga mga kinaiya. Bangod ang masami nga kabangdanan sang paghalit sa kaugalingon amo ang mga kapaslawan, mahimo mo buligan ang imo tin-edyer nga makita ang iya maayo nga mga kinaiya. Mahimo mo man ipanugda nga isulat niya ang indi magkubos sa tatlo ka butang nga nanamian niya sa iya kaugalingon. “Ang pagsulat sang akon maayo nga mga hinimuan nakabulig sa akon nga makita nga may maayo ako nga mga kinaiya,” siling sang isa ka pamatan-on nga babayi nga si Briana. *

Palig-una sia nga mangamuyo kay Jehova nga Dios. Ang Biblia nagasiling: “[Itugyan] ninyo sa iya ang tanan ninyo nga kabalaka, bangod nagaulikid sia sa inyo.” (1 Pedro 5:7) “Gintinguhaan ko nga ipautwas ang akon nabatyagan kay Jehova nga Dios,” siling sang 17 anyos nga si Lorena, “ilabi na kon ginasulay ako nga halitan ang akon kaugalingon. Nakabulig ini sa akon nga tinguhaan pa gid nga mag-untat.”—Prinsipio sa Biblia: 1 Tesalonica 5:17.