ANG PAGTAMOD SANG BIBLIA
Mag-asawa
Ang kasal bala isa lang ka simple nga kahimusan para sa pag-updanay?
“Ang gintingob sang Dios indi pagbulagon sang tawo.”—Mateo 19:6.
ANG GINASILING SANG BIBLIA
Para sa Dios, ang kasal indi lamang isa ka kahimusan sang pag-updanay sang duha ka tawo. Isa ini ka sagrado nga paghiusa sang lalaki kag babayi. Ang Biblia nagasiling: “Sa ginsuguran sang pagpanuga ‘Ginhimo [sang Dios] sila nga lalaki kag babayi. Bangod sini bayaan sang lalaki ang iya amay kag iloy, kag ang duha mangin isa ka unod’ . . . Gani ang gintingob sang Dios indi pagbulagon sang tawo.” *—Marcos 10:6-9; Genesis 2:24.
Ang dinalan nga “gintingob sang Dios [ukon ginhugpong],” wala nagakahulugan nga ang kasal ginhimo sa langit. Kundi paagi sa pagsiling nga ang aton Manunuga amo ang Tagtukod sang kahimusan sang pag-asawahay, ginapadaku sang Biblia nga serioso ini. Ang mag-asawa nga may amo sini nga pagtamod nagakabig sini nga balaan kag permanente, gani determinado sila nga mangin madinalag-on ang ila pag-asawahay. Ginapalig-on nila ini nga determinasyon paagi sa pagpangayo sing panuytoy sa Biblia para matungdan nila ang ila kaugalingon nga mga papel.
Ano ang papel sang bana?
“Ang bana amo ang ulo sang iya asawa.” —Efeso 5:23.
ANG GINASILING SANG BIBLIA
Para mangin madinalag-on ang pamilya, importante nga may isa nga magadesisyon. Ginhatag ini nga responsibilidad sang Biblia sa bana. Pero wala ini nagakahulugan nga dapat sia mangin diktador ukon mamahog. Wala man ini nagahatag sa iya sing rason para likawan ang iya responsibilidad, amo nga madula ang respeto sang iya asawa sa iya kag mapabug-atan ini. Gani, nagapaabot ang Dios nga magpangabudlay gid sia para atipanon ang iya asawa kag hatagan sing dungog bilang iya pinakasuod kag pinakamasaligan nga kaupod. (1 Timoteo 5:8; 1 Pedro 3:7) “Ang mga bana dapat maghigugma sang ila asawa subong sang ila kaugalingon nga lawas,” siling sang Efeso 5:28.
Ang bana nga matuod nga nagahigugma sa iya asawa nagapabalor sang iya ikasarang kag mga abilidad. Ginatahod man niya ang iya mga pagtamod, ilabi na sa mga butang nga makaapekto sa pamilya. Indi niya dapat pag-ipilit ang iya pamaagi bangod lang nga sia ang ulo sang pamilya. Sang ginsikway sang diosnon nga tawo nga si Abraham ang maayo nga panugda sang iya asawa parte sa ila pamilya, ginsilingan sia ni Jehova nga Dios: “Pamati ka kay Sara.” (Genesis 21:9-12, Biblia sang Katilingban sang mga Kristiano) Mapainubuson nga nagsunod si Abraham, kag nangin mahidaiton kag nahiusa ang ila pamilya. Natigayon man nila ang pagpakamaayo sang Dios.
Ano ang papel sang asawa?
“Mga asawa, magpasakop kamo sa inyo bana.” —1 Pedro 3:1.
ANG GINASILING SANG BIBLIA
Antes gintuga sang Dios ang asawa sang una nga lalaki, sia nagsiling: “Indi maayo nga nagaisahanon lang ang tawo, gani himuan ko siya sang kaupod nga magabulig sa iya kag bagay sa iya.” (Genesis 2:18, APD) Ang lalaki kag babayi may papel nga magbuligay sa isa kag isa. Gani, gintuga sang Dios ang babayi, indi agod mangin tupong sa lalaki ukon magpaindis-indis sa iya, kundi mangin komplemento niya. Tumanon nila sing magkaupod ang sugo sang Dios sa ila nga magbata kag pun-on ang duta.—Genesis 1:28.
Agod matuman sang babayi ang iya papel, ginhatagan sia sang Dios sang nagakaigo nga pisikal, mental, kag emosyonal nga mga ikasarang. Kon gamiton niya ini sing maalamon kag mahigugmaon, daku ang iya mabulig agod mangin madinalag-on ang ila pag-asawahay kag mangin kontento kag mapahamtang ang buot sang iya bana. Para sa Dios, ining tumalagsahon nga babayi takus gid nga dayawon. *—Hulubaton 31:28, 31.
^ par. 5 Ginatugutan sang Biblia ang pagdiborsio kon pagpanghilahi ang rason.—Mateo 19:9.
^ par. 14 Makabulig sa mag-asawa ang mga panugda parte sa pag-asawahay kag pamilya ang artikulo sa Magmata! nga “Bulig Para sa Pamilya.”
Basi Manamian Ka Man
PAANO MANGIN MALIPAYON ANG IMO PAMILYA?
Magpagiya sa Dios Para Mangin Malipayon ang Pag-asawahay
Ang paggamit sing duha ka simple nga pamangkot makabulig sa inyo nga mangin malipayon ang inyo pag-asawahay.
SABAT SA MGA PAMANGKOT SA BIBLIA
Ano ang Ginasiling sang Biblia Parte sa Pag-live-in?
Ang instruksion sang Dios nagatudlo sa aton kon paano mangin malipayon ang pamilya, kag pirme gid ini makahatag sang kaayuhan sa mga nagasunod sa sini.
SABAT SA MGA PAMANGKOT SA BIBLIA
Ano ang Ginasiling sang Biblia Parte sa Pagpangasawa sang Lain nga Rasa?
Binagbinaga ang pila sa mga prinsipio sa Biblia parte sa pag-alalangay sang mga rasa kag pag-asawahay.
SABAT SA MGA PAMANGKOT SA BIBLIA
Ano ang Ginasiling sang Biblia Parte sa Pagpakasal sang Pareho nga Babayi Ukon Lalaki?
Nahibaluan gid sang tagtukod sang pag-asawahay kon paano mangin permanente kag malipayon ang pag-updanay.
SABAT SA MGA PAMANGKOT SA BIBLIA
Ginatugutan Bala ang Pagpangasawa sing Madamo?
Ini bala nga ideya naghalin sa Dios? Binagbinaga ang ginasiling sang Biblia sa pagpangasawa sing madamo.
