DAW indi mapatihan: Bisan pa ang mga tawo daw madulaan na sing obra, balay, kag bisan pa gani sang pension, madamo gihapon ang nagahunahuna pirme kon paano nila matigayon ang bisan ano nga mabakal sang kuarta.

Ina nga mga tawo amo ang mahapos nga mabiktima sang mga manugpasayod, nga ang paagi amo ang pagganyat sa aton nga dapat may ara kita sang mas daku nga balay, mas manami nga salakyan, kag may tatak nga mga bayo. Paano kon wala ka sing kuarta? Wala sing problema, puede ka man makapangutang! Para sa kalabanan, importante nga daw may sarang sila tulukon bisan pa nalubong na sila sa utang.

Siempre, ini nga ilusyon wala nagadugay. “Ang pagpangutang sang mga butang para mangin daw may sarang tulukon daw pareho lang sang pagsuyop sang crack cocaine para mangin maayo ang imo pamatyag,” siling sang libro nga The Narcissism Epidemic. “Pareho ini nga barato kag makapaayo sang imo pamatyag sa primero—pero wala nagadugay ang epekto sini. Sa ulihi, magaresulta ini sang pagkaubos sang imo kuarta kag sobra nga kasubo.”

Ginabuyagyag sang Biblia ang kabuangan sang “pagpadayawdayaw sang palangabuhian sang isa.” (1 Juan 2:16) Matuod, kon hunahunaon naton pirme ang mga butang nga puede naton maangkon, indi na naton makita ang pinakaimportante sa aton kabuhi—mga butang nga indi mabakal sang kuarta. Binagbinaga ang tatlo ka halimbawa.

Si Brianne, * nga isa ka tin-edyer sa Estados Unidos, nagabatyag nga sobra ang pagpabalor sang iya amay sa obra kag sa kuarta. “May ara kami sang tanan namon nga kinahanglanon kag sobra pa,” siling niya, “pero wala pirme sa balay si Daddy kay pirme lang sia may ginakadtuan. Bal-an ko nga tungod ini sang iya obra, pero sa pamatyag ko may responsibilidad man sia sa iya pamilya!”

Binagbinaga ini: Ano ayhan ang hinulsulan sang amay ni Brianne sa ulihi? Paagi sa sobra nga pagpabalor sang materyal nga mga butang, ano ang epekto sini sa relasyon nila sang iya bata? Ano pa ang kinahanglan sang iya pamilya sa iya magluwas sa kuarta?

Prinsipio sa Biblia nga binagbinagon:

• “Ang gugma sa kuarta amo ang gamot sang tanan nga sahi sang makahalalit nga mga butang, kag paagi sa paghingamo sini nga gugma ang iban . . . nagbuno sang ila kaugalingon sang madamo nga kasakit.” —1 Timoteo 6:10.

• “Maayo pa ang pagkaon nga mga utan diin may gugma sang sa pinatambok nga baka kag may dumut sa sini.”—Hulubaton 15:17.

Ang leksion: Indi mabakal sang kuarta ang paghiusa sang pamilya. Matigayon lamang ini paagi sa paghinguyang sing tion sa imo pamilya kag paghatag sa ila sang gugma kag atension.—Colosas 3:18-21.

“Pirme ako ginasilingan sang akon iloy nga kinahanglan mamana ako sang manggaranon kag magtuon para may maayo ako nga obra kon maubos gid man ang kuarta sang akon bana,” siling sang 17 anyos nga si Sarah. “Ang pirme niya lang ginahunahuna kon diin sia makakuha sang kuarta.”

Binagbinaga ini: Kon ginapamensar mo ang palaabuton, ano ang mga ginakabalak-an mo? San-o nagakatabo nga ang isa ka simple nga panghunahuna nagdangat sa indi husto nga pagkabalaka? Paano dapat tamdon sang iloy ni Sarah ang kasiguruhan sa pinansial?

Prinsipio sa Biblia nga binagbinagon:

• “Untati ninyo ang pagtipon para sa inyo kaugalingon sing mga bahandi sa duta, diin ang sipit kag tuktok nagapang-ut-ot, kag diin ang mga kawatan nagapangrungkab kag nagapangawat.”—Mateo 6:19.

• “Wala kamo makahibalo kon mangin ano ang inyo kabuhi buas.”—Santiago 4:14.

Ang leksion: Ang pagtipon sang kuarta indi makagarantiya sang maayo nga palaabuton. Bangod puede ini makawat, kag indi ini makabulong sang balatian ukon makapugong sang kamatayon. (Manugwali 7:12) Ginatudlo sang Biblia nga makabatyag ka sang matuod nga kasiguruhan kon tun-an mo ang parte sa Dios kag sa iya katuyuan.—Juan 17:3.

“Ginpadaku ako sang akon ginikanan sa simple nga pagkabuhi,” siling sang 24 anyos nga si Tanya. “Nagdaku kami nga malipayon sang akon kapid nga babayi, bisan pa kinahanglanon lang gid ang ara sa amon.”

Binagbinaga ini: Ngaa mabudlay ang mangin kontento sa kon ano lang ang kinahanglanon? Kon parte sa pagtamod sa kuarta, ano nga halimbawa ang imo ginapakita sa imo pamilya?

Prinsipio sa Biblia nga binagbinagon:

• “Kon kita may pagkaon, panapton kag pasilungan, mangin kontento na kita sa sini nga mga butang.”—1 Timoteo 6:8.

• “Malipayon ang mga mahunahunaon sang ila espirituwal nga kinahanglanon.”—Mateo 5:3.

Ang leksion: May mas importante pa sangsa kuarta kag mga butang nga mabakal sini. Kay man, pareho sang ginasiling sang Biblia: “Bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.” (Lucas 12:15) Ang matuod, mangin kontento ang isa kon masabat ang importante nga mga pamangkot pareho sang:

• Ngaa yari kita diri?

• Ano ang yara sa palaabuton?

• Paano ko pun-an ang akon espirituwal nga mga kinahanglanon?

Nalipay ang mga Saksi ni Jehova, ang naghimo sini nga magasin, nga buligan ka nga masabat ini nga mga pamangkot. Mahimo mo sila makontak sa inyo lugar ukon kadtui ang amon Web site nga jw.org.