“Sa ginsuguran gintuga sang Dios ang mga langit kag ang duta.” —Genesis 1:1.

ANG GINASILING SANG BIBLIA

Gintuga sang Dios ang uniberso, lakip ang duta, madugay na nga tion ang nagligad—“sa ginsuguran,” pareho sang ginasiling sang Genesis 1:1. Ang siensia subong nagaugyon nga may ginsuguran ang uniberso. Ang pinakaulihi nga pagbulubanta sang mga sientipiko amo nga ang duta nagaedad sing halos 14 bilyones ka tuig.

Ginalaragway man sang Biblia ang parte sa anom ka “adlaw” nga pagpanuga. Pero, wala ini nagasiling nga tig-24 ka oras ini nga adlaw. (Genesis 1:31) Ang matuod, ginagamit sang Biblia ang tinaga nga “adlaw” para patuhuyan ang nagkalainlain nga kalawigon. Halimbawa, ginatawag sini ang bug-os nga tion sang pagtuga nga “adlaw nga ang GINOONG Dios naghimo sang duta kag mga langit.” (Genesis 2:4) Maathag nga ining mga “adlaw” sang pagpanuga nagadugay sing linibo ka tuig.—Salmo 90:4.

NGAA IMPORTANTE INI?

Ang sayop nga ideya sang mga creationist mahimo magpatalang sa imo nga indi pagpatihan ang Biblia. Pero kon ginasugid sang Biblia ang masaligan nga kasaysayan sang pagpanuga, mahimo ka makabenepisyo sa “maayo nga kaalam” sini.—Hulubaton 3:21.

“Ang Dios nagsiling: ‘Magpatubo ang duta sing buhi nga mga tinuga sono sa ila mga sari.’” —Genesis 1:24.

ANG GINASILING SANG BIBLIA

Wala gintuga sang Dios sing simple ang kabuhi kag ginpabay-an nga mag-uswag ini sa komplikado nga tinuga. Kundi, gintuga niya ang “mga sari” sang tanom kag sapat, nga makapadamo “sono sa ila mga sari.” (Genesis 1:11, 21, 24) Ini nga proseso nga nagapadayon asta subong, amo ang nagpuno sang duta sang pareho gihapon nga “mga sari” sang kabuhi nga gintuga sang Dios.—Salmo 89:11.

Wala ginsambit sing espesipiko sang Biblia kon ano ang mga pagbag-o nga matabo sa tagsa ka sari, bilang resulta sang pag-crossbreed kag pagpasibu sa ila palibot. Bisan pa ginatamod ini sang iban nga porma sang ebolusyon, wala sing bag-o nga sahi sang kabuhi ang nahimo. Ginasuportahan sang mga research subong nga ang mga tanom kag sapat may diutay lang nga pagbag-o sa sulod sang malawig nga tion.

NGAA IMPORTANTE INI?

Ang pagkasibu sang Biblia sa siensia paagi sa paglaragway sang “mga sari” sang kabuhi nagapabakod sa kredibilidad sini sa iban pa nga bahin, lakip sa kasaysayan kag tagna.

“Ang akon mga kamut nagbitad sang mga langit.”—Isaias 45:12.

ANG GINASILING SANG BIBLIA

Ang Dios ang Ginahalinan sang wala tupong nga gahom, ukon enerhiya. (Job 37:23) Importante ini bangod nadiskobrehan sang mga sientipiko nga puede himuon ang enerhiya nga isa ka butang. Nagasiling ang Biblia nga ang Dios mismo ang Ginahalinan sang ‘makusog nga gahom’ nga nagtuga sang uniberso. (Isaias 40:26) Ginpromisa sang Dios nga gamiton ang iya gahom para sakdagon ang iya tinuga, kay nagasiling ang Biblia parte sa adlaw, bulan, kag mga bituon: “Gintukud man [sang Dios] sila sa gihapon kag sa gihapon.”—Salmo 148:3-6.

NGAA IMPORTANTE INI?

Nagsiling anay ang astronomo nga si Allan Sandage: “Indi masabat sang siensia ang pinakamabudlay nga mga pamangkot. Kon mamangkot ka kon ngaa may isa ka butang sa baylo nga mamangkot kon ngaa wala, indi na ini masabat sang siensia.” Wala lamang ginapaathag sang Biblia ang pagtuga nga nagahisanto sa siensia kundi ginasabat man sini ang mga pamangkot nga indi masabat sang siensia, pareho sang, Ano ang katuyuan sang Dios sa duta kag sa katawhan? *