“O Manugpamati sang pangamuyo, ang tanan nga sahi sang tawo magapalapit sa imo.”—Salmo 65:2.

Siling sang iban, nagatawhay ang ila pensar kon nagapangamuyo sila. Gani bisan wala sila nagapati nga may nagapamati sa ila, nagapangamuyo sila gihapon. Pero nagapangamuyo kita indi lang para mangin maayo ang aton pamatyag kag maatubang ang aton mga problema. Ginapasalig kita sang Biblia nga “si Jehova * malapit sa tanan nga nagapanawag sa iya, sa tanan nga nagapanawag sa iya sa kamatuoran. . . . Ginapamatian niya ang ila pagpangayo sing bulig.”—Salmo 145:18, 19.

Gani sigurado kita nga ginapamatian ni Jehova nga Dios ang mga pangamuyo sang mga nagasimba sa iya. Mahigugmaon sia nga nagasiling: “Magapanawag kamo sa akon kag magadangop kamo kag magapangamuyo sa akon, kag magapamati ako sa inyo.”—Jeremias 29:12.

“Magpadayon kamo sa pagpangamuyo.”—Roma 12:12.

Sa Biblia, ginapalig-on kita nga ‘magpadayon sa pagpangamuyo’ kag ‘padayon nga magpangamuyo sa tagsa ka higayon.’ Maathag nga gusto ni Jehova nga Dios nga mangamuyo kita sa iya.—Mateo 26:41; Efeso 6:18.

Ngaa gusto sang Dios nga mangamuyo kita sa iya? Binagbinaga: May ginikanan bala nga indi gusto nga ang iya bata magsiling sa iya “Buligi ’ko ’Tay”? Mahimo bal-an na sang amay kon ano ang kinahanglan kag ginabatyag sang iya bata. Pero kon mabatian niya nga nagapangayo sang bulig ang iya bata, mabatyagan niya nga ginasaligan sia sang iya bata kag malapit gid ini sa iya. Pareho man sa sini kon nagapangamuyo kita kay Jehova nga Dios. Ginapakita naton nga ginasaligan naton sia kag gusto naton nga mangin malapit sa iya.—Hulubaton 15:8; Santiago 4:8.

‘Itugyan ninyo sa iya ang tanan ninyo nga kabalaka, kay nagaulikid sia sa inyo.’—1 Pedro 5:7.

Gusto sang Dios nga mangamuyo kita sa iya bangod palangga niya kita kag nagaulikid sia sa aton. Kabalo gid sia sang aton mga problema kag mga ginakabalak-an, kag gusto niya nga buligan kita.

Sa bilog niya nga kabuhi, nangamuyo si Hari David kay Jehova nga Dios para buligan sia kag para isugid sa Iya ang iya mga ginahunahuna kag ginabatyag. (Salmo 23:1-6) Ano ang pagtan-aw sang Dios kay David? Palangga sang Dios si David kag ginpamatian niya ang iya madamo nga pangamuyo. (Binuhatan 13:22) Pareho kay David, ginapamatian sang Dios ang aton mga pangamuyo bangod nagaulikid sia sa aton.

Amo ini ang ginsiling sang isa sang mga nagsulat sang mga salmo sa Biblia. Sigurado sia nga ginapamatian sang Dios ang iya mga pangamuyo, kag daku gid ang epekto sini sa iya. Nabatyagan niya nga nangin mas malapit sia sa Dios kag may kusog nga maatubang ang kalisdanan kag kasubo sang kabuhi.—Salmo 116:1-9.

Kon kumbinsido kita nga ginapamatian sang Dios ang aton mga pangamuyo, magapadayon kita sa pagpakig-istorya sa iya. Binagbinaga ang eksperiensia ni Pedro, nga nagaistar sa naaminhan nga bahin sang Spain. Napatay sa aksidente sa salakyan ang iya 19 anyos nga bata nga lalaki. Grabe gid ang kasubo ni Pedro, gani pirme sia nagapangamuyo para ipautwas sa Dios ang iya ginabatyag kag para mangayo sing paumpaw kag bulig. Ano ang natabo? “Ginsabat ni Jehova ang akon mga pangamuyo paagi sa paumpaw kag bulig nga nabaton ko kag sang akon asawa halin sa pareho namon nga mga Cristiano,” siling ni Pedro.

Wala man nabuhi liwat ang iya bata, pero daku gid ang nabulig sang pangamuyo kay Pedro kag sa iya pamilya. Ang iya asawa, nga si María Carmen, nagsiling: “Nabuligan ako sang pangamuyo nga mabatas ang kasubo. Kabalo ako nga naintiendihan ako ni Jehova nga Dios. Kay kon mangamuyo ako sa iya, mabatyagan ko ang kalinong kag nagakalma ako dayon.”

Maathag gid nga ginapakita sang Biblia kag sang personal nga mga eksperiensia nga ginapamatian sang Dios ang mga pangamuyo. Pero maathag man nga may mga pangamuyo nga wala ginasabat sang Dios. Ngaa ginasabat sang Dios ang iban nga pangamuyo, kag ang iban wala?