Sala bala ang pag-inom sing alak?

“Alak nga nagapasadya sang tagiposoon sang tawo, lana nga nagapakanaw sang iya nawung, kag tinapay nga nagapabakud sang tagiposoon sang tawo.”—Salmo 104:15.

ANG GINASILING SANG MGA TAWO

Sa madamo nga puluy-an, kinaandan na nga ginalakip sa pagkaon ang alak. Sa iban naman, ginadilian gid ini. Ngaa magkatuhay ang ila pagtamod? Ang mga tawo naimpluwensiahan sang nagkalainlain nga mga rason, subong sang kultura, ikaayong lawas, kag relihion.

ANG GINASILING SANG BIBLIA

Ginakondenar sang Biblia ang pagpahubog kag sobra nga pag-inom pero indi ang haganhagan nga pag-inom sang alak. (1 Corinto 6:9, 10) Gani, halin pa sang una ang mga alagad sang Dios nagainom na sing alak, ang ilimnon nga ginsambit sing duha ka gatos ka beses sa Biblia. (Genesis 27:25) “Magkaon nga may kalipay sang imo kalan-on, kag mag-inum nga may malipayon nga tagiposoon sang imo alak,” siling sang Manugwali 9:7. Bangod nagapahalipay sang tagipusuon ang alak, masami nga ginahanda ini sa pila ka okasyon, pareho sang punsion. Pareho ini sa isa ka punsion diin naghimo si Jesucristo sang iya una nga milagro—ang paghimo sang tubig nga “maayo nga alak.” (Juan 2:1-11) Gingamit man ini sa mga pagbulong.—Lucas 10:34; 1 Timoteo 5:23.

 Nagasiling bala ang Biblia kon ano kadamo ang dapat imnon?

“[Indi] magpaulipon sa madamo nga alak.”—Tito 2:3.

NGAA IMPORTANTE INI?

Kada tuig, madamo nga pamilya ang nagaantos bangod nagaabuso sa alkohol ang isa ukon duha ka ginikanan. Ang sobra nga pag-inom amo man ang kabangdanan sang madamo nga aksidente, lakip na ang aksidente sa salakyan. Kag sa kadugayon, ang sobra nga pag-inom nagaguba sang utok, tagipusuon, atay, kag tinai.

ANG GINASILING SANG BIBLIA

Ginapatuman gid sang Dios ang haganhagan nga pag-inom kag pagkaon. (Hulubaton 23:20; 1 Timoteo 3:2, 3, 8) Wala sia nalipay sa mga wala nagakontrol sang ila kaugalingon. Nagasiling ang Biblia: “Ang bino manugyaguta, kag ang makahulobog nga ilimnon magahod nga palaaway, ang bisan sin-o nga ginapatalang sini indi gid mahimo nga maalam.”—Italics amon; Hulobaton 20:1, Biblia sang Katilingban sang mga Kristiano.

Ang isa ka paagi nga ginapatalang kita sang alak amo nga ginadula sini ang aton handum nga himuon ang maayo. Ang Oseas 4:11 nagasiling: “Ang alak kag ang bag-o nga alak nagakuha sang paghangup.” Napamatud-an ini ni John. * Sang nag-inaway sila sang iya asawa, nagkadto sia sa hotel kag nagpahubog kag nakapanghilahi, kag ginhinulsulan gid niya ini kag nagpromisa nga indi na gid pagliwaton. Ang sobra nga pag-inom mahimo makahalit sa aton panglawas, moralidad, kag espirituwalidad, kag nagsiling ang Biblia nga ang mga palahubog indi makatigayon sang kabuhi nga wala katapusan.—1 Corinto 6:9, 10.

San-o indi dapat mag-inom?

“Nagalikaw ang maalamon nga tawo kon masugata niya ang katalagman, pero wala nagalikaw ang tawo nga wala sing alam, gani nagaantos siya.”—Hulubaton 22:3, Ang Pulong sang Dios.

NGAA IMPORTANTE INI?

“Ang alak isa ka mabaskog nga droga,” siling sang World Book Encyclopedia. Gani, may pila ka kahimtangan nga indi maayo ang pag-inom bisan sang diutay nga alak.

ANG GINASILING SANG BIBLIA

Masami nga ‘nagasugata sa katalagman’ ang mga tawo bangod nag-inom sila sa indi nagakaigo nga tion. “Sa tagsa ka butang may panag-on,” siling sang Biblia, lakip ang tion nga indi dapat mag-inom. (Manugwali 3:1) Halimbawa, kon ang isa tuman pa ka bata para mag-inom, may problema sa pagkaadik sa alkohol, ukon nagatomar sing bulong. Kag para sa madamo, ang “panag-on” nga indi dapat mag-inom amo ang antes mag-obra ukon nagaobra, ilabi na kon nagapaandar sang delikado nga mga makina. Para makasigurado, ang maalamon nga tawo nagatamod sang kabuhi kag ikaayong lawas bilang hamili nga regalo sang Dios. (Salmo 36:9) Ginapakita naton nga ginatahod naton ini nga regalo kon ginasunod naton ang mga prinsipio sang Biblia parte sa pag-inom.