SILING SANG IBAN INDI. Ang isa ka doktor nagpaanggid sa paggamit sang Biblia bilang giya sa paggamit sang libro nga ginsulat sang mga 1920 sa pagtudlo sang kemistri subong. Mahimo pa gani mamangkot ang mga wala nagapati sa Biblia kon bala gamiton mo ang manual sang daan nga kompyuter sa paggamit sang bag-o nga kompyuter. Gani, para sa iban ang Biblia indi na mapuslanon.

Ngaa gamiton sang isa inang daan katama nga giya sa moderno nga kalibutan subong? Kay sa subong, madamo katama sing website kag mga blog ang nagahatag sing pinakabag-o nga laygay kag giya. Ang mga programa sa TV nagahatag sing laygay halin sa mga psychologist, mga eksperto, kag mga awtor. Kag madamo man sing libro nga nagaunod sang mga laygay, kag binilyon ka dolyar ang kita sa pagbaligya sini.

Sa tanan nga bag-o nga impormasyon nga mabaton subong, ngaa magpagiya kita sa Biblia—nga isa ka libro nga mga 2,000 ka tuig na nga natapos ang pagsulat? Husto ayhan ang mga wala nagapati sa Biblia sa pagsiling nga ang paggamit sining daan katama nga libro pareho lang sa paggamit sing daan nga libro sa kemistri ukon manual sang kompyuter? Ang matuod, sala ina nga pangatarungan. Ang siensia kag teknolohiya madasig nga nagabag-o, pero nagabag-o man bala ang panguna nga mga kinahanglanon sang tawo? Gusto gihapon mahibaluan sang mga tawo ang katuyuan sang kabuhi kag kon paano makabaton sing kalipay kag kasiguruhan, maayo nga relasyon sa pamilya, kag maayo nga mga abyan.

Bisan pa daan na, mahatag sang Biblia ini nga mga kinahanglanon kag ang iban pa. Ginasiling man sini nga gingiyahan sang aton Manunuga ang pagsulat sini. Nagahatag ini sing giya sa tanan nga bahin sang aton kabuhi kag nagabulig sa aton para maatubang ang bisan ano nga problema. (2 Timoteo 3:16, 17) Isa pa, ang mga laygay sini wala nagalubad—wala gid ini nagadaan! Ang Biblia mismo nagasiling: “Ang pulong sang Dios buhi.”—Hebreo 4:12.

Matuod bala ang ginasiling sang Biblia? Daan na bala ini, ukon amo ini ang may pinakamaayo kag mapuslanon nga laygay subong—nga daw buhi ini nga libro? Ang katuyuan sini nga edisyon sang Ang Lalantawan, ang una nga serye sa sining pinasahi nga mga isyu, amo ang pagbulig sa imo nga makita ang sabat sa sini nga mga pamangkot.