NATAWO ako sa siudad sang Szerencs kag nagdaku sa minuro sang Tiszaladány sa aminhan-sidlangan sang Hungary. Sang Hunyo 1991, nagkadto kami sang pila ko ka abyan sa indi pamilyar nga lugar sa Tisza River. Abi ko madalom ang tubig, gani nag-dive ako. Nagsala gid ako! Nabali ang tatlo ko ka tul-an sa liog kag naapektuhan ang akon taludtod. Nakita sang mga abyan ko nga wala na ako nagahulag, gani ginhakwat nila ako antes pa ako malumos.

May animo gihapon ako kag nahibaluan ko nga malain gid ang natabo. May nangayo sing bulig, dayon may nag-abot nga helikopter kag gindala ako sa ospital para bulngon ang akon taludtod. Sang ulihi, ginsaylo ako sa Budapest, ang kapital nga siudad, para magpaayo. Tatlo ka bulan ako nga nagahigda lang. Bisan pa mahulag ko ang akon ulo, indi ko mahulag ang akon lawas. Sa edad nga 20, nagadepende na lang ako sa iban. Naluyahan gid ako amo nga gusto ko na lang mapatay.

Sang nakapauli na ako, gintudluan ang akon mga ginikanan kon paano ako atipanon. Pero mabudlay gid ini para sa ila. Pagligad sang mga isa ka tuig, nadepres ako. Sina nga tion, nakabaton ako sing laygay sa mga propesyonal nga nagpabag-o sang akon pagtamod sa akon kasablagan.

Ginpamensaran ko man ang parte sa kabuhi. May katuyuan bala ini? Ngaa natabo ini nga trahedya sa akon? Nagbasa ako sang mga magasin kag libro para makita ang sabat. Gintilawan ko man nga basahon ang Biblia, pero indi ko ini maintiendihan. Gani wala ko na ini ginbasa. Nakigsugilanon man ako sa isa ka pari, pero indi ako kontento sa iya ginsiling.

Dayon, sang tigpamulak sang 1994, may duha ka Saksi ni Jehova nga nagduaw kay Tatay, kag ginpangabay niya sila nga istoryahon ako. Nagpamati ako samtang ginapaathag nila ang katuyuan sang Dios nga himuon nga paraiso ang duta kag dulaon ang mga balatian kag pag-antos. Nalipay gid ako sa sini, pero nagaduhaduha pa ako. Pero ginbaton ko gihapon ang duha ka pasad sa Biblia nga libro. Sang nabasa ko na ini, gintanyagan ako sang mga Saksi sang pagtuon sa Biblia, kag nagpasugot ako. Ginpalig-on man nila ako nga mangamuyo.

 Samtang nagatuon kami, nasabat ang akon mga pamangkot paagi sa Biblia. Nakumbinsi man ako nga nagaulikid gid ang Dios sa akon. Sang ulihi, sang Septiembre 13, 1997, pagkatapos sang duha ka tuig nga pagtuon sa Biblia, nabawtismuhan ako sa bathtub sa amon balay. Isa yadto sa pinakamalipayon nga tion sa akon kabuhi.

Sang 2007, nagsaylo ako sa isa ka institusyon sa Budapest para sa mga may kasablagan. Bangod sini, madamo ako sing kahigayunan nga ipaambit sa iban ang matahom nga mga butang nga akon natun-an. Kon maayo ang tiempo, makagua ako para maistorya ang mga tawo sakay sa de-motor nga wheelchair nga ginakontrol ko paagi sa akon sag-ang.

Bangod sa pinansial nga bulig sang isa ka pamilya sa amon kongregasyon, nakabakal ako sing laptop nga magamit ko paagi sa paghulag sang akon ulo. Gani matawgan ko ang mga tawo paagi sa Internet kag makasulat sa mga indi maabtan sang akon mga kakongregasyon sa ila balay. Nakabulig ini sa akon nga mag-uswag sa pagpakig-istorya sa iban kag malikawan nga pensaron lang pirme ang akon kaugalingon.

Makatambong pa gani ako sa Cristianong mga pagtilipon. Ginahakwat sang mga kauturan ang akon wheelchair pasaka sa Kingdom Hall. Sa tion sang miting, kon puede magkomento ang mga tagpalamati, ang utod nga tupad ko amo ang nagaalsa sang iya kamot para sa akon. Dayon, ginauyatan niya ang akon Biblia ukon ginatun-an nga publikasyon samtang nagakomento ako.

Nagasakit pirme ang akon lawas kag sa iban ko ginasalig ang halos tanan. Gani, ginapung-awan ako kon kaisa. Pero nalugpayan ako bangod abyan ko si Jehova nga Dios, kag nahibaluan ko nga ginapamatian niya ako kon ginapautwas ko ang akon mga kabalaka sa iya. Napalig-on man ako paagi sa pagbasa sang Biblia adlaw-adlaw kag sang akon mga kauturan sa espirituwal. Ang ila pagpakig-abyan, pagpalig-on, kag pagpangamuyo nakabulig sa akon nga mangin balanse.

Ginlugpayan ako ni Jehova sang kinahanglan ko gid ini. Ginhatagan man niya ako sing paglaum nga makatigayon sang mapagros nga panglawas sa bag-o nga kalibutan. Gani, ginapaabot ko gid ang tion nga ‘magalakat ako kag magatumbo kag dayawon ang Dios’ bangod sa iya daku nga gugma kag kaayo.—Binuhatan 3:6-9.