ANG GINASILING SANG MGA TAWO

Sa pila ka kultura ang pagpanghilahi wala ginatamod nga sala, ilabi na sa bahin sang mga bana. Para naman sa iban, ang pag-asawahay indi permanente nga pag-updanay.

ANG GINASILING SANG BIBLIA

Sa Biblia, ang pagpanghilahi nagakahulugan sing hungod nga pagpakigsekso sang bana ukon asawa sa isa nga indi nila tiayon. (Job 24:15; Hulubaton 30:20) Ang pagpanghilahi makangilil-ad sa pagtamod sang Dios. Sang dumaan nga Israel, ang silot sini kamatayon. (Levitico 18:20, 22, 29) Gintudluan ni Jesus ang iya mga sumulunod nga indi magpanghilahi.—Mateo 5:27, 28; Lucas 18:18-20.

KON NGAA DAPAT INI BINAGBINAGON

Ginaguba sang mga nagapanghilahi ang sagrado nga panumpa nga ginhimo nila sa ila tiayon sang nagpakasal sila. ‘Sala man ini batok sa Dios.’ (Genesis 39:7-9) Masakit nga ginapabulag sang pagpanghilahi ang mga kabataan sa ila ginikanan. Isa pa, ang Biblia nagpaandam nga “hukman sang Dios . . . ang mga makihilahion.”—Hebreo 13:4.

“Dapat padunggan sang tanan ang pag-asawahay kag ang bana kag asawa dapat mangin matutom sa isa kag isa.”—Hebreo 13:4.

ANG GINASILING SANG BIBLIA

Ginatugot sang Biblia ang pagbulag sang isa sa iya tiayon kon nakahimo ini sing seksuwal nga imoralidad. (Mateo 19:9) Buot silingon pagkatapos nga nagluib ang isa, ang inosente nga tiayon may kinamatarong sa pagdesisyon kon bala bulagan niya ukon indi ang iya tiayon. Isa ini ka personal nga desisyon.—Galacia 6:5.

Sa pihak nga bahin, sa pagtamod sang Dios ang pag-asawahay isa ka sagrado kag tubtob buhi nga pag-updanay. (1 Corinto 7:39) Maakig ang Dios kon makigbulag ang isa bangod sa witiwiti nga mga rason, pareho sang gamay nga mga butang nga iya naindi-an sa iya tiayon. Gani ang pagbulagay isa ka mabug-at nga desisyon.—Malaquias 2:16; Mateo 19:3-6.

“Nagasiling ako sa inyo nga ang nagadiborsio sa iya asawa nga wala makahimo sing seksuwal nga imoralidad, nagabutang sa iya asawa sa katalagman nga magpanghilahi.”—Mateo 5:32.

ANG GINASILING SANG BIBLIA

Huo. Ang Biblia nagsiling nga ginakaluy-an sang Dios ang nagahinulsol kag nagabag-o—lakip na ang nagpanghilahi. (Binuhatan 3:19; Galacia 5:19-21) Ang matuod, ang Biblia nagasugid tuhoy sa mga lalaki kag babayi nga nag-untat sa pagpanghilahi kag sang ulihi nangin abyan sang Dios.—1 Corinto 6:9-11.

Ang kaluoy sang Dios nakita sa kaso ni Hari David sang dumaan nga Israel. Nakighilahi si David sa asawa sang isa sang iya mga opisyal sang soldado. (2 Samuel 11:2-4) Maathag ang ginsiling sang Biblia nga “malain gid sa panulok ni Jehova ang ginhimo ni David.” (2 Samuel 11:27) Pagkatapos nga ginsabdong sia, naghinulsol sia kag ginpatawad sang Dios. Pero gin-ani gid ni David ang masubo nga resulta sang iya pagpakasala. (2 Samuel 12:13, 14) Sang ulihi, ang maalam nga si Hari Solomon nagsiling nga ang mga nagapanghilahi ukon “ang nagapakighilawas . . . kulang sa maayo nga paghangop.”—Hulubaton 6:32.

ANO ANG HIMUON MO?

Kon nakapanghilahi ka, mangayo sing kapatawaran sa Dios kag sa imo tiayon. (Salmo 51:1-5) Dumti ang pagpanghilahi subong sang pagdumot sang Dios sa sini. (Salmo 97:10) Mangin determinado nga likawan ang pornograpiya, seksuwal nga pagdalamguhanon, pagpakiat, ukon bisan ano nga butang nga magadul-ong sa imo nga handumon ang isa nga indi mo tiayon.—Mateo 5:27, 28; Santiago 1:14, 15.

Kon biktima ka sang pagpanghilahi sang imo tiayon, makasalig ka nga naintiendihan sang Dios ang imo balatyagon. (Malaquias 2:13, 14) Pangabaya ang iya mahigugmaon nga lugpay kag panuytoy, kag “magaalay-ay [sia] sa imo.” (Salmo 55:22) Kon patawaron mo ang imo tiayon kag padayon kamo nga mag-updanay subong mag-asawa, dapat manikasog gid kamo nga pabakuron liwat ang inyo kaangtanan.—Efeso 4:32.

“Ginpatawad ni Jehova ang imo sala,” siling ni manalagna Natan sa mahinulsulon nga si David pagkatapos sia nakapanghilahi.—2 Samuel 12:13.