ANG PAGTAMOD SANG BIBLIA
Katinlo
Importante bala sa Dios nga mangin matinlo ang aton lawas?
“Tinluan naton ang aton kaugalingon gikan sa tanan nga dagta sang unod kag espiritu.”
—2 Corinto 7:1.
ANG GINASILING SANG BIBLIA
Ginahigugma kita sang aton Manunuga kag gusto niya nga mangin mapagros kag malawig ang aton kabuhi. “Magbantay ang imo tagiposoon sang akon mga sogo,” siling sang Dios, “kay ang kalawigon sang mga adlaw kag katuigan sang kabuhi kag ang paghidait idugang nila sa imo.” (Hulubaton 3:1, 2) Ginpakita sang Dios ang iya gugma paagi sa iya mga sugo sa Israel nga nagalakip sang espesipiko nga mga instruksion sa katinlo. (Deuteronomio 23:12-14) Kon magtuman sa sini ang mga Israelinhon, mangin mapagros sila kag malikawan nila ang mga balatian nga nagahalit sa iban nga pungsod nga wala sini nga kasuguan pareho sang Egipto.
Amo man subong, ang mga ‘nagatinlo sang ila kaugalingon gikan sa tanan nga dagta sang unod,’ nga nagalakip sang makahalalit nga mga bisyo pareho sang pagpanigarilyo, pag-abuso sa alkohol kag droga, makalikaw sa mga balatian sa lawas kag hunahuna, subong man sa hilaw nga kamatayon. Kag bangod wala kita nagaisahanon, pagpakita man sing konsiderasyon sa iban ang pagtuman naton sa kasuguan sang Dios parte sa katinlo.
Importante bala sa Dios ang katinlo sa moral kag espirituwal?
“Patya ninyo ang mga bahin sang inyo lawas . . . may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon, nga isa ka idolatriya. Bangod sini nga mga butang ang kasingkal sang Dios magaabot.”
—Colosas 3:5, 6.
ANG GINASILING SANG BIBLIA
Subong sang ginsambit, ginapalig-on kita sang Biblia nga “tinluan naton ang aton kaugalingon gikan sa tanan nga dagta sang unod kag espiritu.” Sang panahon ni Jesucristo, madamo nga tawo, lakip na ang Judiyo nga relihioso nga mga lider, ang nagatinguha gid nga mangin matinlo pero nagabalewala sang kasuguan sa moral kag espirituwal. (Marcos 7:1-5) Agod tadlungon ang ila pagtamod, nagsiling si Jesus: “Wala sing bisan ano gikan sa gua nga nagasulod sa isa ka tawo ang makadagta sa iya, bangod nagasulod ini . . . sa iya tinai, kag ginapagua ini sa imburnal.” Nagsiling pa sia: “Ang nagagua sa tawo amo ang nagadagta sa tawo; kay gikan sa sulod, gikan sa tagipusuon sang mga tawo, nagagua ang makahalalit nga mga pangatarungan: pagpakighilawas, pagpangawat, pagpatay, panghilahi, paghamkon, malaut nga buhat, pangdaya, lugak nga paggawi, mahisaon nga mata, . . . kag pagkadimakatarunganon. Ini tanan nga malaut nga mga butang . . . nagadagta sa tawo.”
Suno kay Jesus, ang mga tawo nga nagapabalor gid sa katinlo sang lawas pero nagabalewala sang kasuguan sang Dios sa moral kag espirituwal daw pareho lang sang tasa nga matinlo sa gua pero mahigko sa sulod.
Makatarunganon bala ang kasuguan sang Biblia?
“Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”
—1 Juan 5:3.
ANG GINASILING SANG BIBLIA
Ang Miqueas 6:8 nagasiling: “Ano bala ang ginakinahanglan sa imo sang GINOO kondi ang paghimo sing matarung, kag ang paghigugma sang kalolo, kag ang paglakat sing mapainubuson upod sa imo Dios?” Isa gid ini ka makatarunganon nga pangabay. Isa pa, gusto sang aton Manunuga nga tumanon naton sia bangod sang aton gugma sa iya. Kon himuon naton ini, mangin malipayon gid kita. (Salmo 40:8) Kag kon makasala kita, malugpayan kita sang kaluoy sang Dios. “Kaangay sang amay nga nagakaawa sa iya mga anak, sa amo ang GINOO nagakaawa sa mga nagakahadluk sa iya. Kay nakilala niya ang aton kahimtangan; nagadumdum sia nga kita yab-ok,” ukon maluya kag indi perpekto.
Sa kabug-usan, ang talaksan sang Dios sa pisikal, moral, kag espirituwal nga katinlo nagapakita sang iya kaayo kag gugma sa aton. Ang aton kahanda sa pagtuman sa sini nagapakita sang aton kaalam kag gugma sa iya.
Basi Manamian Ka Man
ANG LALANTAWAN
Ano ang Pagtamod sang Dios sa Pagpanigarilyo?
Wala gid ginsambit sa Biblia ang tabako, gani paano naton ini mahibaluan?
ANG LALANTAWAN
Ang Biblia Nagapabag-o sang Kabuhi—Oktubre 2012
Paano nauntat sang duha ka tawo ang ila mga bisyo, lakip ang alkohol kag mga droga, kag nangin matuod nga malipayon?
MAGMATA!
