DAPAT gid kita magpasalamat kon makabaton kita sang espesyal nga regalo. Amo ina ang leksion nga ginpadaku ni Jesus sang gin-ayo niya ang napulo ka tawo nga may malala nga balatian nga wala pa sing bulong sadto nga tion. Ang isa sa ila nagbalik “kag ginhimaya ang Dios sa mabaskog nga tingog.” Si Jesus nagsiling: “Indi bala napulo ang gin-ayo? Diin na ang siam?” (Lucas 17:12-17) Ang leksion? Kadasig lang sa aton malipat sa maayo nga ginhimo sang iban sa aton.

Ang gawad pinasahi gid nga regalo. Wala na sing regalo nga mas labaw pa sa sini. Gani, ano ang himuon mo bangod sa ginhimo sang Dios para sa imo?

• Kilalaha ang naghatag. Ang gawad indi awtomatiko nga nagahatag sing kabuhi nga wala sing katapusan sa tanan nga tawo. Amo kon ngaa si Jesus nagsiling sa iya pangamuyo sa Dios: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Kon may magsiling sa imo nga may tawo nga nagluwas sang imo kabuhi sang bata ka pa, indi bala gusto mo makilala pa gid ina nga  tawo kag hibaluon kon ngaa ginluwas ka niya? Gusto gid ni Jehova nga Dios, ang naghatag sing nagaluwas-kabuhi nga regalo nga gawad, nga kilalahon mo sia kag makigsuod ka sa iya. “Magpalapit kamo sa Dios,” siling sang Biblia, “kag magapalapit sia sa inyo.”—Santiago 4:8.

• Magtuo sa gawad. “Ang isa nga nagatuo sa Anak makatigayon sang kabuhi nga wala sing katapusan.” (Juan 3:36) Paano mo mapakita nga nagatuo ka? Dapat may himuon ka para mapakita mo nga nagatuo ka sa gawad. (Santiago 2:17) Ano ang dapat mo himuon? Mangin imo ang isa ka regalo kon batunon mo ini. Gani dapat mo man batunon ang gawad. Paano? Hibalua kon ano ang gusto sang Dios nga himuon mo kag tumana ini. * Mangamuyo sa Dios nga patawaron ka niya kag hatagan sing matinlo nga konsiensia. Magpalapit sa Dios nga nagasalig nga paagi sa gawad, mabaton sang tanan nga nagatuo sa sini ang palaabuton nga may paghidait, kalig-unan, kag kabuganaan tubtob sa wala sing katapusan!—Hebreo 11:1.

• Magtambong sa Memoryal sang kamatayon ni Jesus. Ginsugdan ni Jesus ang isa ka okasyon nga pagahiwaton kada tuig para pahanumdumon kita parte sa gawad. Sa pagsaulog sini nga okasyon, sia nagsiling: “Padayon ninyo nga himua ini sa pagdumdom sa akon.” (Lucas 22:19) Saulugon sang mga Saksi ni Jehova ang kamatayon ni Jesus sa Martes, Abril 11, 2017, pagtunod sang adlaw. Ang programa nga magalawig sing mga isa ka oras, nagalakip sing pamulongpulong nga nagapaathag kon ngaa importante ang kamatayon ni Jesus kag kon paano ini makahatag sing mga benepisyo subong kag sa palaabuton. Sang nagligad nga tuig, mga 20 ka milyon ka tawo ang nagtambong sa Memoryal sa bilog nga kalibutan. Ginaagda ka namon nga magtambong bilang pagpakita sing apresasyon sa pinakahamili nga regalo sang Dios.