Si Rosie nagsiling, “Pirme lang ako nagakabalaka sing sobra kay ginaimadyin ko nga may mas malain pa nga matabo.” Ano nga mga bersikulo sa Biblia ang nakabulig sa iya? Isa sini amo ang Mateo 6:34: “Indi gid ninyo pagkabalak-i ang buas, kay ang buas may kaugalingon nga mga kabalaka. Ang tagsa ka adlaw may kaugalingon nga mga palaligban.” Nagsiling si Rosie nga ang ginhambal ni Jesus nakabulig sa iya nga indi mabalaka sa mga mahimo matabo. Nagsiling pa sia, “Indi ko na pagdugangan ang akon mga problema, gani indi ko na pagkabalak-an ang mga butang nga wala pa matabo kag mahimo indi na matabo.”

Si Yasmine nagbatyag man nga daw malumos na sia sang kabalaka. “Pila ka adlaw ako nga nagahibi sina nga semana, kag pila man ka gab-i nga indi ako makatulog. Daw ginapatay ako sang negatibo nga balatyagon.” Ano nga bersikulo sa Biblia ang nakabulig sa iya? Nagsiling sia nga nakabulig sa iya ang 1 Pedro 5:7: ‘Itugyan ninyo sa Dios ang tanan ninyo nga kabalaka, kay nagaulikid sia sa inyo.’ Si Yasmine nagsiling: “Padayon ako nga nangamuyo kay Jehova, kag ginasabat niya ini. Daw pareho lang nga ginkuha ang akon mabug-at nga ginapas-an. Kon kaisa nagapensar ako sing negatibo, pero nakahibalo na ako kon paano ini atubangon.”

Ang pamatan-on nga si Isabella nagsiling: “Siguro napanubli ko ang pagpabuyanbuyan kay Tatay kay amo man sia sina. Wala ko ginahimo dayon ang importante nga mga butang bisan wala man ako sang ginaobra kundi magrelaks lang ukon magtan-aw sang TV. Makahalit gid ini nga batasan kay nagadugang lang ini sang stress kag indi na maayo ang kalidad sang obra sang isa.” Nakabulig sa iya ang prinsipio sa 2 Timoteo 2:15, nga nagasiling: “Himua ang imo bug-os nga masarangan nga ipresentar ang imo kaugalingon nga kalahamut-an sa Dios, isa ka manugpangabudlay nga wala sing ginakahuya.” Si Isabella nagsiling, “Indi ko gusto nga mahuy-an si Jehova bangod nagpabuyanbuyan ako sa akon ulubrahon.” Daku gid ang iya ginbag-o.

Si Kelsey nagsiling man: “Ginaobra ko lang ang akon proyekto kon dali na lang ang deadline. Pero nagahibi ako, indi makatulog, kag nagakabalaka. Indi gid maayo ang epekto sini sa akon.” Nabuligan si Kelsey sang ginasiling sang Hulubaton 13:16: “Ang tawo nga maalamon nagahunahuna sing maayo antes sia maghulag, apang ang buangbuang nagapakita sang iya kabuangan.” Ginpaathag niya kon paano ang pagpamalandong sa sini nga bersikulo nakabulig sa iya: “Mas maayo gid nga mangin praktikal kag magplano sing abanse. May listahan na ako subong nga ginabutang sa akon lamesa para maiskedyul ko ang akon mga ulubrahon, kag nabuligan ako sini nga indi na magpabuyanbuyan sa akon mga hilimuon.”

“Ginbayaan ako sang akon bana, kag ginbilin sa akon ang apat namon ka magagmay pa nga kabataan,” siling ni Kirsten. Ano nga prinsipio sa Biblia ang nakabulig sa iya? Ang mabasa sa Hulubaton 17:17: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.” Nangayo si Kirsten sing bulig sa mga pareho niya nga nagaalagad kay Jehova. Ano nga bulig ang iya nabaton? “Ginbuligan ako sang akon mga abyan sa madamo nga paagi! Ang iban nagbilin sing groseri kag mga bulak sa amon puertahan. Tatlo ka beses nga ginbuligan nila ako kag ang akon kabataan sang nagsaylosaylo kami sing balay. May nagbulig man sa akon nga makakita sing trabaho. Wala gid ako ginpabay-an sang akon mga abyan.”

Si Delphine, nga ginsambit kaina, nagbatyag man sing grabe nga kasubo. Pagkatapos sang natabo sa iya, sia nagsiling: “Daw ara lang ako sa gua sang isa ka balaligyaan nga nagaisahanon nga nagatan-aw lang sa mga tawo nga ara sa sulod. Grabe gid ang akon kasubo.” Ang isa nga nakabulig sa iya amo ang Salmo 68:6: “Ginahatagan sang Dios sing puluy-an ang mga nagaisahanon.” Sia nagpaathag: “Nahibaluan ko nga indi lang literal nga puluy-an ang ginapatuhuyan sini nga bersikulo subong. Kundi ginatanyagan kita sang Dios sang espirituwal nga puluy-an nga may matuod nga seguridad nga nagabulig sa aton nga makabaton sing maayo kag suod nga kaangtanan sa iban nga nagapalangga kay Jehova. Pero, para mangin suod ako sa iban, dapat mangin suod ako anay kay Jehova. Gani ang Salmo 37:4 nakabulig sa akon nga mahimo ina: ‘Magkalipay ka kay Jehova, kag ihatag niya ang mga handum sang imo tagipusuon.’”

Nagsiling sia: “Narealisar ko nga kinahanglan ko pabakuron pa gid ang akon kaangtanan kay Jehova. Sia gid ang pinakamaayo sa tanan. Dayon ginlista ko ang mga puede ko himuon upod sa iban, para mangin suod ako sa mga tawo nga nagapalangga man kay Jehova. Natun-an ko nga tan-awon ang maayo sa iban kag indi ang ila mga kakulangan.”

Siempre, ang mga abyan nga nagaalagad sa Dios indi pa perpekto. Ang mga Saksi ni Jehova may mga problema man. Pero ang paghanas sang Biblia nagapahulag sa mga tawo nga magbulig sa iban asta sa ila masarangan. Maalamon gid ang pagpakig-abyan sa sini nga mga tawo. Pero, makabulig bala ang mga prinsipio sa Biblia nga mabatas ang mga problema nga indi na masolbar subong, pareho sang malala nga balatian kag grabe nga kasubo?