ANG isa sa madamo nga proseso nga nagapaposible nga mabuhi ang tawo amo ang ikasarang sang lawas sa pag-ayo sang pilas kag pagpatubo sang bag-o nga tisyu agod islan ang nasamad nga tisyu. Ang proseso nagasugod dayon kon mapilas ang isa.

Binagbinaga: Ang proseso sang pag-ayo nahimo paagi sa pasunod kag komplikado nga pagpanghikot sang mga selula:

• Ang platelet nagatapik sa mga tisyu sa palibot sang pilas, amo nga nagakorta ang dugo kag nagakipot ang nasamad nga mga ugat.

• Ang pagbanog nagaamlig agod indi maimpeksion ang pilas kag ginakuha sini ang bisan ano nga “higko” bangod sa pagkapilas.

• Sa sulod sang pila ka adlaw, ginaislan sang lawas ang nasamad nga tisyu, ginapakipot ang pilas, kag ginaayo ang nasamad nga mga ugat.

• Sa katapusan, nagakugan ini kag nagapali ang pilas.

Ang ikasarang sang dugo sa pagkorta naghatag sing ideya sa mga researcher nga maghimo sing plastik nga “makakay-o” sing kinaugalingon. Ini nga mga materyal may nagaraya nga magagmay nga mga tubo nga nagaunod sing duha ka kemikal nga nagatubod kon magisi ukon maglitik ang plastik. Kon magsamo ining duha ka kemikal, nagahimo ini nga gel nga nagalatom sa nagisi nga bahin amo nga nagakipot ang mga litik kag mga buho sini. Kon magtig-a ang gel, nagahunit ini amo nga mabalik ang kapag-on sang orihinal nga materyal. Ang isa ka researcher nagsiling nga ining artipisyal nga pagpaayo nga ginatun-an pa subong “nagapahanumdom” sa kon ano ang nagaluntad na nga daan sa kinaugali.

Ano sa banta mo? Ang ikasarang sang lawas sa pag-ayo sang pilas resulta bala sang ebolusyon? Ukon gindesinyo ini?