Ang Kamatuoran Parte sa Palaabuton
Nahunahuna mo na bala kon ano ang matabo sa palaabuton? Ang Biblia nagasugid sa aton nga may importante nga mga hitabo nga madali na lang matabo nga makaapektar sa tanan nga tawo sa duta.
Ginpaathag ni Jesus kon paano naton ‘mahibaluan nga malapit na ang Ginharian sang Dios.’ (Lucas 21:31) Nagtagna sia nga may mga inaway, mabaskog nga mga linog, kakulang sing pagkaon, mga balatian—mga butang nga makita naton nga nagakatabo na subong.—Lucas 21:10-17.
Ginapakita man sang Biblia nga sa “katapusan nga mga adlaw” sang paggahom sang tawo, mangin malain ang pamatasan sang mga tawo. Mabasa mo ina sa 2 Timoteo 3:1-5. Kon makita mo ini nga mga batasan sang mga tawo subong, sigurado nga mapati ka gid nga ini nga tagna sang Biblia nagakatabo na subong.
Ano ang kahulugan sini? Malapit na ang tion nga himuon sang Ginharian sang Dios nga mas maayo ang kabuhi sa duta. (Lucas 21:36) Sa Biblia, ang Dios nagpromisa sing maayo nga mga butang para sa duta kag sa mga tawo nga magapuyo sa sini. Ari ang pila ka halimbawa.
MAAYO NGA PAGGINAHOM
“Ginhatagan sia [si Jesus] sing awtoridad sa paggahom, sing kadungganan, kag sing ginharian, agod mag-alagad sa iya ang tanan nga katawhan halin sa lainlain nga mga pungsod kag mga lenguahe. Ang iya paggahom wala sing katapusan, kag indi malaglag ang iya ginharian.”—DANIEL 7:14.
Ang kahulugan sini: Mangin malipayon ka sa mas superyor nga gobierno nga magagahom sa bug-os nga kalibutan diin gintangdo sang Dios si Jesus nga Hari.
MAAYO NGA PANGLAWAS
“Wala sing pumuluyo nga magasiling: ‘Nagamasakit ako.’”—ISAIAS 33:24.
Ang kahulugan sini: Indi ka na gid magmasakit ukon madis-ebol; mahimo ka mabuhi sing wala katapusan.
BUG-OS NGA PAGHIDAIT
“Ginapauntat niya ang mga inaway sa bug-os nga duta.”—SALMO 46:9.
Ang kahulugan sini: Wala na sing inaway nga matabo kag madula na ang tanan nga pag-antos nga resulta sini.
ANG DUTA MAPUNO SING MAAYO NGA MGA TAWO
“Madula na ang mga malauton . . . Ang mga mahagop magapanubli sang duta.”—SALMO 37:10, 11.
Ang kahulugan sini: Madula na ang malain nga mga tawo, pero magapabilin ang mga tawo nga nagatuman sa Dios.
ANG BUG-OS NGA DUTA MANGIN PARAISO
“Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini.”—ISAIAS 65:21, 22.
Ang kahulugan sini: Mangin matahom na ang bug-os nga duta. Tumanon sang Dios ang aton ginapangamuyo nga ang iya kabubut-on matuman “sa duta.”—Mateo 6:10.
Basi Manamian Ka Man
SABAT SA MGA PAMANGKOT SA BIBLIA
Ano ang Himuon sang Ginharian sang Dios?
Hibalua kon ano ang matabo sa paggahom sang gobierno sang Dios sa duta.
