ISA GID KA MATAHOM NGA PAGLAUM! Nagsaad ang aton Manunuga nga hatagan kita sing kabuhi nga wala sing katapusan, diri mismo sa duta. Pero madamo ang nabudlayan sa pagpati sa sini. ‘Tanan kita mapatay gid,’ siling nila. ‘Natural lang nga mapatay ang tawo.’ Ang iban nagapati nga posible kita mabuhi sing wala katapusan, pero indi diri sa duta. Siling nila mabuhi ka sing wala katapusan kon patay ka na kag didto ka na sa langit. Ano sa banta mo?

Antes mo ini sabton, hibalua anay ang sabat sang Biblia sa sining tatlo ka pamangkot: Paano ang paagi sa pagtuga sa tawo nagapakita kon daw ano sia dapat kalawig mabuhi? Ano gid ang katuyuan sang Dios sa duta kag sa mga tawo? Ngaa nagakapatay ang tawo?

Sa tanan nga gintuga sang Dios nga may kabuhi sa duta, pinasahi gid ang tawo. Ngaa? Ginasugid sang Biblia nga ang tawo lamang ang gintuga suno sa “larawan” kag “kaangay” sang Dios. (Genesis 1:26, 27) Ano ang buot silingon sini? Buot silingon nga sarang mapakita sang mga tawo ang personalidad kag mga kinaiya sang Dios, pareho sang gugma kag hustisya.

Dugang pa, ang mga tawo may ikasarang sa pagpamensar kag pagpangatarungan, lakip na ang paghibalo sang maayo kag malain kag ang handum nga mangin suod sa Dios. Amo ini kon ngaa maapresyar naton ang katahom sang uniberso kag sang palibot, subong man ang art, musika, kag binalaybay. Labaw sa tanan, ang tawo may pinasahi nga ikasarang nga masimba ang Manunuga. Nagapakita ini nga pinasahi gid ang mga tawo sangsa iban nga mga tinuga sa duta.

Gani pamensari ini: Ihatag bala sang Dios ini nga mga kinaiya, lakip ang ikasarang nga padayon ini nga mapauswag, kon gintuga niya ang tawo nga mabuhi lang sing pila ka tuig? Ginhatagan sang Dios ang mga tawo sining pinasahi nga mga kinaiya kag mga ikasarang para malipay kita sa aton kabuhi diri sa duta sing wala katapusan.

Pero ang iban nagasiling nga wala gintuga sang Dios ang tawo nga mabuhi sing wala katapusan. Para sa ila, gintuga ang duta para istaran lang sing temporaryo, para tilawan diri ang mga tawo kon bala nagakabagay sila nga magkadto sa langit kag mabuhi didto sing wala katapusan upod sa Dios. Pero kon matuod ina, indi bala nagapakita ina nga ang Dios amo ang responsable sa tanan nga kalautan kag kalainan diri sa duta? Indi gid amo sini ang Dios. Ang Biblia nagsiling parte sa iya: “Matarong  ang tanan niya nga ginahimo. Matutom sia nga Dios kag wala gid sing pagkadimatarong sa iya; matarong sia kag matadlong.”—Deuteronomio 32:4.

Ginasugid sing maathag sang Biblia ang orihinal nga katuyuan sang Dios sa duta: “Ang mga langit iya ni Jehova, apang ang duta ginhatag niya sa mga tawo.” (Salmo 115:16) Huo, gintuga sang Dios ang duta para mangin matahom kag permanente nga ilistaran sang tawo, kag ginpuno niya ini sang aton mga kinahanglanon para mangin malipayon kita sa pagkabuhi sing wala katapusan.—Genesis 2:8, 9.

“Ang mga langit iya ni Jehova, apang ang duta ginhatag niya sa mga tawo.”—Salmo 115:16

Ginasugid man sing maathag sang Biblia ang katuyuan sang Dios para sa mga tawo. Ginsugo niya ang una nga mag-asawa nga “[pun-on] ang duta kag dumalahan ini, kag gamhan . . . ang tanan nga buhi nga mga sapat nga nagakamang sa duta.” (Genesis 1:28) Daku gid nga pribilehiyo nga atipanon kag palaparon nila ang ila Paraiso nga puluy-an sa bug-os nga duta! Ang matuod, sanday Adan kag Eva kag ang ila mangin kaliwat mahimo gid nga mabuhi sing wala katapusan sa duta, indi sa langit.

Ngaa nagakapatay kita? Ginasugid sang Biblia nga gintinguhaan sang isa ka espiritu nga tinuga sang Dios, nga nakilala sang ulihi bilang rebelyuso nga si Satanas nga Yawa, nga gub-on ang kahimusan sang Dios sa Eden. Paano?

Ginganyat ni Satanas ang aton una nga mga ginikanan, si Adan kag si Eva, nga mag-upod sa iya sa pagrebelde sa Dios. Sang nagsiling si Satanas nga may ginadingot ang Dios nga maayo sa ila—ang kinamatarong nila nga magdesisyon kon ano ang husto kag sala—nagdampig sila kay Satanas kag nagrebelde sa Dios. Ano ang resulta? Sang ulihi napatay sila, suno gid sa paandam sang Dios. Nadula nila ang kahigayunan nga mabuhi sing wala katapusan sa Paraiso sa duta.—Genesis 2:17; 3:1-6; 5:5.

Ang pagrebelde nanday Adan kag Eva nag-apektar sa tanan nga tawo asta sa aton panahon subong. Ang Pulong sang Dios nagsiling: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo.” (Roma 5:12) Nagakapatay kita bangod napanubli naton ang sala kag kamatayon sa aton una nga mga ginikanan, indi bangod natalana na ini, ukon misteryoso nga ‘plano’ sang Dios.

Wala napunggan sang pagrebelde sa Eden ang orihinal nga katuyuan sang Dios sa tawo kag sa duta. Bangod sa gugma kag hustisya sang Dios, naghimo sia sing paagi para mahilway kita sa pagkaulipon sa aton napanubli nga sala kag kamatayon. Si apostol Pablo nagsiling: “Ang bayad sa sala amo ang kamatayon, apang ang dulot nga ginahatag sang Dios amo ang kabuhi nga wala sing katapusan paagi kay Cristo Jesus nga aton Ginuo.” (Roma 6:23) Mahigugmaon nga “ginhatag [sang Dios] ang iya bugtong nga Anak [si Jesucristo], agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Paagi sa paghalad sang iya kaugalingon sing kinabubut-on, gingawad ni Jesus ang tanan nga nadula bangod kay Adan. *

Sa indi madugay, matuman na ang ginpromisa sang Dios nga paraiso nga duta. Mabaton mo ini kon sundon mo ang ginsugo ni Jesus: “Magsulod kamo sa makitid nga gawang, kay masangkad ang gawang kag malapad ang dalan nga nagapadulong sa kalaglagan, kag madamo ang nagaagi sa sini; apang makitid ang gawang kag mabudlay ang dalan nga nagapadulong sa kabuhi, kag pila lamang ang nakatultol sini.” (Mateo 7:13, 14) Huo, ang imo palaabuton nagadepende sa imo desisyon. Ano ang himuon mo?