“Abi ko sia na gid ang para sa akon. ‘Gusto ko makaupod ini nga lalaki tubtob buhi ako,’ siling ko sa akon kaugalingon. Pero pagligad sang duha ka bulan nga deyt, kinahanglan ko sia bulagan. Daw indi ako makapati nga ang maayo nga pagtamdanay sa umpisa madasig nga natapos!”—Anna. *

“Pamatyag ko bagay gid kami. Para sa akon, daw mag-asawa na kami. Apang samtang nagaligad ang tion, narealisar ko nga indi gali kami bagay. Sang nakita ko nga nagsala gali ako, nakigbulag ako sa iya.”—Elaine.

Naeksperiensiahan mo man bala ini? Kon amo, ini nga artikulo makabulig sa imo nga maatubang ini nga kahimtangan.

Ang pagbulagay mahimo nga masakit, bisan sa isa nga nakigbulag. “Kalain gid sang pamatyag ko!” siling sang pamatan-on nga si Sarah, nga nakigbulag sa iya nobyo pagligad sang anom ka bulan. “Sa umpisa bahin sia sang akon kabuhi kag palaabuton; pero gulpi lang sia nadula. Dayon makabati ako sing mga kanta nga nanamian namon nga duha, kag madumduman ko ang amon masadya nga pag-upod. Kon makakadto ako sa mga lugar nga ginakadtuan namon sadto, nasakitan gid ako nga indi ko sia upod. Nabatyagan ko ini tanan bisan ako ang nakigbulag sa iya!”

Bisan pa masakit, mas maayo nga magbulagay na lang. “Indi mo gusto sakiton ang balatyagon sang tawo,” siling ni Elaine. “Sa pihak nga bahin, narealisar mo nga sa ulihi pareho kamo nga masakitan kon padayunon ninyo ang pagnobyahanay bisan indi na maayo ang inyo relasyon.” Ugyon man sa sini si Sarah. “Sa banta ko kon indi ka na malipayon sa pagpakigdeyt sa isa ka tawo, mahimo nga indi ka man malipayon sa pagpamana sa iya, gani mas maayo nga magbulagay na lang kamo,” siling niya.

Ang pagbulagay wala nagapahangop nga napaslawan ka. Ang madinalag-on nga pagnobyahanay nagadangat sa isa ka desisyon, kag indi pirme sa pag-asawahay. Kon ang isa sa inyo nagapangduhaduha gid, mahimo nga mas maayo nga magbulagay kamo. Kon matabo ina, ang indi madinalag-on nga relasyon wala nagapahangop nga napaslawan ka. Malampuwasan mo ini! Paano?

Batuna ang kasakit. “Indi lang abyan ang nadula sa akon; nadula ang akon suod gid nga abyan,” siling ni Elaine, nga ginkutlo sa umpisa. Kon makigbulag ka sa isa nga suod gid sa imo, normal lang nga masakitan ka. “Kon mabugto ang isa ka relasyon,” siling sang pamatan-on nga si Adam, “masakitan ka gid, bisan pa nabal-an mo nga amo ini ang pinakamaayo nga himuon.” Mahimo nga pareho kamo sing nabatyagan ni Hari David sang Biblia. “Sa bug-os nga gab-i nahumog sang luha ang akon hiligdaan,” sulat niya sang nagapangalisod sia. (Salmo 6:6) Kon kaisa ang pinakamaayo nga paagi para malampuwasan ang kasakit amo ang pagbaton nga normal lang ini, indi ang pagtinguha nga likawan ini. Ang pagbaton sang imo ginabatyag mahimo nga amo ang una nga tikang para maumpawan ka.—Prinsipio sa Biblia: Salmo 4:4.

Makig-upod sa mga tawo nga nagaulikid sa imo. Ang matuod, mahimo nga indi ina mahapos. “Sang primero, indi ko gani gusto makig-atubang sa mga tawo,” siling ni Anna, nga ginkutlo kaina. “Kinahanglan ko ang tion para makapamensar sing maayo kag mahangpan kon ano ang natabo.” Apang sang ulihi, nakita ni Anna nga maalamon ang pagpakig-upod sa suod nga mga abyan nga makapalig-on sa iya. “Naathagan na ako karon,” siling niya, “kag indi na tuman kasakit ang pagbulagay pareho sa umpisa.”—Prinsipio sa Biblia: Hulubaton 17:17.

Manuto sa natabo. Pamangkuta ang imo kaugalingon: ‘Ini bala nga eksperiensia nagpakita kon ano pa ang akon pauswagon? Kon may bag-uhon gid man ako sa masunod ko nga relasyon, ano ang akon himuon?’ “Pagligad sang tion, mas nahangpan ko kon ano ang natabo,” siling sang pamatan-on nga si Marcia. “Apang kinahanglan ko maghulat asta makapamensar ako sing maayo kag indi magpadala sa akon balatyagon.” Amo man sini ang nabatyagan ni Adam, nga ginsambit kaina. Sia nagsiling: “Naglawig pa ang isa ka tuig kag naumpawan ako sa amon pagbulagay. Mas malawig pa sa sini antes ako nakatuon sa natabo sa akon. Nagtudlo ini sa akon sing madamo nga butang tuhoy sa akon kaugalingon, sa isa nga tuhay sing sekso, kag sa mga relasyon. Indi na karon masyado kasakit ang amon pagbulagay.”

Ipangamuyo ang imo kabalaka. Ang Biblia nagasiling nga “ginaayo [sang Dios] ang buong sing tagipusuon; kag ginabugkusan niya ang ila mga pilas.” (Salmo 147:3) Indi ang Dios ang nagapili sang imo mangin tiayon—kag indi sia ang balasulon kon magbulagay kamo—apang interesado sia sa imo kaayuhan. Isugid ang imo mga ginabatyag sa iya paagi sa pangamuyo.—Prinsipio sa Biblia: 1 Pedro 5:7.