KON PAANO MATAPOS ANG WALA UNTAT NGA PAGDUMTANAY
2 | Indi Magtimalos
Panudlo sang Biblia:
“Indi magbalos sing malaut sa malaut kay bisan sin-o. . . . Himua ang masarangan ninyo sa pagpakighidait sa tanan nga tawo. Indi kamo magtimalos, . . . kay nasulat na: ‘“Akon ang pagtimalos; ako ang magabalos,” siling ni Jehova.’”—ROMA 12:17-19.
Ang Buot Silingon:
Natural lang nga magkaakig kon nahimuan kita sing malain. Pero indi gusto sang Dios nga magtimalos kita. Sa baylo, ginpalig-on niya kita nga maghulat sa iya kay sa indi na lang madugay, tadlungon niya ang tanan nga kalainan.—Salmo 37:7, 10.
Ang Puede Mo Himuon:
Kon magtimalos ang indi perpekto nga mga tawo, mas labi pa gid nga indi mag-untat ang pagdumtanay. Gani kon may nagpaakig ukon naghalit sa imo, indi magbalos. Punggi ang imo kaugalingon kag tinguhai nga mangin kalmado. Sa pila ka sitwasyon, mahimo maghaganhagan ang imo kaugot kon palampason mo na lang ang natabo. (Hulubaton 19:11) Siempre may mga bes man nga kinahanglan mo ireport ang natabo. Halimbawa, kon nabiktima ka sang isa ka krimen mahimo nga gusto mo ini ireport sa mga pulis ukon sa iban pa nga awtoridad.
Ginahalitan mo lang ang imo kaugalingon kon magtimalos ka
Pero ano abi kon daw wala sing malinong nga paagi para masolusyunan ang problema? Ukon ano abi kon nahimo mo na ang tanan mo nga masarangan para masolbar ini sa malinong nga paagi? Indi magtimalos kay magapalala lang ina sang sitwasyon. Kon himuon mo ini, matapos mo ang wala untat nga pagdumtanay. Matun-an mo man nga magsalig sa paagi sang Dios sa pagsolbar sang problema. “Magsalig ka sa iya, kag buligan ka niya.”—Salmo 37:3-5.
Basi Manamian Ka Man
ANG BIBLIA NAGAPABAG-O SANG KABUHI
Gusto Ko Dulaon ang Inhustisya
Nag-entra si Rafika sa isa ka grupo nga nagapakigbato para dulaon ang inhustisya sa kalibutan. Pero niya ang promisa sang Biblia nga paghidait kag katarungan sa idalom sang paggahom sang Ginharian sang Dios.
ANG BIBLIA NAGAPABAG-O SANG KABUHI
San-o Mangin Madinalag-on ang Mainunungon nga Gugma Batok sa Dumot?
Mabudlay gid dulaon ang dumot sa iban nga rasa. Tan-awa kon paano nangin madinalag-on sa paghimo sini ang isa ka Judiyo kag isa ka Arabo.
SABAT SA MGA PAMANGKOT SA BIBLIA
Ano ang Ginasiling sang Biblia Parte sa Pagtimalos?
Madamo sing tawo nga gusto magtimalos, pero nabuligan sila sang mga laygay sang Biblia nga indi ini paghimuon.
