MGA LUGAR KAG MGA TAWO
Pagbisita sa Italya
ANG Italya isa ka pungsod nga madamo sing kinatuhayan, halin sa malaba nga baybayon pakadto sa matag-as nga kabukiran; tuman nga tig-ilinit sa bagatnan pakadto sa grabe nga tigtulugnaw sa aminhan. Madamo man diri sang bulkan, pero diutay lang sini ang aktibo, pareho sang Stromboli kag Mount Etna.
Ang Italya ang isa sa may pinakamadamo sing populasyon sa Europa. Madamo na ang nakaagi diri, lakip ang mga Arabo, Byzantine, Griego, Norman, kag mga Phoenician.
Ang mga turista nga nagasakay sa gondola
Bugana ini nga pungsod sang mga bahandi sa kasaysayan kag art. Makita sa mga banwa kag siudad sa Italya ang dumaan nga kagulub-an sang Griego kag Romano ukon ang mga bilding nga Baroque kag Renaissance. Ginhimo ang mga painting, estatwa nga marmol, kag mga fountain sang mga artist pareho nanday Bernini, Michelangelo, kag Raphael.
Ginapabaloran gid sang mga Italyano ang pagkaon, kag madamo sila sing kustombre nga ginasunod sa pagluto sini. Masami nga pasta ang una nga ginabutang, kag dayon karne ukon isda nga may utan. Ginagamit nila pirme ang mantika sang olibo nga bugana diri. Ang pizza kag risotto kilala nga pagkaon sang Italya.
Ang pasta amo ang panguna nga pagkaon sa Italya
Kilala sila nga mapinalanggaon, maabiabihon, kag mainabyanon. Luyag nila nga makig-istorya sa iban, gani kinaandan na nga makita ang mga nagahambalanay sa mga plasa ukon masadya nga nagaistoryahanay samtang nagalakat sa alagyan.
Ang kalabanan sa ila nagapangangkon nga Romano Katoliko, pero diutay lamang ang pirme nagasimba. Nagaluya na kuno ang impluwensia sang simbahan sang nagligad nga mga tinuig, kay wala na nila ginasapak ang kasuguan parte sa aborsion kag diborsio.
Madamo sing Saksi ni Jehova sa Italya. Kilala sila sa ila pagpanudlo parte sa Biblia bilang bahin sang ila pagwali sa publiko kag pagsunod sa mga kasuguan sini. May sobra 3,000 ka kongregasyon sang mga Saksi ni Jehova sa bilog nga pungsod, kag madamo sa sini ang nagapaninguha nga maistorya ang mga nagahambal sang iban nga lenguahe. Nakita nga kinahanglanon gid ang pagtudlo sa Biblia sa dumuluong nga lenguahe bangod sa sulod sang pulo ka tuig, tatlo ka pilo ang kadamuon sang mga dumuluong sa Italya.
NAHIBALUAN MO BALA?
Bisan pa makita sa Roma ang Vatican City, nangin independiente ini nga pungsod sang 1929 kag ginakabig sang mga Italyano nga lain nga pungsod.
Ang kabukiran sang Dolomites sa aminhan-nasidlangan sang Italya