May abyan ka nga indi mo kasekso nga nakahangop gid sa imo. Maistoryahan ninyo ang tanan, kag amo gid sini ang pirme ninyo ginahimo. ‘Mag-abyan lang kami ’ya,’ ang ginasiling mo sa imo kaugalingon, bisan pa nga ang imo tiayon maakig kon mahibaluan niya ang inyo ginahambalan.

Mahimo nga tuman na kamo kasuod kag kinahanglan mo na tapnaon ini. Pero antes sina, hibalua anay kon ngaa nangin amo sini ang imo sitwasyon.

Kalipay. Ang simple nga rason amo nga nalipay kita kon ginahatagan kita sing atension sang indi naton kasekso. Nalipay kita nga ginapabaloran, kag nagabatyag kita nga nanamian sila sa aton. Bisan pa minyo ka na, mahimo nga nalipay ka sa pagpakig-upod sa isa ka abyan nga indi mo kasekso. Pero dapat mo dumdumon ini: May malain gid nga epekto kon ina nga kinahanglanon ginapun-an sang iban magluwas sa imo tiayon. Kon may indi nagakaigo ka nga emosyonal nga kaangtanan sa isa ka abyan nga indi mo kasekso, mahimo ini magpaluya sang imo kaangtanan sa imo tiayon. Daw pareho lang nga wala mo ginhatag ang para lang sa iya.

• Pamangkuta ang imo kaugalingon, ‘Ano nga kinahanglanon ang ginahatag sang akon abyan nga dapat ginahatag lang sang akon tiayon?’

Kaluyahon. Nagasiling ang Biblia nga ang mga nagaminyo may pila ka “kapipit-an.” (1 Corinto 7:28) Halimbawa, mahimo nga kon kaisa wala ka ginasapak ukon ginaapresyar sang imo tiayon, ukon mahimo nga nagasunggod ka bangod sang mga problema nga wala masolbar. Mahimo nga nagalikaw ang imo tiayon nga hambalan ini, amo nga naugot ka kag gusto mo nga hatagan sang atension sang iban. Ang pila ka eksperto nagasiling nga ang pagpabuyanbuyan nga solusyonan ang dalagku nga mga problema mahimo magresulta nga mangin indi malipayon ang pag-asawahay, kag mahimo nga tunaan pa gani ini sang diborsio.

 • Pamangkuta ang imo kaugalingon, ‘May mga problema bala kami sang akon tiayon amo nga luyag ko nga hatagan sang atension sang iban?’

Hibalua ang katalagman. Nagasiling ang Biblia: “Mabutang mo bala ang kalayo sa imo dughan nga indi masunog ang imo bayu?” (Hulubaton 6:27, Maayong Balita nga Biblia) Ang matuod, makahalalit gid kon padayunon mo ang imo romantiko nga kaangtanan sa indi mo tiayon. (Santiago 1:14, 15) Indi ini parte sa kon ano ang mahimo matabo, kundi sa kon ano na ang natabo. Paagi sa paghatag sina nga atension sa iban, gindingutan mo na ang imo tiayon sang atension nga para lang sa iya.

Indi pag-intua ang imo kaugalingon. Ang suod nga pag-abyanay mahimo magpahunahuna sa imo kon ano ayhan ang imo kabuhi kon sia ang imo nadayunan. Pero mahimo nga indi ini patas bangod ginapaanggid mo ang maayo nga mga kinaiya sang imo abyan sa kaluyahon sang imo tiayon! Dumduma man nga ang kalipay nga imo nabatyagan sa imo abyan mahimo nga amo man ang imo nabatyagan sadto sa imo tiayon.—Prinsipio sa Biblia: Jeremias 17:9.

Magbutang sang limitasyon. Nagabutang kita sang alarm sa aton salakyan ukon balay para indi kita makawatan. Mahimo mo man ini sa inyo pag-asawahay. “Bantayi ang imo tagiposoon,” siling sang Biblia. (Hulubaton 4:23) Paano mo ini mahimo? Tilawi ang masunod:

• Ipahibalo sa tanan nga minyo ka na, ayhan paagi sa pagbutang sang mga retrato sang imo tiayon sa imo ginaubrahan.—Prinsipio sa Biblia: Genesis 2:24.

• Magdesisyon kon ano ang dapat kag indi dapat nga paggawi sa indi mo kasekso. Halimbawa, indi dapat iistorya sa iya ang inyo problema nga mag-asawa ukon mag-upod sa iya nga mag-inom.

• Kon suod ka na gid sa indi mo kasekso, untati ini. Kon daw indi mo ini mahimo, pamangkuta ang imo kaugalingon kon ngaa. Sa baylo nga pakamatarungon ang imo kaangtanan sa indi mo kasekso, ihatag ang kinahanglanon sang imo tiayon kag maghimo sing tikang nga amligan ang inyo pag-asawahay.—Prinsipio sa Biblia: Hulubaton 5:18, 19.