BANGOD wala sing tiil ang man-ug, dapat may mahunit ini nga panit nga makasarang sa malawig nga pagbag-id. Ang iban nga sari sang man-ug nagasaka sa mga kahoy, samtang ang iban naman nagalubong sa magaras nga balas. Ngaa tuman kahunit ang panit sang man-ug?

Binagbinaga: Lainlain ang kadamulon kag pagkahuman sang panit sang man-ug, depende sa sari sini. Pero ang panit sang tanan nga man-ug pareho nga matig-a sa gua kag amat-amat nga nagahumok sa sulod. Ngaa maayo ini? “Kon ang materyal matig-a sa gua kag amat-amat nga nagahumok sa sulod mahimo ini makabuhin sang epekto sang pagbunggobunggo,” siling sang researcher nga si Marie-Christin Klein. Ang pinasahi nga pagkahuman sang panit sang man-ug amo ang rason kon ngaa makakamang ini sa duta, kag indi tanto mahalitan ang panit sini kay palareho kakusog ang pagbunggo sa matalom nga mga bato. Importante nga mangin mahunit ang panit sini kay mga duha ukon tatlo ka bulan pa antes ini maghiluno.

Ang mga gamit nga pareho sa panit sang man-ug mahimo mangin mapuslanon gid sa medisina—halimbawa, sa paghimo sing mga implant nga tuman kahunit kag kabakod. Subong man, ang mga kagamitan nga may kaangtanan sa mga conveyor belt nga ginailog ang pagkahuman sa panit sang man-ug nagakinahanglan sang mas diutay nga lubrikante nga mahimo bangdan sang polusyon.

Ano sa banta mo? Ang panit bala sang man-ug resulta sang ebolusyon? Ukon gindesinyo ini?