MAY mga relihion sa bilog nga kalibutan—pareho sang Iglesia Katolika Romana, pila ka Ortodokso nga simbahan, Budhismo, kag iban pa—ang nagapatuman sang selibasiya sa ila mga lider sa relihion. Sa pihak nga bahin, madamo ang nagapati nga bangod sini, nagdamo ang kaso sang pag-abuso sa sekso nga nadalahig ang mga klero sang sarisari nga relihion.

Gani may rason gid sa pagpamangkot, Ginapatuman bala sang Biblia sa Cristiano nga mga ministro ang selibasiya? Para masabat ina, binagbinagon naton kon diin ini nag-umpisa kag kon ano ang pagtamod sang Dios sa sini.

Suno Encyclopædia Britannica, ang selibasiya amo ang “indi pagminyo kag, gani, paglikaw sa pagpakigsekso, sa masami bangod ang isa opisyal sang simbahan ukon debotado.” Sang nakighambal ang anay papa nga si Benedict XVI sa Romano nga Curia sang 2006, sia nagsiling nga ang pagpatuman sang selibasiya sa mga ministro “nagsugod halin pa sa tion nga malapit sa panahon sang mga Apostoles.”

Pero, ang selibasiya wala ginahimo sang unang siglo nga mga Cristiano. Ang matuod, si apostol Pablo nga nagkabuhi sang unang siglo, nagpaandam sa iya mga masigkatumuluo parte sa mga lalaki nga nagasugid sing “mga mensahe nga kuno naghalin sa Dios” kag “gindumili nila ang pagpangasawa.”—1 Timoteo 4:1-3.

Sang ikaduha na nga siglo nagsugod ang pagpatuman sang selibasiya kag nag-umpisa ini sa Nakatundan nga mga simbahan sang “mga Cristiano.” Suno sa libro nga Celibacy and Religious Traditions, “pareho [ini] sa bag-o naglapnag nga buhat sa Emperyo sang Roma nga paglikaw sa pagpakigsekso.”

 Pagligad sang mga siglo, ginpalapnag sang mga konsilyo sang simbahan kag sang ginatawag nga mga Amay sang Simbahan ang pagpatuman sang selibasiya sa mga ministro. Nagapati sila nga ang pagpakigsekso makapahigko kag indi nagakabagay sa mga klero sang simbahan. Pero, ang Encyclopædia Britannica nagsiling nga sang “katapusan nga bahin sang ika-10 nga siglo madamo nga pari kag bisan gani mga obispo ang may mga asawa.”

Ginpatuman sang Lateran Councils nga ginhiwat sa Roma sang 1123 kag 1139 ang selibasiya sa mga ministro, kag amo gihapon ang ginapatuman sang Iglesia Katolika Romana asta subong. Bangod sini, nalikawan nga mabuhinan ang impluwensia kag kuarta sang simbahan kay wala na sing pari nga may asawa nga nagapapanubli sa ila kabataan sang propiedad sang simbahan.

Ang pagtamod sang Dios sa selibasiya makita sa iya Pulong, ang Biblia. Mabasa naton sa sini ang ginsiling ni Jesus parte sa mga nagpabilin nga indi minyo pareho niya “tungod sa Ginharian sang langit.” (Mateo 19:12) Sing kaanggid, may ginsiling man si apostol Pablo parte sa mga Cristiano nga nagsunod sa iya halimbawa bilang indi minyo “tungod sa maayong balita.”—1 Corinto 7:37, 38; 9:23.

Pero, wala ginsugo ni Jesus ukon ni Pablo ang mga ministro nga indi mangasawa. Si Jesus nagsiling nga ang pagpabilin nga indi minyo isa ka “regalo,” kag indi tanan niya nga sumulunod nakabaton sini. Sang nagsulat si Pablo parte sa “mga indi minyo,” prangka sia nga nagsiling: “Wala ako sing sugo halin sa Ginuo. Apang, . . . amo ini ang akon opinyon.”—Mateo 19:11; 1 Corinto 7:25.

Dugang pa, ginapakita sang Biblia nga madamo nga Cristianong ministro sang unang siglo, lakip si apostol Pedro, ang may asawa. (Mateo 8:14; Marcos 1:29-31; 1 Corinto 9:5) Ang matuod, sang naglapnag ang imoralidad sa Roma sadto nga tion, nagsulat si Pablo nga kon minyo ang isa ka Cristiano nga manugtatap, dapat “isa lang ang [iya] asawa” kag ang iya “mga anak . . . nagapasakop” sa iya.—1 Timoteo 3:2, 4.

Indi ini paglikaw sa pagpakigsekso sang mga mag-asawa, kay maathag nga nagsiling ang Biblia nga dapat “ihatag sang bana ang kinahanglanon sang iya asawa” kag ang mag-asawa ‘indi dapat magdingot’ sang seksuwal nga relasyon sa isa kag isa. (1 Corinto 7:3-5) Maathag nga wala ginapatuman sang Dios sa Cristiano nga mga ministro ang selibasiya.

Kon wala ginapatuman ang selibasiya, ngaa nagsiling si Jesus kag si Pablo nga mas maayo ang indi minyo? Bangod ang mga indi minyo may mas daku nga kahigayunan sa pagsugid sang maayong balita sa iban. Mas daku ang ila mahimo kay wala sila nagakabalaka sang mga butang nga masami ginakabalak-an sang mga minyo.—1 Corinto 7:32-35.

Binagbinaga ang halimbawa ni David. Naghalin sia sa iya daku sing sueldo nga trabaho sa Mexico City para magsaylo sa Costa Rica agod matudluan ang iban parte sa Biblia. Nangin mas mahapos bala ini kay David kay wala sia sing asawa? “Huo,” siling niya. “Mabudlay ang pag-adjust sa bag-o nga kultura kag bag-o nga kahimtangan sa kabuhi, pero bangod kaugalingon ko lang ang ginaatipan ko, nangin mas mahapos ini sa akon.”

Si Claudia, nga isa ka indi minyo nga Cristiano nga nagsaylo sa mga lugar nga mas madamo ang kinahanglanon nga mga ebanghelisador, nagsiling: “Nalipay gid ako sa akon pag-alagad sa Dios. Ang akon pagtuo kag kaangtanan sa Dios napabakod sang nakita ko kon paano niya ako ginaatipan.”

Indi pabug-at ang pagpabilin nga indi minyo. Si Claudia nagdugang: “Indi man importante kon bala minyo ka ukon indi, basta ginahatag mo ang imo pinakamaayo kay Jehova nga Dios mangin malipayon ka.”—Salmo 119:1, 2.