“Treintay otso porsiento lang sang mga bata nga wala pa 5 ka tuig ang may birth certificate,” siling sang isa ka report sang UNICEF sa sub-Saharan Africa. Pero sa iban nga bahin sang kalibutan, “kinahanglan ang pagparehistro sang pagkabun-ag para makapabulong kag makaeskwela ang kabataan, amo man ang mga ilo para makatigayon sing palanublion,” siling ni Elke Wisch, ang kabulig nga direktor sang UNICEF sa rehiyon sang nasidlangan kag nabagatnan nga Aprika.

Suno sa isa ka surbe, ang ginakulbaan gid sang mga pamatan-on sa Italya amo ang cyberbullying. Sa mga 12 tubtob 17 anyos, 72 porsiento ang nakulbaan gid sini. Mas madamo sila sangsa mga nakulbaan sa droga (55 porsiento), abusuhan sang mga hamtong (44 porsiento), ukon malatnan sang balatian paagi sa sex (24 porsiento).

Subong sang ginreport sang The Japan Times, nagadamo ang mga pamatan-on nga taga-Japan ang indi gusto nga i-promote sa obra. Kuarenta porsiento sa ila ang nakalainan sang indi maayo nga pamatasan kag paglapnag sang pagkadibunayag. Madamo sang trabahador ang nagapangalag-ag nga magpabutyag sang ila opinyon ukon makig-istorya sa mas mataas sa ila sing posisyon. Kon ang mga trabahador sang una nagapabilin sa ila amo, 60 porsiento sang ulihing tubo nga mga trabahador subong ang nagapabilin lang sa ila obra samtang nagahulat sing maayo nga obra.

Halin sang 1980 asta 2010, halos 800,000 ang napatay paagi sa pagtiro sa Brazil. Sobra 450,000 nga biktima ang 15 tubtob 29 anyos. Ginapakita sang isa ka pagtuon parte sa pinakaulihi nga mga krimen nga ang pagpamatay masami nga bangod sa pag-inaway sa sulod sang puluy-an, indi paghangpanay sa kaingod, pagpangimon, ukon pagbaisay sang mga drayber.