“Dili ka maghimo nga sa imo sing larawan nga tinigban, ukon bisan ano nga kaangay sang bisan anong butang nga yara sa langit sa ibabaw, ukon yara sa duta sa idalum, ukon yara sa tubig sa idalum sang duta; dili ka magyaub sa ila ukon mag-alagad sa ila.” ​—Exodo 20:4, 5.

Ang pagsimba sa mga imahen ginapakamalaut gid sa Hebreo nga Kasulatan nga ginatawag man nga Daan nga Katipan

PAGPATI SANG KALABANAN

Suno sa New Catholic Encyclopedia, madamo sing imahen ang mga Judiyo nga ginagamit sa ila pagsimba “kag ini nga mga palaagyan ginatahod, ginapadunggan, kag ginasimba.” Bilang halimbawa, ginsambit sina nga ensiklopedia ang tinigib nga mga prutas, bulak, kag mga sapat nga mga dekorasyon sa templo sa Jerusalem.​—1 Hari 6:18; 7:36.

ANO ANG DAPAT MO MAHIBALUAN?

Tuhay sa ginasiling sang New Catholic Encyclopedia, ang matutom nga mga Judiyo wala nagasimba sa mga tinigib ukon imahen sa templo. Ang matuod, wala kita sing mabasa sa Biblia nga ang matutom nga Israelinhon naggamit sing imahen sa pagsimba.

ANG GINASILING SANG BIBLIA

“Indi ko pag-ihatag sa iban ang akon himaya,” siling sang Dios paagi kay propeta Isaias, “ukon ang akon pagdayaw sa mga larawan nga tinigban.”​—Isaias 42:8.

“Ano ang pagsinanto sang templo sang Dios sa mga idolo? . . . Untati ninyo ang pagtandog sa di-matinlo nga butang.”​—2 Corinto 6:16, 17.

“Ang unang mga Cristiano nahadlok bisan sa panugda pa lang nga butangan sing mga imahen ang mga simbahan, kag ginakabig nila nga idolatriya ang pagyaub ukon pagpangadi sa sini.”—History of the Christian Church

PAGPATI SANG KALABANAN

“Indi gid maduhaduhaan subong nga naggamit sing mga imahen sa pagsimba ang mga Cristiano sang una,” siling sang New Catholic Encyclopedia. “Makita sa mga lulubngan sang mga Cristiano sang una ang madamo nga art. . . . Bisan ang imahen sang mga diosdios nangin dekorasyon sang balaan nga mga hulot sang sagrado nga pagsimba kag lulubngan.” *

ANO ANG DAPAT MO MAHIBALUAN?

Ang pinakadaan nga mga imahen nga nakita sa mga alagyan sa idalom sang duta nga ginhimo nga lulubngan napetsahan lang sang ikatlo nga siglo. Mga 200 ka tuig ini sang napatay na si Jesus. Gani, ang ginatawag sang New Catholic Encyclopedia nga ‘pagsimba sang mga Cristiano sang una’ indi ang pinakauna nga pagsimba sang mga Cristiano​—nga amo ang ginahimo sang unang siglo nga mga disipulo kag ginalaragway sa Cristianong Griegong Kasulatan, nga ginatawag nga Bag-ong Katipan. Ginapakita lang sang nasapwan nga mga imahen sa mga lulubngan sang ikatlo nga siglo nga ginbaton sang mga nagapangangkon nga mga Cristiano ang pagano nga kustombre sang paggamit sang mga imahen, mahimo agod madamo sila sing makumbertir. *

ANG GINASILING SANG BIBLIA

“Palagyo kamo gikan sa idolatriya.”​—1 Corinto 10:14.

“Magbantay kamo batok sa mga idolo.”​—1 Juan 5:21.

Ang pagsimba sa mga imahen isa ka relihioso nga buhat nga wala ginasakdag sang Biblia. Bangod sini, ang mga Saksi ni Jehova wala nagasimba sa mga imahen, kag wala sing relihioso nga mga imahen sa ila mga balay ukon mga duog sang pagsimba.

PAGPATI SANG KALABANAN

“Bangod ang pagsimba nga ginapatungod sa imahen makalab-ot lang sa persona nga ginarepresentar sini,” siling sang New Catholic Encyclopedia, “ang pagsimba para sa sina nga persona mahimo man ipatungod sa imahen nga nagarepresentar sini.”

ANO ANG DAPAT MO MAHIBALUAN?

Sang gintudluan ni Jesus ang iya mga sumulunod kon paano mangamuyo, wala niya sila ginsilingan nga maggamit sang mga imahen. Bisan ang ideya nga paggamit sini sa pagsimba sa matuod nga Dios indi mabasa sa Cristianong Griegong Kasulatan.

ANG GINASILING SANG BIBLIA

“Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.”​—Mateo 4:10.